¹ Atehu Yesu elulung n’ohothing, adok dihide h’odonge, diya, awoni dihap. Ohoifahak honyong asuduha diker honyong, ² karik aculuyo etyenio isong:

¹¹ Ithai homorye, ethagyemye, emangye karik adwalai asang hamonyong thoithai omunothi; anyo ithai ohothifok hundang. ¹² Omunothik, efongatha, aca, akanyama nabolo bebe nakanahini dihide ara nathai. Ahani nyana ithagyemye ohocorok homanya dihithemi hothai.

¹³ “Iwon ithai ara ahipere n’asuduhe bukulung n’othulo. Ti, ara alitho elahipere, aang oyihoi lesarahinerek inyong thoiwona ara ahipere ikoti. Aang aca nanyong, ocohoroi karik ohothing erereyo. ¹⁴ “Ijahitha ithai afangan d’ahap fodok. Abore naduhoi dihide h’adonge, aang idimunu. ¹⁵ Aang othulo lethaulok ahiryai, edimak tholohop h’aning nabo; kombwo, ithahi dihide h’ethawojit ara naleyo, enwaha d’ohothing fodok hothohong. ¹⁶ Iring ahani ne dang, afangan nahoi, thowuloi dihithemi h’ohothing. Dotehuni asang hayyu hehandyo iye karik emamajye Lemonye lothohide.

¹⁷ “Hoigigilothik hijan aindu nang ditharohojyo oyano ho Musa karik etyenitha h’ohocorok. Aang nang aindu, diyaru isong adi, ti, disarahina etyenitha hasong thoiwona ara hadiri. ¹⁸ “Iring nawonderek ahide karik ahap, aang aning nabo neduhuni adi, juk natti bebe, th’oyalu – teng ecuhit n’asang bukulung. ¹⁹ “Inyong na, lomesyo juk efahit natty, etyenio homok thoihandye ahanya, orasa de diholu d’ohobye lotho paradise. Kombwo, loithaningyo oyalu, etyenio homok thoihandye ahanya, obolo de d’ohobye lo paradiso. ²⁰ Anyahi nang ithai do hathi, icohi ithai de dijingahina ditha ohobye lo paradiso, ara iruk ithai okalak ohotyenak h’oyalu karik Ofarisei di handyo ainyong owak Ojok.

²¹ “Ethaningu ithai hijan anyahini nya ohothing berien, ‘Hoittoho; lottoho, ifiye de inyong dihithemi h’oyalu, ²² Ti, thene, anyahi nang ithai, lo ingere h’olai, iyarai de dihithemi h’oyalu, lelongo olai, “Aang-aning-neyijorik- iye,” iyanai de dihithemi h’elulung n’ohobolok, karik loilongo olai ara ohonangani laang aca, owon de habangi nafwarik d’ahimang no inferno. ²³ Inyong na, ara iwon iye h’esorio newak iye esarahina d’Ojok, ara iye iyuu hijan iwon iye h’aning namonyong holelai, ²⁴ idyaharu dodo esorio nahoi dihide h’alatari, ara iye ilo dimora ho lelai, thiya ara iye inyahu dithafothohina esorio nahoi d’Ojok. ²⁵ Ara ilongo iye lobo dihithemi h’oyalu, ihuhumahina arami di hang howoni omiru, cobong ithai ifwo dihithemi h’oyalu. Ara ithai hefwo dihithemi h’oyalu, ithafothok iye de d’ohokanyani, lethafothok de iye do polis karik efithahini iye. ²⁶ Ifitha iye de diya anyahi nang iye, tok iye aduma amillim n’omorit lohoi.

