¹ Shimulakhalaka eshiina ta, neenyu shimulakhalachirwa eshiina ta. ² Okhuba obukhalachi bwamurumushila okhuyaasia, nende eshichero shiorumushila okhuchera, nishio eshitsa okhurumushirwa okhukhucherera. ³ Shichila shiina ololanga akhakokha mumoni yomusiani wenywe, nawe shiomanyilisia eshirundu shili mumonimwo? ⁴ Wakhabiira oriena omusiani wenywe, lekha ekhuyiinie akhakokha khali mumonimwo, olwa eshirundu shili mumonimwo omwene? ⁵ Eywe owikaati! Ranjilira oyiinie eshirundu shili mumonimwo, kho obe ounyala okhulola obulayi nokhurusia akhakokha mumoni yomusiani wenywe.

⁶ Shimulabukula shilia eshitsienukhu mwahelesia tsimbwa tawe, khandi shiolabukula **emikasa** chienywe mwasukuna imbeli wetsimbitsi tawe. kalali kario tsilasenakana mubilenje, mana tsikalushe tsikhurandule mubitonye.

⁷ Saba, olahebwa, khaaba, nawe olanyoola, khong'onda, olekulirwa. ⁸ Okhuba ulia yesi ousaba alahebwa, yesi oukhaaba alanyoola, oukhong'onda alekulirwa.

⁹ Nohomba niwina khwinywe owomwanawe alamusaba omukaate, namuheresia lichina? ¹⁰ Nohomba nasaba inyeni, amuheresie inzokha? ¹¹ khulwa yako, enywe bali ababi mwamanya okhuheresia ebihanwa ebilayi khubaana benywe, nikabe kariena akokhushira mbu Senywe womwikulu anyala okhumuheresia ulia oumusaba ebindu ebilayi?

¹² Khulwa yako, ebindu bilia ebia owenya abandu bakhukholere, okhuula wesi obe nobakholeranga, lino nilio lilako nende obunabii.

¹³ Injira okhubilira mushilibwa eshinyerere Okhuba eshilibwa eshibambalifu shitsia mubusasishi, nabo abandu babilirakhwo nabanji. ¹⁴ Halali eshilibwa eshinyerere khandi injila yinyerere yitsia mubulamu, nabo nibatiti abachinyoolanga.

¹⁵ Mube meso khubanabi abobubeyi, abamwitsilanga nibefwalire tsingubo tsiamakondi ne mukari mwabo nebisuutse ebihalaba. ¹⁶ Mulabamanyira khubiamo biabo. Abandu banokanga emitsabibu khubisisia nohomba amakhuyu khuminyenya? ¹⁷ Mumera yeneyo, buli omusaala omulayi kwama ebiamo ebilayi, nakwo omusaala omubi kwama ebiamo ebibi. ¹⁸ Omusala omulayi shikunyala okhwama ebiamo ebibi tawe, nohomba omusala omubi okhwama ebiamo ebilayi tawe. ¹⁹ Buli omusala okulaama ebiamo ebilayi tawe kularemwa kukwe mana kusukunwe mumuliro. ²⁰ Kario, mulabamanya Khulwa ebiamo biabo.

²¹ Shibali boosi abambooleranga mbu Omwami, Omwami, abalinjira mubwami bwomwikulu tawe, halali ulia yenyene oukhola elienya lia Papa wanje ouli mwikulu. ²² Abanji bakhambolere khunyanga yiiyo, Omwami, Omwami, shikhwahana obunabii muliralio, nende okhulonda amatimoni khandi muliralio nikhukhola amangalimwa amanji? ²³ Nasi ndakhababoolere habulafu mbu, 'shindaali nindabamanya tawe!' Rule ewa endi hano, enywe abakholi betsiimbi!'

²⁴ 'Kata kario, buli shiamulala oulahulira amakhuwa kanje kano, nakara mubikhole acherasibwa nende omundu omuchesi owombokha inzu yiye khulwanda. ²⁵ Ifula yetsa niyikwa inyinji, omuyembo nikuchiingukha, khandi omuyeka nikuhuutsa nibikukhupa inzu yiyo; nayo niilakwa ta shichira omuse kwayo kwali khulwanda. ²⁶ Halali buli shiamulala ouhulira amakhuwa kanje kano nalakaheresia oluyali alaba shingana omundu omusiru owombakha inzu yiiye khumuyeshe. ²⁷ Ifula yeetsa niiyikwa, omuyeembo nikuchiingukha, khandi omuyeka nikuhutsa nikukhupa inzu, nayo niikwa nisasikha akeelala"

²⁸ Olwa Yesu yali namalire okhuboola ebindu bino, abemikanda bahuchisibwa nende amechesio keke, ²⁹ shichila yechesia shingana ulia ouli nende obunyali, halali shingana abeebali babwe baamalako tawe.