¹ Ne olwa yakholomokha okhurula khushikulu, omukanda omukhongo kwamulondakhwo. ² Ne lola owobuchere undi yamwitsira namwinamira namubolera mbu, Omwami, noba nochama onyala okhusiiya.

³ Ne Yesu nanyiira omukhonokwe, namutirakhwo nabola mbu, enjamire siiyikha. Yaho yaho obucherebwe nibusiiyikha. ⁴ Ne Yesu namubolera mbu, lola sholamubolera yesi yesi ta, ne halali tsia wilolesie khumukuhani ne ohane eshihanwa shia Musa yalachirisia shibe obuloli khubo.

⁵ Ne olwa Yesu yenjira Mukaperinaumu, Omusesia undi namwitsira namusaaya, ⁶ naboola mbu, Omwami Omukholi wanje akonire mungo akwile likara ne atsunwa muno.

⁷ Ne Yesu namubolera mbu, nenzitse okhumuhonia.

⁸ Omusesia namukalusia naboola mbu, Omwami shengwanire mbu witse winjire hasi weshilama shieinzu yanje ta, ne halali rumbula butswa likhuwa ne omukholi wanje alahona. ⁹ Shichira endi omundu ouli hasi wamalako, nasi endi nende abasikari abali hasi wanje; nemuboolera mulala tsia natsia, ne oundi mbu yitsa yetsa, kata nende Omukholi wanje mbu khola lino nakhola.

¹⁰ Ne olwa Yesu yahulira yahuka muno ne nababoolera abali nibamulondangakhwo mbu tooto mwene emuboolera, eshiri okhulolakhwo obusubili obukhongo shingana buno tawe kata muIsiraeli ta. ¹¹ Ne ebabolera mbu abanji bakhetse okhurula ebukwe nende mumbo, ne nibekhale hasi nende Aburahamu khandi Isaka, khandi Yakobo, Muburuchi bwomwikulu. ¹² Nebutswa abana boburuchi bakhasukunwe erwanyi mushirima, eyo khulibayo okhulira nokhulumaasia ameno. ¹³ Mana Yesu namuboolera Omusesia tsia butswa ne kekholeshe shingana olwa osubiile, ne omukholiwe nahona khushise shienesho.

¹⁴ Ne olwa Kristo yola munzu ya Petero, yalola nyakhufialanyene Petero niyeyalisiye nalwala omurengo. ¹⁵ Yesu namutira omukhonokwe ne omurengo nikumulekha nabukha nabakhalabanira.

¹⁶ Nolwa bwera, nibamurerera abanji abali nibetsulwemwo amatimoni, nakakondoshera amaroho yako nende olukangalwe, ne nabahonia bosi abali nibalwala. ¹⁷ Mbu kanyole okhusibwa akali kalakulwe nende omulakusi Isaya naboola mbu Ye mwene yabukula obuteshere bwefwe niyetuukha amalwale kefwe.

¹⁸ Nebutswa olwa Kristo yalola omukanda omukhongo nikuli ahambi ninaye nabaheresia lilachirisio liokhurula okhutsia olucherekha lundi. ¹⁹ Ne omuhandichi mulala yamwitsira namuboolera mbu, Omusomesia ndalakhulondakhwo hosi hosi aha olatsia.

²⁰ Nababoolera mbu, amabwe kali nende obwiina ne nako amayoni kali nebiitsu, halali omwana womundu abula hosi wokhura omurwe.

²¹ Ne mulala khubeechibe namuboolera mbu, Omwami, chama wukhole omulakhule enzie emuyabire Papa.

²² Ne halali Kristo namuboolera, nonda esie ne oleshe abafuu bayabirane.

²³ Olwa yenjira muliaro ne abeechibe nibamulondakhwo. ²⁴ Ne lola imbumbuyeka ingali niichaka okhuhutsa munyanza okhuula amarunda nikafunikha eliaro, halali naye yali mitsindoolo. ²⁵ Ne abeechibe bamwitsila nibamubuusia nibamuboolera mbu, Omwami khuhonokosie, khukhonye khutiibanga.

²⁶ Ne nababolera mbu, oburii burula heena? enywe abobusubiri obutiti? Ne nabuukha nakondoshera imbumbuyeka nende inyanza ne khubaho nende obwihotselesi obukhongo.

²⁷ Ne abandu nibahukana, nibarebana mbu, uno nomundu okhurula hena mbu, kata imbumbuyeka nende inyanza bimuhulira?

²⁸ Nolwa yali niyetsa olucherekha lundi eshialo shia Gerasi yabukaana nende abandu babiri abali nibetsulwemwo amatimoni nibarula mutsing'ani abahalaba muno mbu, omundu yesi shiyakhaburire khunjira eyo ta? ²⁹ Ne lola, bayula nibaboola mbu; obeele oriena ninefwe Yesu (Kristo) Omwana wa Nyasaye? witsire okhusaakania ebise nibishili? ³⁰ Ne khwaliho neinjira yindi yokhukarusia mubo okhutsia mumatuuli ketsingurwe tsiali tsiayanga.

³¹ Kho amatimoni nikamusaaya mbu, noba nokhusakania khurule, khufuchilire efwe khwinjire mumatuuli ketsingurwe.

³² Ne nakaboolera rule! ne olwa karula kenjira mumatuuli ketsingurwe, ne lola amatuuli kosi ketsingurwe kerukha nikakhupa obuyoka obunji nikakholomokha munyanza nikafiiramwo. ³³ Ne abanji berukha nibakalukha mumatookho kabwe, ne nibahaana obulosie bwa bulishindu shiekholekha khu balia abamatimoni. ³⁴ Ne lola litookho liosi liarula niliitsa okhwakaana nende Kristo, ne nibamulola bamusaba mbu arule mushialo shiabwe.