¹ Ne olwa Yesu yali niyakhabalachirisia abeechibe ekhumi nende babili, yarula natsia okhwechesia nende okhukamba mumataala kabwe.

² Olwa Yohana yahulira nali mumboye emilimo chia Kristo yaruma abechibe okhureba, ³ mbu niwe owiItsanga nohomba khulindirile oundi.

⁴ Yesu nakalusia, "kalushe ewomurulile mana muboolere Yohana akomuhulile nende okhulola: ⁵ Ababofu banyoola okhulola, abalema bacheenda, balia abobuchele bosibwa, abasiru bahulira, abafu basimulukusibwa, nabo abamanani bahulila amahandiko ka amakhuwa amalayi. ⁶ Noweikhabi yesi ulia oulesichirala khulwa esie tawe."

⁷ Abandu bano libali nibakharula okhutsia, Yesu yachaaka okhuboolela emikanda khu Yohana, olwa mwatsitsanga mushitsimi mwatsitsanga okhulola shi- litundu eliresibungwa nende omuyeka? ⁸ Halali mwatsitsanga okhulola shi - omusatsa owifwalile tsingubo tsindorotoro? lola, ebefwalanga tsingubo tsindorotoro bali mutsinzu tsia abaruchi. ⁹ Habutswa nenyu mwatsia okhulola shi- omunabii? Ee, emuboolera, khandi nomukali okhushila muno omunabi. ¹⁰ Uno niye, owamahandiko kamuboola, lole, eruma omurumwa wanje imbeli uuwo, owitsa okhukhukasilia injira.

¹¹ Emuboolera obwatoto, mbu muinywe abebulwa nende omukhasi ashili okhubaho omundu omukali okhushila Yohana Omubaatisi; halali ulia ouli omutiiti mubwami bwomwikulu nomukali okhumushila. ¹² Khandi okhurula mutsinyanga tsia Yohana Omubaatisi, okhuula bulano, obwami bwomwikulu bukhabwa namaani, nabo abamahababa balabwitsuumba namaani. ¹³ Shichila abanabi bosi nende amalako bali nibalakulalanga okhula ebise bia Yohana. ¹⁴ Ne nimuba nimwitsa okhwiyama, uno niye Eliya owitsa okhwitsa. ¹⁵ Ouli namarwi akokhuhulira ahulire.

¹⁶ Halali enjeraasie nende shina olwibulo luno? bafwana shinga abaana bekhala mushiro khandi nibalanjirisia abashiabo. ¹⁷ Khandi baboola mbu khubakhuupiire lilele ne shimushinire ta, khwikhulire nenyu shimulile ta. ¹⁸ Yohana shiyeetsa nalitsanga omukate nanywetsanga idivai tawe, nabo baboola, 'ali nende litimoni.' ¹⁹ Omwana wOmundu yetsa nalia nende okhunywa nabo baboola, 'Lola, shingana ali omundu omuwuoru khandi omumeesi, omulina owabasololi bobushuru nende abakholi betsiimbi!' Halali obuchesi bubalirwa obulunjishi mubikholebie."

²⁰ Yaho yamala nachaka okhukondoshera amatookho kamangalimwa kali nikekholeshemwo shichira shibayekanira tawe. ²¹ Wowe khwinywe, Korazini, owe khunywe Bethsaida! shichira amangalimwa kekholeshe munywe kalekholekha Tiro nende Sidoni, bakhekaanire khukhufwala amakunia nende okhibakha amakoshe. ²² Halali ebaboolera mbu kalibakhwo amangu khu Tiro nende Sidoni khunyanga yobuyaasi okhushira inywe. ²³ Nawe, Kaperenaumu, witsa okhuchingulwa okhuula mwikulu, witsa okhwishibwa okhuula emakombe; nikaba mbu amangalimwa kekholekha khuinywe kekholekha Sodoma, bakhabereho okhuula inyanga ino. ²⁴ Halali ebaboolela inywe mbu ketsa okhuba amangu nende Sodoma khunyanga yeshinyaasio okhushira inywe.

²⁵ Khubise yibo Yesu yakalusia naboola, ekhuupira orio, e Papa, Omwami womwikulu nende eshialo shichira obisire amakhuwa kano okhurula khubachesi nende abamanyirisi, ne nokafimbula khubaana. ²⁶ Kario Papa, nendio kachamisia mumoni tsio.

²⁷ Amakhuwa kosi kahanirwe khusie nende Papa; khandi abulaho oumamanyile Omwana ta, halali Papa, khandi oumanyile Papa ta halali Omwana, ne yesiyesi womwana achama, amufunulila. ²⁸ Yitse khuisie, inywe mwesi abasitoherwe nende emisiko emisiro, nasi nditsa okhubahulusia. ²⁹ Mwifwale likokolo lianje, mweche khwisie, shichira esie endi omuholo nende omuhotseresi wemioyo; ne mwitsa okhunyoola obuhulushi mumioyo chienywe. ³⁰ Shichira likokolo lianje nelilayi, omusiiko kwanje nakwo nomwangu.