¹ Oyisuni nya Yesu di bore ho Bethlehem di Judea, d’omiru howonderek Erode ara ohobu. Kwak ahani, afuni ohothing homok hoiyeyena ohilyefi tholo moithe di Yerusalem, ² karik efiye, “D’amaji nani othamanai oitho, lowon de ara ohobu lo’Ojudei lo? Etehu ohoi ohilyep lonyong ainduna nanyong dihide tholo moithe, karik ifunu ohoi di mojo donyong.” ³ Ethaninguna n’Ohobu Erode arami hune, engere bebe, iring dang nengerejarik ohothing fodok di Yerusalem. ⁴ Ethalongo Erode d’amaji aboithe ho fadiri hohittwak karik ohoityenak h’oyalu, efiyo isong, “Dingai de ofuni iyisuna Kristo?” ⁵ “Di bore ho Bethlehem, di Judea,” isong etharangyo. Isong hune arami hegeryo ohocoroni:

⁷ Thiya, Erode elongo othohomonok hofuni tholo moithe d’oputet laang onyahini dindak karik dirimahina thosong tuhudik omiru holyeyororik ohilyep. ⁸ Thiya, asulak isong di Bethlehem ajyo, “Ifwatha karik othifeyethek oitho tuhudik; ara erimak ithai inyong, awak nang atehan, dallo nang dang di mojo dihithemi honyong.” ⁹ Afwoi, dihiji h’oyihoi, atehuni ohilyep lodwo otehu isong oindu tholo moithe lo. ¹⁰ Atehuna nasong ohilyep, amunoi nya bebe tholohide amuno! Alo ohilyep ahithemi nasong tok awetha tholohide h’amaji nayisunerek oitho na. ¹¹ Othohomonok hulo ajingari dihang. Atehuna nasong oitho hahathing nanyong, Maria, afwoi, arigongoi dihap karik amojyoi donyong. Eduhye isong hulo dindak esoritha hasong h’ayel, alothogong karik ahamurwe, ethafothohini donyong. ¹² Thiya, anyahari isong di miji hosong th’oyihoi tholoboling, anyo, anyahi isong Ojok thaang honyahai d’Erode.

¹³ Athuhon nasong afwan, aleyo anjelo l’Ohobu ditha etharika do Yosefo, ajyo, “Othifeyo de Erode oitho ara lottohori. Odothoi, iduhu oitho karik ahathingi, engerotho dd Egypto, lwai nang anyahina iye thoidehi amaji nya ara iye inyahu.” ¹⁴ Yosefo adotho, eduhu oitho hahathingi, alo th’aharie di Egypto. ¹⁵ Esuka diya lwai aye n’Erode. Ihandye nya ahanya, dofuni arami hanya athuk Ohobu acama thol’ohocoroni ara hadiri, “Elongo nang oitho hindang adi Th’Egypto.”

¹⁶ Atehan n’Erode hijan athuk inyong othohomonok hofuni tholo moithe eitum, engere bebe. Efahak ahuthuk hijan okalifinok ho Bethlehem karik h’amasok haindek, hara oyingathik arehai, thottohori ehandye arami hune iring arami h’ethairu inyong th’othohomonok honyahi inyong omiru holeyororik ohilyep. ¹⁷ Th’oyihoi tholoya awoni ara hacama ohocoroni Jeremiah ara hadiri, ¹⁹ Diholu h’aye n’Erode, aleyo anjelo l’Ohobu ditha h’etharika do Yosefo di Egypto. ²⁰ ajyo, “Iduhu okalifonik karik ahathingi, ilo dihap ho Israele, anyo, ohothing honya owahi attohoro oitho hulo athuhi ayetha.” ²¹ Yosefo adotho, eduhu oitho karik ahathingi anyaha di Israele. ²² Ti, ethairuna no Yosefo hijan aruthak Arkelaus omonye Erode, ara ohobu lo Judea, abang anden diya. Anyahini inyong koti ditha etharika, alo hathi d’amiji natti no Galilea. ²³ aduho ahang di Nazareth. Ahani ne, awoni arami hanya acama ohocorok ara hadiri, “Ofuni de ilongo inyong ara Nazarene.”