¹ Olunyuma Olwa Yesu okhwibulwa eBethlehemu eya ebuYahudi mutsinyanga tsia Herode yali nali omuruchi, Lola abachesi okhurula ebukwe beetsa eYerusalemu, ² nibaboola mbu, alihena owibulwe mbu abe omuruchi wa Abayahudi? Khulutsi ing'ining'ini yiye ebukwe, ne khwitsile okhumwinamila."

³ Olwa omuruchi Herode yahulila kano, ikholo niyimurimukha, nende boosi abali eYerusalemu ninaye. ⁴ aHerode yakhung'aasia abakuhani abakhulundu nende abechesia bamalako halala, nabareeba mbu "Ni heena ewa Masihi akhoya okhwibulwa?" ⁵ Nibamukalusia mbu "eBethlehemu ebuYahudi; shichira kahandikwa kario nende omulakusi; ⁶ 'Eywe, Bethlehemu, mushialo shia Yuda, shiolikhwo omutiti mubaruchi bebuYuda, shichila muywe alarulamwo omuruchi oulemilila abandu banje abaIsraeli.'

⁷ Kho Herode nabalanga abachesi mabwiswi nanoonelesia mubwiyinikhu inyanga eya ing'ining'ini yalolekha. ⁸ Mana naye nabaruma eBethlehemu nababolela mbu, "Tsie mukhabilisie obulayi omwana uyo, ne olwa muba nimunyolele, mwitse mumanyie, Kho mbu siesi enzie emwinamile."

⁹ Ne olwa Bali nibahulile akomuruchi, batsililila noluchendo lwabwe, ne lola ing'ining'ini eyabali nibalutsi ebukwe yabemilila, okhula olwa yoola niyisinjila ikulu ewa omwana yali. ¹⁰ Nabo olwa balola ing'ining'ini, bekhoya okhushila nende omwikhoyo okuyomba eshichelo. ¹¹ Nibenjila munzu, ne olwa balola omwana nende Mariamu nyina, nibakwa basikama hasi, nibamwinamila, nibaboholola amaabikho kabwe nibayiniamwo ebihanwa, ebia, etsahabu, obubane, nende manemane. ¹² Nyasaye nabakayile okhukalukha ewaHerode mwilooro, bamala nibakalukha mushialo shiabwe khunjila yindi.

¹³ Olunyuma lwabwe okhukalukha ewabo, lola, malaika yamuloleshela Yusufu mwilooro, namubolela mbu, "Buukha, bukula omwana nende nyinamwana, mwirushe mutsie eMisiri, mumenyeyo okhula olwa ndilimuboolela mbu mukalushe, okhuba Herode alakhaba omwana omutoro mbu amwiire. ¹⁴ Eshilo shiene yisho, Yusufu yabuukha nabukula omwana omutoro nende nyinamwana nibatsia eMisiri. ¹⁵ Ne nibabayo okhuula olwa Herode yafwa, mbu nako koosibwe aka Omwami yabolela mumulakusi mbu, "Okhurula eMisiri ndaamulanjile Omwana wanje." ¹⁶ Olunyuma lwene Herode, namanyilisia mbu abachesi balia bamukaatia, yasinyikha okhushira muno, narumasia okhwiira abana boosi abali eBethlehemu, nende tsimbeka tsioosi tsiokhunyanza, abemihika chibili okhukalukha hasi, kano kekhola kario okhulondana nebise ebiayali nareberesiyenje khu abachesi. ¹⁷ Nako nikoosibwa kalia akali okhuboolwa nende Yeremia omulakusi, akaboolanga mbu, ¹⁹ Ne olwa Herode yali niyafwiile, malaika wOmwami yaloleshela Yusufu mwiloro eMisiri. ²⁰ Namubolela mbu, "buukha obukule omwana nende nyinamwana mukalushe mushialo shia Israeli, okhuba boosi abakhabanga okhwira omwana bafwiile." ²¹ Naye Yusufu nabukula omwana nende nyinamwana natsia niyoola mushialo shia Israeli.

²² Habutswa olwa Yusufu yahulila mbu Arikelayo niye ourukanga ebuYahudi mushilenje shia Herode samwana, yaria okhutsiayo. Okhuba Malaika wOmwami yali namuchetsiiyie mwilooro, yamala natsia tsimbeka tsia eGalilaya ²³ mana natsia khandi namenya mwitookho Elia Nazareti. Kano nako nikoosia akali nikaboolwa okhubilila mubanabi "mbu yakhalangwa Omunazarayo