¹ Abengan n’amoithe, ohoithamojok karik ohobolok, awahi hijan Yesu thottohori. ² Endafaithe, athorye, eyarai Yesu do lahong l’ahap, Ponsyo Pilato.

³ Atehuna no Juda, lethanyangyo de Yesu lo, hijan Yesu lofwoi ittohoro, enyaharu enyahwo henyangunerek inyong Yesu hune d’ohoithamojok hohittwak h’ohobolok h’ohothing. ⁴ Ajyo Juda, “eyau nang disarahina othulo lokabong hoiyau thottohori. Isong hulo ajyori, “Awang oho thiya; otiha arami hahoi holefeng.” ⁵ Juda Skariot arwasaru enyahwo hune dith’Atempolo; alo ittoloro. ⁶ Ohoithamojok hahong h’ohobolok h’ohothing ajyori, “Aang h’eyarai enyahwo h’ahotho di Tempolo.” ⁷ Isong hulo ajyori, inyangunerethe enyahwo hune amaji na nuhyerek ohodahak. ⁸ Inyong nelongori amaji nya lwai hongorna ara “amaji n’ahotho.” ⁹ D’ofuni arami h’ohocororni Jeremiya iwonan ara hadiri, “Eduhuni enyahwo hethanyangerek inyong ohothing ho Israele, ¹⁰ esarahini di mana h’ohoyani l’amoco, iring nathuhorik nang ohobu anyahinerek.

¹¹ Yesu awoitha dihithemi ho lahong l’ahap, efiyo inyong, “Iye Ohobu l’Ojudei?” Yesu etharang inyong, “Ejyo iye.”

¹² Pilato anyaha di hang; ethalongo Yesu. “Iye Ohobu l’Ojudei?”Pilato efiyo Yesu. ¹³ Yesu etharang Pilato, “Thohoi oindu oifiet lya, dia ohothing homok onyahi iye hijan nang ngai?” ¹⁴ Pilato etharang Yesu, “Hibu nang ti l’Ojudei? Ohothing hohoi indefu, eyanai iye donang. Ehandyo iye ti ainyong. ¹⁵ Yesu ajyo, “Ohobye hindang ikara lothohop. Ara ohobye hindang lothohop, irahi nang ohothifok hundang ikauna th’endafaitho n’ohobolok h’Ojudei. A a, ohobye hindang ikara lothohop thene!” ¹⁶ Pilato efiyo Yesu, “Hibu diri iye Ohobu?” Yesu ethanrang, “Ejyo iye nang Ohobu. Aisuni nang; nang aindu dihap th’arami thohune: dicama arami hadiri. Le ithaningyo arami hadiri, ithaningyo nang. ¹⁷ “Aisong arami hadirir?” Pilato efiyo Yesu. Pilato anyaha dindak, ajyo d’ohothing, awang nang arimak arami h’ethayeyere Yesu. ¹⁸ Otek Pilato hijan owahi Ojudei atohoro Yesu th’ahaini.

¹⁹ Asulu nafure ho Pilato ocame d’othulo lonyong, ahibu inyong owoni dihide h’okara lokanyere arami, ocame lojyo, “Hoihandyo arami hamonyong d’othulo lobis lya. Kabong nang ajoothoro ohariee th’etharikahio thahanyong.”

²⁰ Ohoithamojok hohittwak anyahini d’ohothing thoifiye Pilato thohohi Barabas, attohori Yesu. ²¹ Lahong l’ahap efiyo isong, “Loni th’arehai iwak ithai ahohi nang?” Ara ohothing ajyori, “Barabas.”

²² Pilato ajyo dosong, “Angai ehan nang Yesu?” Ohothing ajyori, “Obehok Yesu di kruce.”

²³ Pilato ajyo dosong, “Anyo, ainyong obafu odyahu?” Ekori, euluhoi, eluluo ohothing, “Obehok Yesu di kruce.”

²⁴ Atehuna no Pilato aang aning nacohi honyong ehandyo, engengelyo owahi ohothing etharohojo, elongu ahari afiniya dihithemi h’elulung n’ohothing, ajyo, “Aang ocohi do nang di ngouna ahotho n’othulo lobis lo. Ottihyethe ithai amonye.”

²⁵ Ohothing fodok ajyori, “Ahotho nanyong thoiwona dohoi h’oduring hohoi.” ²⁶ Pilato ahohi Barabas dosong; ethafodohyo Yesu, ahorik isong thoifwa obehok inyong di kruce.

²⁷ Ohoremok hoiririyo lahong l’ahap eyaru Yesu d’abore nahittok n’eririyerek ahap nasuduharik ohoremok fodok. ²⁸ Ahoye inyong, ethayofohini ahilyen anaborong. ²⁹ Ehuhumye ehithang n’oihwa abehohini di hu ho Yesu, ahibu inyong indafetho othelek th’enget. Ohoremok hulya arigongo dihithemi honyong, ethalubangye inyong ajyori, “Koruk do ohobu l’Ojudei.” ³⁰ Ohoremok amico ahamilak di hwan ho Yesu, ahoruni othelek adi tho hinang honyong, abahi Yesu di hu. ³¹ Athuhon nasong ethalubangyo Yesu, ahouni ahilyen anaporong ne adi tho hwan honyong, enyahahini ahilyen no Yesu di hwa honyong, eyarai inyong dibehohina di kruce.