²⁷ “Ethuk iye ethairuna hijan ojyori nya, “Hoiferorik athulo nolobo.’ ²⁸ Ti, thene, anyahi nang iye, lomijyo d’athulo nangorwo awak eyaru inyong ara nayong, eyau honyong dithaji honyong. ²⁹ Inyong na, ara isarak iye ahonyek nenget eyauna, ikolowothu ara iye icohoro adi! Oyyu dohoi dingodo, th’amirohina iye bukulung dith’ahimang. ³⁰ Ara isarak iye ahinang nenget eyauna, obongu ara iye icohoro inyong adi! Oyyu dohoi diwonan h’ahinang aboithe, th’awonan hohoi h’ahwan bukulung dith’ahimang. ³¹ “Ajyori nya dang, ‘longaterek afure adi, thoisarak inyong amanini n’egero n’apeha. ³² Ti, anyahi nang iye thenene, ara ongaterek othulo loboling afure th’arami thahaang ara adaha h’ohothing homok, iyau de othulo lya eyau naferi h’othulo loikela th’onde, ara omutha inyong na ikoti; karik dang othulo lomuthayo inyong lo dang eyau esuka h’afure nekela th’athulo nanyong.

³³ Ethuk iye dang ethaninguna hijan anyahini ohothing nya berien, ‘Hoida dia hoitharohojyo arami dia asnag hethuk iye eruhuna. Ti, ihandye d’Ohobu asang hethuk iye epitha di handyo.’ ³⁴ Ti, anyahi nang iye thenene, hoipitha, ara iye leruhok ehandyo aning naboling. Hoipitha tho paradiso, aca inyong na, okara l’Ojok. ³⁵ ikara dang th’ahap, aca inyong na, amaji nayiryarik ahejek; ikara dang tho Yerusalem, aca inyong na abore n’Ohobu lohittok. ³⁶ Hoipitha dang th’ahu thanahoi, anyo, aang ocohi dohoi di sarahina juk ohofitti oboithe awonan ara obong dia omoli. ³⁷ Ijara ija “Aa’ dia “A a” – aning naboling nejyo iye, oindu th’Omonyoroni Lo.

³⁸ “Ethuk iye ethaninguna hijan ojyori nyana, ‘Ahonyek h’ahonyek, ohalai h’oholai.’ ³⁹ Ti, anyahi nanng dohoi thenene, hoirofu othulo lehandyo dohoi ara namonyong. Ara onang iye othulo lobo ecahani n’enget, isarak dang thonanga iye ecahani n’ehotong. ⁴⁰ Karik dang, ara iyaru othulo loboling iye dihithemi h’oyalu th’abongo thanahoi nothosuhe, theyaru dang th’abongo thanahoi nauk nahathero na. ⁴¹ Karik ara iringak iye ohoremok adohoro attitto hasong d’amaji nalam, indohok amaji nalama ne. ⁴² Ara ifiyo othulo loboling aning nabo thohoi, isarak donyong aning ne. Ara owak lobo attoboro aning nabo thohoi, isarak thotoboro.

⁴³ “Ethuk iye ethaninguna hijan ajyori, ‘omunoi holoimotte, omunoi omerok hohoi.’ ⁴⁴ Ti, thene anyahi nang iye: omunoi omerok hohoi ara iye imojyo th’ohothing thoho ithathacianio iye. ⁴⁵ Diwon ithai ara okalifinok h’Omonye lothai di paradiso. Aca, isarak inyong oholong lonyong thowuloi d’ohothing homonyong karik hoyyu see, karik isarak ohuju d’ohothing hoihandyo ara nayyu karik hoihandyo ara namonyong. ⁴⁶ Anyo ira iye Ojok isoryo, ara imuno iye ti ohothing homuno iye? Ihandyo dang ohothing ohoiduduhak h’enyahwo h’elulung ahanya! ⁴⁷ Karik ara icama iye ti d’omorot hohoi, ojyo ehandyo iye aning nabo iring nayeng na? Juk ohothing haang otek Ojok, ihandye ahani! ⁴⁸ Iye thobisa tiorr – iring nabisarik Leemonye lotho paradiso tiorrr.