¹ Thene, diholu h’Ofaning Oithacofe, afwo ho Maria Madalina ho Maria naboling di tihyo ahilame no Yesu. ² D’omiru hule edwong arithirithi, aindu honyong tho hide anjelo l’Ohobu, eyafulangu amorwong adi tho hide h’ahilame no Yesu, awoni dihide h’amorwong. ³ Oleyo anjelo lya iring emedek n’ahila, abongoitho hanyong abongi iring eriri. ⁴ Ehihira ohoikyak h’ahilame th’abangi, ojahitherek ohoyak. ⁵ Anjelo acama d’angorwo hune, ajyo dosong, “Hoibangatha. Atek nang. Yesu ithifeyo ithai, lonya athuhi abehohina di kruce. ⁶ Aang thene; ti, ebuhu iring nanya ojyarik inyong. Ifuna idorotho amaji nanya ithaferihinerek Hobu na. ⁷ Ifwatha kwak di nyahina ohothifok honyong, ‘Athuk ebuhuna th’ohoyak. Otihyethe, athuk anden ahithemi nathai di Galilea... Diya, ifwo ithai de itehuna inyong. ‘Idorotho, athuk nang ithai anyahina.”

⁸ Angorwo hune kwak edyaharu ahilame th’abangi h’amuno, angerori di nyahina ohothifok ho Yesu. ⁹ Diya, arwangarik isong Yesu, ajyo dosong, “Emanda!” Afuni angorwo, endafaithe Yesu thohejek amojyoi donyong. ¹⁰ Yesu ajyo do song, “Hoibangatha. Inyahina halalalai thoifwa di Galilea. Ofwoi de itehuna nang diya.”

¹¹ Afwan n’angorwo, ohoikyak h’ahilame no Yesu afwoi dang di bore dinyahina ohoithamojok hohittwak arami angejuho hawon th’orii le. ¹² Athuhon n’ohoithamojok h’ohobolok acama arami hune, eduhuni enyahwo adumahini d’ohoikyak h’ahilame no Yesu. ¹³ Anyahini isong hulo ohoikyak, “Ijaratha, d’ohothing homok, afuni ohothifok ho Yesu ahoholarai ahwan nanyong ahibu ohoi ethuk ajoothoro.' ¹⁴ Ara iwas arami hune do lahong lahap, inyahi ohoi de inyong th’aang hoihandye arami hamonyong dothai.” ¹⁵ Eruhuni ohoikyak, efothuni enyahwo iring nathuhi isong anyahina. ethathurohini arami hune d’Ojudei karik di hap fodok lwai hangorna.

¹⁶ Ti, afwoi ohothifok ho Yesu di Galilea, d’odonge lonya onyahi Yesu isong thoifwa diya lo. ¹⁷ Atehuna nasong Yesu, amojyoi donyong. Kabong ti homok hoiruk arami hune tuhudik. ¹⁸ Yesu aindu, acama dosong, ajyo, “Abolori fodok athuhi esarahina do nang dihide karik di hap. ¹⁹ Ifwatha orimahina ohothifok h’amisok fodok. Ethandefahini isong Abatisimo th’ofure thol’Omonye, thol’Olonyi karik thol’Ohoile Lodwa. ²⁰ Ityeniethek isong thoiruho asang fodok hathuk nang ithai anyahina. Otihatha, awon nang de hothai juui, lwai dicuhit h’ahap.”