³² Afuna nasong dindak, arimahini othulo lo Cyrene, loilongoi ara Simone; eringahini inyong anden hosong dingarahina Yesu adohoro akruce. ³³ Edwongi di Golgotha, amaji “n’ahosi h’ohothing.” ³⁴ Diya, esarahini inyong thomathai emathitha hadwa iring odengela. Ethem ahani, eda Yesu amatha. ³⁵ Athuhon nasong abehohina Yesu di kruce, ahorai alyenyi hanyong th’arwasa thon’omorik; ³⁶ Awoniyari ohoremok hulya, dikeyo inyong. ³⁷ Di hu h’akruce, abehohini diya ocame lojyo, “Yesu, Ohobu l’Ojudei.” ³⁸ Obehohini nya di kruce ohoholak arehai ho Yesu, oboithe dinget, loboling di hotong. ³⁹ Ohothing hofwo thole, eniningyo ahosi, amorye inyong, ⁴⁰ ajyori, “Iye lonya ijyo, isuluyahak iye de Atempolo ara iye ithawejik d’operok aunihoi, ithahoru do ahwan nahoi! Arai iye olonyi l’Ojok, icuru thohide h’akruce!”

⁴¹ Ofaning le dang, ethafoyongyo inyong ohoithamojok hohittwak, ohoigerok karik ohobolok ajyori, ⁴² “Ithalwahu homok, aang h’oco alwahuna ahwan nayong. Inyong Ohobu Lo Israele; Inyong thoicuru tho hide h’akruce di ruk ohoi donyong. ⁴³ Obolo eruk nanyong d’Ojok; Ojok thethalwahu ara owak ethalwahuna inyong, Atha ojyo inyong, “Nang Olonyi l’Ojok.” ⁴⁴ Ara ohoholak hobehohini honyong di krue hulo dang amorye inyong ahani.

⁴⁵ D’omiru inde h’ofaning, aindu omudwe di hap fodok lwai d’omiru sahal h’ofaning. ⁴⁶ Th’orii le, elululuo Yesu bebe, ajyo, “Eli, Eli, lama sabaktani? ojyo ocame lya: “Ojok hindang, Ojok hindang, anyo idyaharu iye nang?”

⁴⁷ Ohothing howetha diya indehai hoithairu ajyori, “Elija ilongo.”

⁴⁸ Lobo aboithe thosong kwak eduhu abahandi n’ohimai etuhi ditha h’obalu olodong, esarak di huthuk ho Yesu; tho mathai; ⁴⁹ Ohothing holwa ajyori, “Idehina onde lya hamaring. H’edoryethe ara oindu Elija ethalwahuna inyong.” ⁵⁰ Yesu koti ekor bebe, ara ohoile lonyong adutharu.

⁵¹ Th’orii lya, alyenyi fodok hotho Tempolo, arithai hara thohide lwai di hap. Ehihira ahap, omorik abobora. ⁵² Anga alame, ara ohothing h’Ojok honya ajoothoro, ahenyuni th’ajoo. ⁵³ Ofuni tho lame, diholu h’ebuhuna nanyong, ajingari d’abore nadwa, aleyori d’ohothifok olwarai. ⁵⁴ Atehuna na lahong l’ohoiriryak ho Yesu karik ohothing homok, arithirithi h’asang fodok hawon, abangi ajyori, “Onde lya diri Olonyi l’Ojok.” ⁵⁵ Owethi, engengelye olamarai angorwo hanya othiforo Yesu tho Galilea difwan ilwahyo diya. ⁵⁶ Dith’angorwo hwa owoni nya: Maria Madalina, Maria nahathingi ho James karik Yosefo karik ahathingi n’oduring ho Zebedeyo.

⁵⁷ Ajara nya awon ara athari, aindu ohobarani lobo th’amiji n’Arimathea, ilongoi ara Yosefo, ohothifoni lo Yesu. ⁵⁸ Yosefo l’Arimathea alo do Pilato difiyo ahwan no Yesu. Pilato anyahi ahwan no Yesu thoisarahini do Yosefo. ⁵⁹ Yosefo eyaru ahwan no Yesu emuhok th’alyenyi angejuho aliborok. ⁶⁰ Alo ithaferihina dith’ahilame angejuk nanya ikefak inyong dith’amorwong. Asulak amorwong nahittok dihuthuk h’ahilame, alo adi. ⁶¹ Orimak Maria Madalina ho Maria naboling owoniyari diker h’ahilame.

⁶² Nya moithe awon ara ofaning lehuhumyo n’ofaning l’amuno. Asuduha ohoithamojok hohittwak, Ofarisei ho Pilato. ⁶³ Ajyori, “Lahong, ojahitha ojyo nya ohodwalani* le homijo, ‘Diholu operok aunihoi ebuhu nang de th’oye.’ ⁶⁴ Otiha hijan ahilame thoikeye tuhudik. Ara ike ahani, ofuni de ohothifok honyong, ahoholarai inyong ajyori d’ohothing, “Ebuhu th’ohoyak.” Omonyong de adwala etharehe, okalak ehethemoni.”

⁶⁵ Pilato ajyo dosong, “Iyathik ohoikyani. Ifwatha; Ikeyethek ahilame tuhudik iring itek ithai.” ⁶⁶ Afwoi isong hulo, afwoi isarahina ahilame th’ekeye tuhudik, amorwong thoithothorohini dihide, ara ohoikyani eririyo.