¹ Niyenjira muliaro niyambukha niyola mwitookho liabwe. ² Ne lola bamurerera omundu wakwa likara, nakonire khushitanda, ne Kristo olwa yalola obusubiri babwe, yabolera omulwale wakwa likara mbu, mwana wanje lema omwoyo, omalire okhulesherwa tsimbitsio.

³ Ne lola abandi khubahandichi nibaboola mumioyo chiabwe, omundu uno niwokhwikatia. ⁴ Ne Kristo namanyire amapaaro kabwe naboola, muparaanga amakhuwa amabii mumioyo chienywe mbushiina? ⁵ Shichira eliangu liiri hena? okhuboola mbu omalile okhulesherwa tsimbi tsitsio nohomba okhuboola mbu bukha ochende? ⁶ Ne mbu kho mumanye shinga omwana womundu ali nende obunyali mushialo okhuleshera tsimbi naboolera likara mbu buukha, bukula omutokwo ne otsie munzumwo. ⁷ Ne nabuukha natsia nanzuwe. ⁸ Ne butswa olwa abomukanda balola, bahukana ne nibetsoomia Nyasaye, owahaana obunyali shingana buno khubandu.

⁹ Ne olwa Kristo yali narulireyo, yalola omundu oulangwa mbu Matsayo niyekhaale aha basololelanga obushuru, ne namuboolera nondakhwo, ne naye nasinjira namulondakhwo. ¹⁰ Olundi olwa yali niyekhaale nali khubilibwa munzu, lola, abasololi bobushuru abanji nende abonooni betsa nibekhala hasi ninaye nende abechibe.

¹¹ Ne olwa abAfarisayo balola bario, baboolera abechibe shichira shina aliitsanga nende abasololi bobushuru nende abetsimbi?

¹² Ne olwa Kristo yahulira, yababoolera mbu, abakololofu shibenya omufundi ta, ne halali balia abalwale. ¹³ Nebutswa tsie ne mweche eshisina shielikhuwa lino, 'ndikoomba tsimbabasi tawe omusango,' shindayitsa okhulanga abalunjishi ta, habula aboononi bahonibwe.

¹⁴ Mana abeechi ba Yohana nibamwitsira nibamureeba mbu, shichira shina efwe nende abaFarisayo khuhonganga inzala ne nabo abeechibo shibahonganga ta?

¹⁵ Naye Yesu nabakalusia mbu, kanyalikha abeshiselero okhwikhuula, olwa mwene eshiselelo aba nashiri ninabo? Nebutswa tsindaalo tsiakhale etsia mwene eshiselelo yakhayiinibwe mubo, ne bulano nibahonga inzala.

¹⁶ Abulaho ounyala okhura eshilaka shieingubo imbia khungubo ikhulu ta, okhuba eshilaka eshiyia eshiikalaho shiakharandula ingubo, omuluhu okwo nikwimeeta. ¹⁷ Kata abandu shibatsukhanga idivai imbia mutsichupa tsikhulu ta, shichira tsichupa tsiakhaatikha ne idivai isundukha, netsichupa tsisasikha. Ne halali bareetsanga idivai imbia mutsichupa tsimbia, ne biosi bibikhwa obulayi.

¹⁸ Olwa yali nashibasunjira, lola, yaruliraho Omuruchi mulala namwinamira naboola mbu, omukhaana wanje umalire kata okhufwa, halali yitsa omurekhwo omukhono ne naye alamenya. ¹⁹ Ne Kristo nabushiramwo namulondakhwo ne abeechibe boosi nibakhola bario. ²⁰ Ne lola, omukhaye mulala owali nende omunyakhano kwokhwirulutsa amabanga khumiyika ekhumi nende chibiri, yarulira inyumawe natiira khwichemo lieikanzuye.

²¹ Niyeboolera omwene mbu, nindakhanyalirwakhwo okhutiira khukanzuye nditsa okhuba obulayi.

²² Ne Kristo nashiukhana namulola namuboolera mbu; wiheresie amani, obusubiribwo bukhukholere okhuba omulakhule, ne omukhasi nahona okhurula eshise eshio.

²³ Ne Kristo niyenjila munzu wOmuruchi nalola aboopi bamalele nende Omukanda nikukhupanga obuyoka. ²⁴ Ne nababoolela mbu, mberesie obwiyango khulwa okhuba omukhaana uno shafwire ta nebutswa ali mutsindoolo ne nibamutsesherela mubukokonyi. ²⁵ Ne olwa omukanda kwamuheresia obwiyangu, yenjira nende okhumurakhwo omukhono, ne omukhaana nabuukha. ²⁶ Ne amakhuwa kamanyikhana mwitookho elio liosi.

²⁷ Ne olwa Kristo yarula, ababofu babiri nibamulondakhwo nibaliranga nibaboola, Ewe Omwana wa Daudi, khubeere tsimbabasi. ²⁸ Ne olwa yoola munzu ababofu babili nibamwitsira, Kristo nababoolela mbu, musubira mbu enyala okhukhola kano? nibakalusia mbu kali kario Omwami.

²⁹ Ne namala natiira khutsimoni tsiabwe, naboola, okhulondokhana nende obusubiri bwenywe kekholeshe kario. ³⁰ Mana tsimoni tsiabwe nitsilaba, ne Yesu nababoolera shilunji nabalachirisia mbu shibalaboolerakhwo omundu yesi ta. ³¹ Halali nabo olunyuma lwokhurula batswania ifumaye mushialo eshio shiosi.

³² Ne olwa bali nibarulanga, lola, bamuleerera Omundu omusiru owali niyetsulwemwo amatimoni. ³³ Ne olwa litimoni liali nilirusibwe, omusiru yaboola ne abemikanda nibahukana ne nibaboola kashiri okhwikholekhakhwo kario muIsraeli.

³⁴ Ne halali abaFarisayo nibaboola mbu, alondanga amatimoni okhubirira mubunyali bwomwami wamatimoni.

³⁵ Ne Kristo nachenda mumatookho kosi nende amataala niyechesia musinagogi niyerwatsanga injili yoburuchi, nahonia amalwale kosi nende obuteshere khubandu bosi. ³⁶ Ne olwa yalola abemikanda, yabalolera tsimbasi shichira bali nibawererelanga ne nibakabukhane shingana amakondi kabula omwayi. ³⁷ Ne naye nababoolera abeechibe mbu lichesa nelinji halali abachesa nabatiti. ³⁸ Kho saaya mbu Omwami webichese alaruma abokhuchesa mwichesalie.