¹ Mutsinyaanga yitso, Yohana Omubatisi yeetsa nakambanga mushitsimi eshia eBuyahudi naboolanga mbu, "Mwikanire, okhuba obwami bwomwikulu ² bwitsile ahambi." ³ Wuno niye owa omulakusi Isaya yabolaakhuo, "Omwoyo okwa ulia oulanjilisia mushitsiimi, 'kaasie injila eyOmwami, mukololosie emihanda echendekhwo.'"

⁴ Tsingubo etsia Yohana yafwalanga tsiali nitsiakasibwa okhurula khu amaswa akeingamia, niyeboyela eshikhoba shielisero mushishienje. Ebiokhulia bie beialinji tsisiche nende obuushi bwomushitsimi. ⁵ Mana abandu bamutsiira okhurula eYerusalemu nende ebuYudi kata mutsingongo tsia Yorodani. ⁶ Nibeyamaga tsimbi tsiabwe, babatiisibwa mumuchera kwa Yorodani.

⁷ Naye olwa yalola obuunji bwa abaFarisayo nende abaSadukayo nibetsanga ewayali nabatisilinjia, yababolela mbu, "inywe olwibulo olwetsinzokha! Niwiina owamuchetsiyiye mbu muhonokoshe mwiiruma eliitsanga? ⁸ Mwame ebiamo ebiwinjana nende okhwikanira khwenywe. ⁹ Shimulepaarira nimwiboolela abene mbu, 'khuli abolwibulo olwa sefwe Abrahamu.' Emuboolela toto mbu, Nyasaye anyala okhubusilia Abrahamu abana okhurula kata mumachina kano. ¹⁰ Imbaatsi yimalile okhurebwa khumisi chiemisaala, ne buli omusala okulaama ebiaamo ebilayi ta kularemwa kukwe mana kusukunwe mumulilo.

¹¹ Emubatisia nende amaatsi khulwa okwikanira. Nebutswa owitsa inyuma wanje alinende obunyali obunji okhushira, ebilaro bibye shiekhoyele okhubichiinga tawe. Ye namubatisie inywe muRoho Omutakatifu nende omulilo. ¹² Ali nende oluteru mumukhono kukwe, alalafia tswetswetswe olwanyi lwokhuhuuliramwo, alakhung'asia ingaanoye yoosi nachibikha mushiachi, nebutswa alasamba omukhuutsi mumuliro okulanyala okhusimibwa ta."

¹³ Olunyuma Yesu narula eGalilaya natsia khumwalo kwa Yorodani abatisibwe nende Yohana. ¹⁴ Naye Yohana nateema okhumwikalila namuboolela, "Esie ekhoyeele okhubatisibwa ninawe, nawe witsile orie khwisie?" ¹⁵ Yesu yamukalusia mbu, "Fuchilila kabe kario bulaano; kho kosibwe akobulunjishi koosi." Mana Yohana niyeyama.

¹⁶ Olwa Yesu yali niyakhabatisibwa, habwene yaho narula mumatsi, lola, likulu liamwikushila, naye nalola Roho wa Nyasaye niyekhanga shingana lihusi, namuyeelakhwo. ¹⁷ Lola, omwoyo kwahulilikhana okhurula mwikulu nikuboola, "Uno niye Omwana wanje omuheerwa, muye enjamisibwa okhushila."