¹ Hoikanyo homok, daang iye Ojok okannyo. ² Aca oindu iye de Ojok ikanyo, th’oyihoi thele ikanyerek iye homok. Oindu de ikanyo iye th’oyihothik thoh’ekanyerek iye homok. ³ Anyo hathi imijyo iye d’ahujithing noth’ohonyek hoilelai, ahibu iye aang hoimijyo tuhudik d’ahujithing nahittok noth’ohonyek hohoi? ⁴ Angai oko ohu nahoi di jaran do lelai, “Pwanga, iduhu ahujithing th’ohonyek honang, ahibu ye iwonon h’ahithoi dihonyek hohoi? ⁵ odwalani lo, iduhu dodo ahithoi th’onyek hohoi, ara iye hathi iduhu ahujithing th’ohonyek holelai. ⁶ “Hoisarak aning nadwa d’ongohe – iloithoi de dihonya hohoi. Hoicohok onyahwo hohoi holibo dihithemi h’ekaaha – erereye de th’ahejek.

⁷ “Ifiye, difothu iye, othifeye, dirimak iye, ibabahye, dongai oyihet dohoi. ⁸ Aca othulo lefiyo, ifothu de; lothifeyo, orimak de; onga de oyihet d’ohothing hoibabahyo; ⁹ Isarak lobo thothai, howoni ara omonyehio hulo, d’olonyi lonyong omorwong, ara ifiyo olonyi anyari? ¹⁰ Dia isarak iye amunu ara ifiyo iye ohome? Dia angai ojak amonyori nahoi. itek iye angai isarak iye asang hayyu d’okalifinok hohoi. ¹¹ Angai de aang okalu esarahina n’Omonye lothai lothohide disarahina asang hayyu d’ohothing hoifiyo inyong! ¹² Ihandye dohomok ainyong iwak iye isong thoihandye dohoi; arami hune hajyo oyalu lo Musa karik loityenierek ohocorok.

¹³ “Ojingai th’oyihet tholo iruhusi; oyihet d’inferno iyakalang, oyihoi lolo diya ilik; karik olwari ohothing hodaha thole. ¹⁴ Ti, oyihet lofwarik d’esu, iruhusi karik oko oyihoi lolo donyong; karik omutha ohothing horimak inyong.

¹⁵ Omijye tuhuudik ohocorok hoikela th’ohocorok hadiri; ofuni dohoi tholo dang iring okero, ti, tholothwa, isong hulo diri owoho. ¹⁶ Itek ithai de isong th’aning thana ihandyo isong. Ofarathik hedwedweye, aang hongidari ahayo karik aang obiyongo ongida abiyongo. ¹⁷ Ohiyani loyyu, ongida ahayo hayyu, ara ohiyani lomonyong edoyo ahayo hamonyong. ¹⁸ Aang ohiyani locohi edoyo ohayo hamonyong karik aang ohiyani lomonyong locohi angidari ahayo hayyu. ¹⁹ Karik, ohiyani laang idoyo ahayo hayyu, oyefahini dihap, amirohini dith’ahimang. ²⁰ Inyong na, itek ithai de ohocorok th’asang thah’ehandyo isong. ²¹ Ikara ohothing fodok oilongo na: “Hobu, Hobu” de ojingak d’ohobye lothohide, arahari ohothing hoinhandyo aning nawak lalamonye lthohide, isong thoihandye. ²² Ara Ofaning l’Akanyo laindu, ojyoi de holwa donang, ‘Hobu, Hobu! Ditha h’ofure lohoi, ecama ohoi efahi nahoi th’ofure tholohoi ingaterek ohoi ajohi karik acuhi karik th’ofure tholohoi ehandyo ohoi asang olwarai hafalangai!’ ²³ Thiya, ajyo nang de dosong, ‘Aang nang nya atek ithai, ifwatha adi thonang, ohothing omonyorok!’

²⁴ “Inyong na, othulo loitharuhu ocamitha hundang hulo eruk isong. Ojahitha othulo loilofioro, loduho athwa nanyong dihide hamorwong. ²⁵ Ohuju asa, owori angetha karik ahomwa awam difidihyo athwa ne. Ti, kabong athwa opwaharu, anyo, aduho hidihe h’amorwong. ²⁶ Ti, othulo lowon h’ocamitha hundang hulo, ti, aang hoiruhu ojahitha onyalubathi loduho ahtwa nayong dihide h’akujo. ²⁷ Ara ohuju asa, owori anger karik ara ohomwa awam, athwa apwaharu. Karik, ainyong apwaharu nanya ithabangyo ahanya nya.”

²⁸ Athuhon no Yesu acama arami hune, afalanga elulung oyihoi loityenierek inyong. ²⁹ Aang nya ojahitha ohityenak h’oyalu; kombwo etyenio th’akolon.