¹ Mwiyenjeresie obulayi mbu shimulakhola ebikhole bienywe biobulunjishi mbu abandu bamulole tawe, kalali kario tawe mubula omukabo okhurula khu Senywe ouli mwikulu. ² Kario olwa oba nohana obukhoonyi bubwo, sholekhupira eshisiriba shingana abekaati bakholanga muSinagogi nende khumihanda, kho kanyalikhane mbu bahebwe oluyali nende abandu. Esie emuboolera obulamba, bamala okhunyoola omukabo kwabo. ³ Nebutswa olwa oba nohana obukhoonyi, shiolalekha omukhono kukwo omukaata kumanye eshia omukhono omulunji kukholanga tawe. ⁴ Kho obukhonyi buhanwe mabiswi. Naye Senywe oulolanga mabiswi alabahelesia omukabwa.

⁵ Olwa muba nimusaaya, shimulaba shinga abekaati tawe, okhuba bachama okhusinjira mutsisinagogi nende khundulo khwemihaanda mbu abandu babalole. Emuboolera obulamba, bo baamala okhunyoola omukabwa kwabo. ⁶ Halali nenyu, olwa muba nimusaaya, injile mushikoro shiomukari muno, mwikale omuliango mana musaaye Senywe oulolanga mabiswi; naye Senywe oulolanga mabiswi alabaheresia omukabwa kwenywe. ⁷ Halali olwa musaaya, mulakalushira kalushira amakhuwa akabula eshifune shinga abamahanga bakholanga tawe, baparanga mbu balahulirwa mukhukalushila khwa amakhuwa amanji. ⁸ Shimulaba shinga abo tawe; okhuba Senywe amanyile ebindu bilia bioosi ebiamwenya, ⁹ kata nimushili okhumusaba. khulwayako, musaaye muri, E Seefwe ouli mwikulu, eliiralio liribwe. ¹⁴ Okhuba nobeera abandu okhuyiira khabwe, naye Senywe owomwikulu alamubeera obuyiiri bwenywe. ¹⁵ Nebutswa nimuba nimulababeera obuyiiri bwabwe, endio khandi Senywe shalamubeera obuyiiri bwenywe ta.

¹⁶ Khandi olwa muba nimuhonga inzala, shimulaba shingana abekaati tawe, nibefwala eshibeera nokhukhulusia mumoni, mbu abandu babalole shingana bali inzala. Emuboolera obwatoto, baamala okhunyoola omurungo kwabo. ¹⁷ Nenyu emuboolera mbu olwa muhonga inzala, mwibashe amafura khumirwe nimwiyosia mumoni. ¹⁸ Mbu shimulalolekha khubandu shingana abahonganga inzala ta, halali khu Senywe oulolonga mabiswi, naye Senywe, oulolanga mumabiswi, alabarunga habulafu.

¹⁹ Shimulebishira amabishiro kenywe khushialo ta, ewa ebikukule nende tsindebelende bisasinjia, ewa abeefi bafunaka nibeeba; ²⁰ Halali nenywe mwikholere amabishiro kenywe mwikulu, ewa ebikukule nende tsindeberende bilasasia, kata ewa abeefi balafunaka nibenjira okhwiiba ta; ²¹ Okhuba ewa libishiro lirio lili, niho ewa omwoyo kukwo kulaba khandi.

²² Obulafu obwoomubiri ni imoni, imoni yiiyo niyiba indayi, omubiri kukwo kwosi kuletsulamwo obulafu. ²³ Halali imoni yiiyo niyiba imayanu, omubili kwosi kuletsulamwo eshilima. Nikakhaba mbu obulafu buli mwiwe neshilima, eshilima shishio neshikhongo shihera shiriena!

²⁴ Abulaho omundu ounyala okhurumushira abaami babili tawe: okhuba alasira mulala naye nachama oundi, Kalali kario ta, aletiiririra khumulala, nalechelesia oundi. Shionyala okhurumushila Nyasaye nende obuyiinda tawe.

²⁵ Niko akachila nemuboolera mbu muleshe okhuhenderanga akobulamu bwenywe, ebia mwitsa okhulia, kata ebia mwitsa okhunywa; kata akomubili kwenyu, eshiomwitsa okhufwala. Okhuba obulamu shibuyoomba ebilibwa, nakwo omubili shikuyoomba ebifwalo? ²⁶ Yenje amanyonyi kokhwikulu. Shinga olwa kalarakanga kata okhuchesa, kata okhukhung'aasia mubiachi ta. Naye Senywe womwikulu akalisinjia. Nenyu shimuli abobukusi okhukashira? ²⁷ Niwiina khwinywe ounyala okhwimetera inyanga khubuyindifu bubwe Khulwa amahendo keke?

²⁸ Mbushiina eshichira nimuhendera ebifwalo? Paarakhwo khubimuli biomubikuuri, bikhulanga, shibikhola emilimo ta, kata okhusiira tsinzaha tawe. ²⁹ Nasi kario emuboolera, mbu kata Sulemani muluyali lulwe lwoosi shiyeefwalakhwo shingana ebimuli yibo tawe. ³⁰ Nikakhaba mbu Nyasaye afwala obulimo bwomubikuuri, obuliho inyanga yino ne mukamba busukunwa mushisaambiro, shiali ounyala okhubafwaala enywe tawe, enywe abobusubiri obutiti? ³¹ Bulano buno mulaba abamahendo nimuboola, nakhulieshi? noho, nakhunyweshi? noho nakhwifwaaleshi? ³² (Okhuba ebindu bino nibio ebia Abamahanga bakhabanga:) okhuba Senywe owomwikulu amanyire mbu mwenyanga ebindu bino bioosi. ³³ Halali ranjilire mukhaabe obwamibwe nende obulunjishibwe, nabio ebindu bindi bino bioosi mulameeterwa. ³⁴ Nikali kario, shimulaba abokhuhendera mukamba tawe, okhuba mukamba kulehendera okwene. Buli inyanga yili nende amabi akachiyerere.