Matsayo 5

1 Naye olwa Yesu yalola abemikanda yatikulukha khushikulu, niyekhala hasi nabo abechibe nibamwitsila. 2 Naye nachaka okhubeechesia, naboola,

3 "Nabeikhabi abatakha mumioyo, okhuba obwami bwomwikulu nobwabwe!"
4 "Nabeikhabi ababereranga, okhuba bakhahotseresibwe!"
5 Nabeikhabi abaholo, okhuba bakhalamirwe eshialo!"
6 Nabeikhabi abali neinzala nende okhulibwa obuloho Khulwa obulunjishi, okhuba balekusibwa!"
7 Nabeikhabi abali nende tsimbabasi, okhuba bakhalolesibwe tsimbabasi!"
8 Nabeikhabi abeerereshe mumioyo, okhuba bakhamulole Nyasaye!"
9 Nabeikhabi balia abakasia omulembe, okhuba balalangwa abaana ba Nyasaye!"
10 Nabeikhabi balia abasandibwa Khulwa obulunjishi, okhuba obwami bwomwikulu nobwabwe!"
11 Muli abeikhabi olwa abandu bamunyeka, nibamusandia, kata okhubachishira obubeyi khulwanje.
12 Tsatsahale nimwikhoya okhuba eshihanwa shienywe mwikulu neshikali, shichila nendio butswa basandia abanabi balia abamuranjilira.

13 "Ninywe omunyu kweshialo. Ne omunyu nikukosia eshitsanzira, kukasira shiina khandi? Shikukhoyele eshindu ta, kulasukunwa elwanyi mana kusenwe nebilenje. 14 Muli obulafu bweshialo. Litookho liombakhwa khushikulu shilinyala okhubiswa tawe. 15 Abandu shibahafinjia itaha mana bafunishira mushimwero tawe. Halali irebungwa khushichibi mbu abali munzu balole obulafu. 16 Lekha obulafu bwenywe bwashire abandu boosi, mbu balole ebikhole bienywe ebilayi mana baheresie oluyali Nyasaye wenywe ouli mwikulu.

17 "Shimulapaara mbu esie ndetsa okhusasia amalako nohomba obunabi tawe; shindayetsa okhubirusiaho ta halali okhubihereresia. 18 Okhuba emuboolera obwatoto, kata likulu nende eshialo nibikhamulukha, ibulaho inyukuta inditi, kata akharonyeresi akheikalamu khalala, khanyala khakhamulukha khumalako okhula olwa koosi kalaba nikoosibwe. 19 Naye yesi yesi owakhaba nafunaka khumalako elala litiiti mana yechesie abandi endio yakhalangwe omutiiti mubwami bwomwikulu. Halali ulia oukhola nende okhwechesia amalako kano yakhalangwe omukali mubwami bwomwikulu. 20 Okhuba emuboolera nikakhaba obulunjishi bwenywe shibunyala okhuyoomba obwa abaFarisayo nende abahandichi baamalako, obulamba buli shimwakhenjire mubwami bwomwikulu tawe.

21 Mwahulila akaboolerwa abakuuka benywe khale, 'Sholeera ta,' naye, 'yesi owiira alaba mubutinyu bwokhukhalachirwa eshiina.' 22 Nebutswa emuboolera mbu, omundu yesi outiirira omusiani nohomba omukhaana wabwe liruma alaba mubutinyu bwokhukhalachirwa eshiina! khandi, naye yesi ulia ouboolera omusiani nohomba omukhaana wabwe, 'omukhaya' akhoyere okhuyirwa mushiina. Khandi yesi yesi oubiira owashie, 'oli omusiru,' alaba mubutinyu bwomuliro kweinziayo. 23 Kario norera eshihanwa shishio khubwaali ne yaho wiitsulira omusiani nohomba omukhana wenywe alinende eshikha ninawe, 24 lekha eshihanwa yisho habwaali yaho. Elieimbeli muno otsie wisasanie ninabo; mana wiitse ohane eshihanwa shishio. 25 Fuchirisania lwangu nende omusukuwo oukhuyilanga mushiina okhuyaasibwa. Mwiyamane inaye khunjila, nohomba omusukuwo nakhure mumakhono akomuyaasi, naye omuyaasi akhure mumakhono akomukali, owitsa okhukhufuuba mumbohe. 26 Emuboolera obwatoto, shiolarulamwo tawe okhuula olwa nobe norunjire omurungo kwosi okukhoyere.

