¹ Th’omiru hule aindu Yoanne Batista di terere ho Judea, aculuyo anyahina ohothing ehandio n’arami hayyu hahabis. ² “Iloithothik adi th’eyatha hathai,” ajyo inyong, “anyo, aindek ohobye lothohide.” ³ Yoanne nya othulo locama ohocoroni Isaya, najararik inyong, “Othulo lobo lelolongo di terere, ‘Ihuhumyethek oyihoi d’Ohobu; ihuhumahina oyihoi ara lobis d’odaharik inyong.’”

⁴ Abongoitho ho Yoanne nya hehuhumuni th’ohofir h’akonikoni, iyofoitho erohit amuhunyong di mukok, larik anyari nanyong nya ebeye karik aiso narimahini caa dith’ofara. ⁵ Afuni ohothing donyong tho Yerusalem, th’amiji fodok no Judea karik th’amiji fodok naindek d’owor lo Jordano. ⁶ Ewaha ohothing eyatha hasong, abuhohini isong Batisimo ditha h’owor lo Jordano. ⁷ Atehuna no Yoanne Ofarisei karik Osadducihio afuna donyong do Batisimo, ajyo dosong, “Ithai amunuok – ngai ojyo ocohi dothai dikarahina asario nalo Ojok ithai isulahina ne? ⁸ Ihandyethek asang hethaithak hijan ethuk ithai eloitho adi th’eyatha hathai. ⁹ Karik hoigigilothik hijan ocohi dothai dikarahina asario th’ajaran thanthai Abramo, ohohonyi lothai. Anyahi nang ithai hijan ocohi d’Ojok diduhuna omorik hulo eloicyo ara anyakwarya h’Abramo! ¹⁰ Otholu leririyo ayefyo n’oyandik th’ohade. Ohiyani laang ongida ahayo, oyefahini de dihap, amirohini d’ahimang. ¹¹ Abuhok nang ithai batisimo th’ahari, dithaithahina hijan eburunu ithai d’eyatha ahathai, ti, loindu diholu honang le, oindu de ibuhohina Batisimo th’Ohoile tho Lodwa karik ahimang. Obolo inyong thonang, karik aang dang ocohi donang dihoyo ahamuha hanyong. ¹² Owon inyong lo hattitto hanyong hekisyerek ohima. oindu ingongothohina ohima honyong di koro, ti, oindu de idwehina engayohi ditha h’ahimang naang odunya.”

¹³ Th’orii le edwong Yesu di Galilea, oindu do Yoanne dibuhohina inyong Batisim d’owor lo Jordano. ¹⁴ Ti, Yoanne athemyo esarahina Yesu thoiloicye ahu nanyong, “Aca, iye kodien esarak nang Batisimo, Yoanne ajyo, “Ara iye ikoti iindu donang?” ¹⁵ Ti, Yesu etharangyo, “Thoiwona ahani th’orii lya,” Aca th’oyihoi tholya, ehandyo de asang fodok hawak Ojok.” Yoanne eruhok arami hune. ¹⁶ Athuhon no Yesu efothuna Batisimo, aindu kwak adi thath’ahari. Thiya, angai paradise donyong karik atehu Ohoile l’Ojok oindu dihap iring ayoro h’afangan donyong. ¹⁷ Thiya, oilolonge ajyo tho hide, “oitho hindang lo holefeng loko, amuno nang thonyong.”