¹ Ne olwayali niyakhalanga abeechibe ekhumi na babili, yabaheeresia obunyali khubaroho beshifwabi, okhubainia nende okhuhonia imero yosi yamalwale nende obuteshere bwosi. ² Ne kano niko ameera kabarume abo ekhumi nababili, wambeli yali Simoni owalangwa mbu Petero nende omusiani wabwe Andereya, Yakobo omwana wa Zebedayo nende Yohana ouli omusiani wabwe. ³ Filipo nende Batsolomayo, Tomasi nende Matsayo omusololi wobushuru, Yakobo wa Alufayo nende Tsadayo. ⁴ Simoni Omukananayo nende Yuda Isikarioti owamukhoba Yesu.

⁵ Abo ekhumi nababili nibo ba Yesu yaruma mbu, shimulalonda khunjila yosi eyitsia mumahanga noho okhwinjila mwitookho liosi liosi lia abaSamaria tawe. ⁶ Nebutswa nobulayi mukatsiire amakondi munzu ya Isiraeli. ⁷ Ne nimuba mutsia mwirwatse ni mubola mbu obwami bwomwikulu bumalire okhula. ⁸ Muhonie abalwale, mubatsienule abobuchere, mulamusia abafuu, mulonde ebishieno, munyolere eshikhaya muhane eshikhaya. ⁹ Shimulabukulekhwo itsahabu kata ifetsa noho amapesa mumifuko chienywe ta; ¹⁰ Shimulachingakhwo omufuko kwokhusuma khuluchendo kata tsingubo tsindi kata ebilaaro, kata irabushi tawe. Shichila omukholi wemilimo akhoyeele okhuhebwa ebiokhuliabie. ¹¹ Ne mwitookho liosi kata mwitaala liosi eliamwinjilamwo mukhabiremwo oukhoyere mana mumenye ninaye okhula olwa namurule. ¹² Ne olwa mwinjila munzu mubashiesie omulembe, ¹³ Ne nikaba mbu inzu iyo ikhoyere, leshe omulembe kwenywe kube halala ninayo, ne niba ilakhoyere ta omulembe kwenywe kutonye ninenywe. ¹⁴ Ne ulia oulabenjisia ta, nalahulila amakhuwa kenywe ta, olwa muba murula munzu eyo, muteng'ulule olufu lwokhubilenje bienywe. ¹⁵ Emubolera toto mbu amakhuwa kalibaho amangu khulwa eshibala sia Sodomu nende Gomora khunyanga yeshiina okhushila shinga lwakalibera litaala lienelo.

¹⁶ Ne lola, ebaruma shinga amakondi hakari webitsusu, mube abachesi shinga inzokha khandi abaholo shinga amahuusi. ¹⁷ Ne mwirecheshe khukabandu shichira balamutiira nibamuhira mubiina, nibamunywekha mutsisinagogi tsiabwe. ¹⁸ Khandi mwakhairwe imbeli wabaami, abaruchi nende amahanga khulwasie mbu mube aburumbusi khubo nende abamahanga. ¹⁹ Ne olwa bamureera mushiina shimulahenda mbu mulaboola shiina noho mbu namuboole murie tawe, olwa ebise biula mulahebwa akamubola. ²⁰ Shichila shimuli inywe abalaboola ta habula Roho wa Senywe niye oulaboolera mwinywe. ²¹ Ne abasiani bomunzu ndala balakhobana abeene khubeene okhula okhwirana, ne papa khumwana bario khubaana babwe, abaana nabo balabushira khubebuli babwe nibachijra beerwa. ²² Nenywe mulasirwa nende abandu bosi khulwa elira lianje, ulia owisumirisia okhula mubumalilishi alahona. ²³ Ne olwa muba musakanibwa mwitaala, mwirushile mulindi shichila ebabolera toto mbu muliba nimushili okhumalilisia amatala kaIsiraeli ta okhula olwa omwana wOmundu aliba niyetsa.

²⁴ Omwechi shiashila omwechesiawe ta, kata Omusumba shiashila Omwamiwe ta. ²⁵ Kamuhela omwechi okhuba shinga Omwechesiawe kata Omusumba okhuba shinga Omwamiwe ta. Kho nibaba nibalanjile oweinzu eya Belizebuli, ne shibalanga abomungowe bario?

²⁶ Khulwesho shimulabaria ta shichila libulaho eliafunishilwa elilafunuulilwa ta, kata eliabiswa elilalolekhana ta. ²⁷ Akebaboolera mushilima mukaboole habulafu ne akamumonyelwa mushirwi mukarumbule ebulafu. ²⁸ Shimulariitsanga abeera omubili, ne nibalanyala okhwira Omwoyo ta, Habula muritsenje ulia ounyala okhusishia biosi; Omwoyo nende Omubili mujehanamu. ²⁹ Okhuba onyala okhukula tsiminyi tsibili isendi ndala, nebutswa kata Iminyi ndala shiyinyala okhukwa hasi ahalali okhwenya khwa Senywe tawe. ³⁰ Ne butswa inywe kata liswi liokhumirwe chienywe liosi liabalwa. ³¹ Kho shimularitsanga ta shichila inywe mushila tsiminyi tsinyinji. ³² Kho buli mundu oulanziyama imbeli wabandu nasi siesi ndakhamwiyame imbeli wa Papa wanje ouli mwikulu. ³³ Ne butswa yesi yesi ounzikaana imbeli wa abandu nasi siesi ndalamwikaana endio imbeli wa Papa ouli mwikulu.

³⁴ Shimulapare mbu ndeetsa okhurera omulembe ta habula olukanga. ³⁵ Shichira ndetsa okhureera obukabukhani hakari wOmwana nende Samwana, Omukhaana nende nyina, Omukhasi wOmusiani nende nyakhufialanyene. ³⁶ Ne abasuku bomundu balaba abeinzuye beene. ³⁷ Yesi ouheelanga Samwana noho nyina okhushila isie shiakhoyere esie ta, yesi ouheela Omusianiwe noho Omukhanawe okhushila esie shiakhoyere ta. ³⁸ Yesi oulabukula omusalabakwe niyanondakhwo shiyangwanila isie ta. ³⁹ Yesi outeema okhuhonia obulamubwe alabukosia, nebutswa ulia oukosia obulamubwe khulwanje, alabunyoola.

⁴⁰ Omundu yesi oumwinjisia inywe, yanzinjisia isie ne yesi ounzinjisia isie amwinjisia oyo owaruma. ⁴¹ Yesi owinjisia omulakusi owOmwami shichila mbu nomulakusi, alanyoola omurungo kwomulakusi oyo. Ne yesi owinjisia Omulunjishi shichila mbu nomulunjishi alanyola omurungo kwobulunjishi. ⁴² Khandi omundu yesi oulamuheeresia mulala khubatutu bano kata eshikombe shiamatsi amanyifu shionyene, mbu anywe mulira liomweechi, emuboolera toto mbu shialachweya okhunyoola omurungokwe kata nahatutu ta.