27 "Mwahulila akamala okhuboolwa, 'shimulaheya tawe.' 28 Ne habutswa emuboolera mbu ulia yesi ouhenga khumukhasi nobwikoombi bwokhwilasia wuyo amalile okhuheya ninawe mumwoyokwe. 29 Nikakhaba imoni yiiyo isatsa yichira wesichirala, chikhuule mana ochisukune ehale. Nakeinganga okhukosia eshitonye shiomubirikwo okhuyoomba okhutibibwa omubiri kuchimaanile mukahena. 30 Nikakhaba omukhonokwo omusatsa kunyala okhuchira wesichirala, kukhalache kukhurulekhwo. Nakeinganga okhukosia eshitonye shiomubirikwo okhushila omubili kwosi kutsie mukahena.

31 Kaboolwa mbu, Yesi yesi oulekha nalonda omukhasiwe amuhandichire ibarwa eyokhulekhana.' 32 Habutswa nasi emuboolera yesi ulia oulonda omukhasiwe, nikakhaba shiamunyoolere naheyanga tawe, amukhola okhuba omuheyi. Yesi ulia oumuteshia olunyuma lwokhulondwa akhola obuheyi.

33 Ne khandi mwahulira akababoolelwa abandu bakhale, 'sholafinaka eshitsibo shishio tawe, halali yisuria Omwami ebitsubo ebia okholere.' 34 Nebutswa nasi emuboolera, sholetsubanga norumbula likulu tawe, okhuba nishio eshifumbi shia Nyasaye;

35 kata okhurumbula eshialo ta, okhuba nishio eshifumbi eshia abasiraangakhwo ebilenje; kata Yerusalemu ta, shichila nilio litookho eliOmuruchi Omukhongo.

36 Shikakhoyeere kata okhwitsubira emirwe chienyu tawe, shichira shionyala okhukhola liswi lilio elala okhuba lilafu nohomba limali. 37 Nebutswa leshe obubooli bwenyu bube 'yee, yee' nohomba 'Tawe, tawe.' elindi liosi eliabukhane nende kano neliokhurula khumwononi ulia.

38 Mwahulira akaboolwa, 'Imoni khumoni, nalio eliino khuliino.' 39 Nebutswa nasi emuboolera, shiolaingana nomundu omubi tawe. Kata kario, Omundu nakhupaama khuluseya lwebulunji, mushukhasilie olundi khandi. 40 Ne kata omundu nakhwinjilira itookho mushiina mbu akhunuule lishatilio, muleshere abukule kata likotililio. 41 Naye yesi oukhuyunjia okhutsia imaili ndala, tsia ninaye tsimaili tsibili. 42 Muheresie ulia oukhusaba, ne shiolamwima ulia owenya okhuholakwo tawe.

43 Mwahulira shinga kaboolwa, okhoyere oheere omumenyani uwo mana osire omusukuwo. 44 Habutswa esie emuboolera, heera abasuku benywe mana mubasayire balia abamusandia, 45 Mbu kho mube abana ba Senywe ouli mwikulu. Okhuba abashilinjia eliubalie ababi nende abalunjishi, nabakwisilia ifula abalunjishi nende abashiamu. 46 Okhuba nimuba nimuheera abamuheeranga inywe, kho muli nomukabo shi? Kata abasololi bobushuru shibakholanga bario? 47 Kho nimuba nimushesinjia abolwibulo lwenyu bonyene, kho mubashirira shiina abandi? Abamahanga boosi shibakholanga bario? 48 Kho mukhoyere okhuba abalamba, shinga Senywe ouli mwikulu olwa ali omulamba.