¹ “Ecuruna nya no Yesu th’odonge, elululng nahittok n’ohothing, athiforo inyong. ² Thiya, othulo laleng adihari adiha namonyong n’amuhunyong aindu donyong, arigongo dihap dihithemi honyong, “Lahong, ara iwak iye, ocohi dohoi dithaliboruna nang.”

³ Yesu anithok ahinang nayong, athin inyong, “Awak nang,” inyong etharang. “Oliboro.” Thenene ne, elik amuhunyong n’othulo lodiha. ⁴ Thiya Yesu ajyo donyong, “Ithaningye, hoinyahi d’othulo loboling, ti, ilo gwo do fadiri thoidorye iye. Thiya, dotehi ohothing fodok hijan alibo othulo lonya adiha hadiha n’amuhunyong lo, ehandyo inyong lo ehuma nanya onyahi Musa na.”

⁵ Ajingara nya no Yesu di Kapernaum, arwangai h’ohoigyemani lo Roma, efiyo thonyong alwaha. ⁶ “Lohong, ohoigyemani hindang lodiha dihang dijothit, aang odaha, ithathaciana bebe.”

⁷ “Aindu nang de isarahina inyong thoyijyo,” Yesu ajyo.

⁸ “Ikara ahani, lahong,” etharang ohoigyemani lo Roma. “Aang ocohi donang hijan iindu iye dihang honang. Ifahak ainyong thoihandye, oyyu de ohoigyemani hindang. ⁹ Nang dang othulo loindafaitho ohoigyemak hohittwak; karik owoni dang ohoremok hoindafaitho nang. Ajyo nang d’aboithe, ‘Ilo!’; alo; nang ajyo ikoti doloboling, ‘Iwong!’ aindu; karik nang anyahi d’ongaca hindang, ‘Igyemai aning na!’ aang hoigyema aning ne.”

¹⁰ Ethaninguna n Yesu arami hune, afalanga ajyo d’ohothing hothiforo inyong, “Anyahi nang ithai, kabong nang arimahinerek othulo d’Israele heruhon najahitha na.” ¹¹ Anyahi nang ithai tuhudik, ofuni de ohothing olwarai tholo moithe karik tholo thari awoniari dihap h’Abramo, Isako karik Yakobo d’amuno d’Ohobye lothohide. ¹² Ti, hoira iwonan ditha h’Ohobye, omiroroi de adi ditha h’omudwe, amaji nafwarik isong de ikororik karik erocye ohala.” ¹³ Thiya, Yesu ajyo d’ohoigyemati l’ogalla ho Roma lya, “Ilo di hang; arami heru iye hune, ihandye de dohoi.” Ara ongaca lodiha lo ayyu th’omiru hule.

¹⁴ Yesu nya alo dihang ho Petro. Diya, atehu nahamoni ho Petro odiha hethor n’ahu di jothit’. ¹⁵ Yesu athin ahinang nayong, ethor n’ahu edehi inyong karik alo ifothuna Yesu ara othohomononi. ¹⁶ Edwongon n’athari, eyanu ohothing do Yesu ohothing olwarai howoni h’ohoilehio homonyong. Yesu angararik adi ohoilehio omonyorok hulya th’ocame oboithe karik ethalihak ohothing bukulung honya odiha hulo. ¹⁷ Ihandyo ahani dofuni arami hanya ajyo ohocoroni Isaya huna ifuna ara hadiri, “Eyaru inyong thahwan adihathik hahothai karik eduhu adi adihathik hahothai.”

¹⁸ Atehan no Yesu hijan inyong lodihiji h’elulung n’ohothing, anyahi ohothifok honyong thoifwa d’oyirik lobo l’ajor. ¹⁹ Ohoityenani l’oyalu aindu donyong. Ajyo, “Ohoityenani, awak nang athiforo iye d’amaji nenderek iye.”

²⁰ Yesu etharang inyong, “Owoni owoho karik ahwen h’athwahio, ti, aang Olonyi l’Othulo owon h’amaji naferorik ara inyong ayiri.”

²¹ Othulo lobo, lonya owon ara ohothifoni, ajyo, “Lohong, nang dodo thoilo di nuhahina lalamonye.”

²² “Othifunu nang,” Yesu etharang, “Idehi ohoyak thomuhak ohoyak hosong.”

²³ Zene ara Yesu echurok diza ahibo nanyong ara ohozifok honyong aziforo inyong. ²⁴ Yesu ecurok di roko, alo h’ohothifok honyong. ²⁵ Kwak ahani, ahomwa nako awam di jor, oindeharik aroko alafuho karik adyoro. Ti, orimak Yesu dijothoro. Ofwoi ohothifok, ethahenye inyong. Ajyori, “Olwaha ohoi Hobu, eindek ohoi aye.”

²⁶ “Anyo ibang ithai ahani,” Yesu etharang, “Anyo omutha eruhon nathai ahani!” Yesu adotho, anyahi ahomwa thowethai karik ahari hepongaitho thowethe. Ahari nya adularu nding nding.

²⁷ Afalanga ohthing. “Lojahihitha angai othulo lo?” ajyori isong, “Juk ahomwa karik epongaitha n’ahari ethairye arami hanyong!”

²⁸ Ajara nya Yesu aindu d’oyirik lobo l’ajor, arwangarik inyong lo ohothing arehai hofuni thath’alomi h’anuhyerek. Owoni nya ohothing hulo h’ohoilehio homonyong dithosong. Ingereji nya ara homonyong. Aang nya othulo lolo thol’oyihoi loindek dosong. ²⁹ Irahi ingereji kwak, “Ainyong iwak ithai dohoi, iye Olonyi l’Ojok? Indu iye dibahyo ohoi kabong omiru hofuni?”

³⁰ Ikara olamarai thene owon nya amaji nethanyerek abathaha. ³¹ Ahani ne, ohoilehio homonyong amojyoi do Yesu, “Ara ilo iye ingararik ohoi adi, osulak ohoi ditha elulung n’abathaha nya.”

³² “Ifwatha,” Yesu anyahi isong; isong hulo afwo, afwoi ijingahina dth’abathaha. Elulung n’abathaha ne angero adiwor d’oyirik l’adonge ditha h’ajor, amathi diya. ³³ Ara ohoyohok h’abathaha hulo angerori di bore, enyanyahye diya arami hafuk d’ohothing howoni h’ohoilehio homonyong. ³⁴ Ohothing hotho bore afwoi dindak di kuboitherek Yesu; atehuna nasong inyong, omojyo inyong thoidehi ahap nasong.