¹ Omijye tuhudik d’aangan ehandyo asang h’ohoile karik h’elajok hahoi dihithemi h’elulung, hijan d’otehu ohothing ainyong ihandyo iye, efufurye iye. Ara ihandyo iye asang hune ahani dihithemi h’ohothing, aang iye de irimak esorio the Lemonye lowon dihide. ² Inyong na, ara isarak iye aning nabo d’othulo lomojo, hoithaboloryo esarahina nahoi ne, iring nehandyerek odwalak d’amasok h’amojo n’elulung karik d’oyihothik hohittwak. Ihandye ahani dimamajyo isong ohothing. Anyahi nang dohoi diri, athuhi aduma odwalak hulya arabo. ³ Ti, ara elwahyo iye ohomjoni lya, olwahye inyong th’oyihoi thalaang juk omorot hoindek dohoi oteharik hijan ehandyo iye aning nabo. ⁴ Ahani ne, awoni de ara arami hedima. Dara, Lemonye hamaring, lengengelu iye ehandyo aning nedima, isarak iye de esorio.

⁵ “Ara iye lemojyo, hoijahitha odwalak! Omunoi awetha thahide dith’athwahio h’elulung hamojorik karik dikeri h’oyihothik hohittwak, dotehu ohothing isong bukulung. Anyahi nang iye diri athuhi efothuna esorio nasong fodok. ⁶ Ti, ara iye lemojo, ilo dithwa hohoi, ihyenok oyihet, ara iye imojyo de Lemonye, laang iye itehu. Lemonye, lotehu iye ehandyo aning nabo nedima lya, de isarak iye esorio. ⁷ Ara iye lemojyo, hoimojyo th’ocamitha olwarai thahaang olwahu, iring nehandyerek ohothing haang otehi Ojok, hijan ithaningyo de ojohi hosong omojitha hohodo. ⁸ Hoijahitha isong. Athuk Leemonye atehan ainyong iwak iye dihithemi hohoi efiyo inyong.

⁹ Ahana kodien ira iye imojyo: Omonye lohoi lowon dihide: ofure lohoi lodwa thohujo; ¹⁴ Ara imiehi iye homok eyatha hehandyo isong dohoi; omiehi iye de dang Leemonye lowon dihide. ¹⁵ Ti, ara aang iye imiehi homok, aang de dang Leemonye homiehi eyatha hethuk iye eyauna.

¹⁶ Ara idwa iye, hoitharingyo ahomong iring odwalak. Ithalicye oyaitha hosong, dotehuni isong ara ohothing hodwa, anye tiibai. Anyahi nang iye diri, athuho aduma nasong. ¹⁷ Ara kabong iye inyo, imujulai ara iye ikwaracyo ohofir. ¹⁸ daang homok otek hijan iye ledwa – araharik Leemonye, laang otehunu de otek. Leemonye lotehu ainyong nedima ihandyo iye, inyong de isarak iye esorio.

¹⁹ “Ohoikaniethek ebarithi dihwandek hothai dihap dine, hanyo ethur karik alodokya, hawuryo ara ohoholak ahoholyo. ²⁰ Kombwo okaniethek ebarithi ara hathai di paradiso, amaji naangarik ethur karik alodokya, karik amaji naang ocohi ohoholak auryo karik ahoholyo. ²¹ Aca, owon de othaji lohoi d’amaji nawonderek ebarithi hahoi. ²² “Ojahitha ahonde ahirya nawulo d’ahwan. Ara oyiji ahonde hahoi, ifut de ahwan nahoi th’afangan. ²³ Ti, ara aang ahonde hahoi oyiji, owon de ahwan nahoi dimudwe. Inyong na, ara owon afangan nothohwan hohoi ara omudwe, angai de ngona owon amonyori n’omudwe! ²⁴ Awang othulo locohi awonan ara ongaca l’ohoindefak karik hahong arehai; oman de lobo; eruk lobo; ithaningyo de arami holobo, amesyo holobo. Aang ocohi dohoi digyema d’Ojok karik d’enyahwo. ²⁵ Inyong nanyahi nang iye thaang hoihayai th’anyari karik th’amatha disuorik dia th’abongo d’ahwan nahoi. Ara ikara ahani, aang diri ayiji n’esu okalu anyari? Karik aang ayiji nahwan okalu abongo? ²⁶ Idoro ahwen: aang oromoi, aang ingognoye akanahini amat dikoro; ti, omijo Lethemonye lothohide dosong. Aang ithai ikalu ahwen th’ayiji? ²⁷ Ocohi lobo thothai amanya tiibai furr, thehaya thananyong? ²⁸ “Karik, ainyong ihaya ithai d’abongoitho? Otiha, angai obolo athuya h’afara: Aang hoigyemai karik aang hoihuhumye abongoitha d’ahwandek hasong. ²⁹ Ti, anyahi nang ithai hijan juk ohobu Solomone aang nya howon hebarithi h’abongoitho halibori iring aboithe n’athuya huna. ³⁰ Ojok ithayofyo amiyang notho fara – amiyang nawon dini ahanana karik nalo adi moithe. Nethawuloye di hyali. Aang de inyong diri oindu ithayofyo ithai? Angai berien omutha eruhon nahoi! ³¹ Iring na, hoiculuyo ehaya: ‘Thongai de oindu anyari hindang? dia emathitha hundang? (Asang hune juui hehayaitho opangano.) Otek Lethemonye lothohide hijan iwak ithai asang hune bukulung. ³² Kombwo, ihayathik tholohide hasang bukulung th’ohobye thol’Ojok karik ainyong de iwak ithai, isarak ithai de asang hune bukulung. ³³ Inyong na, hoihayathik arami h’omoithe. Owon de h’arami hanyong hehayai. Aang osiru difonio ethathacianitha h’ofaning. ³⁴ Dini hegigilozi ijan ainyong nafuk dena dozai ofaning loindu, iwon izai de ha asing hewak izai. Dini hegigilozi ahizemi no omiru."