Ebwayit 4
1
Thiya Ohoile ethadiraru Yesu di terere di thema tho Sitan.
2
Diholu operok karik ohariethik athomone arangwan kwong anyari, aleng ahure Yesu.
3
Thiya Sitan aindu donyong ajyo, “Ara iye olonyi l’Ojok, iloicye omorik hulo ara anyari.”
4
Ti, Yesu etharangyo, “Ojyo amanini, ‘Aang ohothing isu th’anyari hamaring, ti, owahi dang ocamitha thohuthuk h’ Ojok.”
5
Thiya Sitan eyaru Yesu di Yerusalem, abore nadwa, alo isarahina inyong dihide h’otek la Tempolo,
6
karik ajyo donyong, “Ara iye olonyi l’Ojok, omirok ahwan nahoi dihap, anyo, ojyo amanini, ‘Ifahak de Ojok anjelohio honyong dohoi tho iye; indefuni de iye dihide th’ahas thahasong, tek, juk ahejek hahoi, omorik eryafuni.’”
7
Yesu etharangyo, “Ti, ojyo ikoti amanini, “Hoithemyo Ohobu, Ojok lohoi.’”
8
Thiya Sitan eyaru Yesu dihide h’odonge lohodo bebe, ethaithak donyong ohobyehio h’ahap dith’abolori bukulung nasong.’”
9
“Asang hune fodok esarak nang de dohoi,” ajyo Sitan, “Ara irigong iye dihap ara iye imojo donang.”
10
Thiya Yesu etharangyo inyong, “Ilo adi, Sitan! Ojyo amanini, “Omojyo d’Ohobu, Ojok lohoi, karik ara iye igyema donyong hamaring.’”
11
Thiya Sitan edyaharu Yesu. Ara anjelohio afuni, alwahye inyong.
12
Ethaninguna nya no Yesu hijan Yoanne lefithahini ara lefithahini, alo adi di Galilea.
13
Edyeharu Nazarete, alo isuka di Kapernaum, abore naindek d’ajor no Galilea di hap ho Zebulun karik Naphtali.
14
Ofuk ahani, dofuni arami hanya ojyo ohocoroni Isaya huna ifuna ara hadiri.
15
“Ahap na Zebulun karik ahap na Naphtali, d’oyihoi lolo di hari, d’oyirik lobo lo Jordano, Galilea, ahap n’ohothing hoikela th Ojudei!
16
Otehu de ohothing hoisuka di mudwe afangan nabolo, d’ohothing hoisuka d’ahap karik obibile l’aye, odotho de afangan.’”
17
Th’omiru hule, aculuyo Yesu etyenio ocame lonyong: “Iloithothik adi th’eyatha hathai, anyo, aindek ohobye lothohide!”
18
Adaha nya nanyong di fohor h’Ajor no Galilea, atehu Yesu olarok arehai ohoirerehak h’ohom, Simone, loilongoi ara Petro, karik olai Andrea, diyapoha ohom dith’ajor th’abwuoi.
19
Yesu ajyo dosong, “othifunethek nang diwon ithai ara ohoyapoyak h’ohothing.”
20
Yelek ahani, edyaharai abwoino hasong, afwoi honyong.
21
Alo indehai ahani, atehu olarok homok arehai, Yakobo karik Yoanne, olonyirok ho Zebedeo. Owoni nya di rook hosong ho omonye losong Zebedeo, dihuhumahina abwoino hasong, Yesu ilongo isong,
22
karik kwak ahani, edyaharai aroko karik omonye losong, karik dang afwoi honyong.
23
Alo Yesu athwa no Galile fodok dityenio ditha h’asynagohio dityenio Asayo Angejuho h’Ohobye, karik dithalihyo ohothing howoni h’opeceni h’adihathik olwarai.
24
Athuroro asayo hanyong ditha h’amiji fodok no Syria, hathi iyanai nya donyong ohothing hodiha, ethathacyanai th’opeceni h’adihathik, haye arabokang karik h’ahahe, Yesu ethalihyo isong fodok.
25
Elulung nahittok n’ohothing athiforo inyong tho Galilea, d’abothok tomon, tho Yerusalem, Judea karik d’ahap d’oyirik lobo lo Jordano.