¹ Kho olwa bwashia mumabwibwi Abakuhani boosi nende abakofu ba Abandu basanjirana shibeka nende Yesu nibeenya okhumwira. ² Ne olwa bali nibakhamuboha bamubukula nibamuyira khu Pondiasi Pilato Omukafuna.

³ Olwa Yuda Owali namukhobile yalola mbu, Yesu amalire okhukhalachirwa eshiina, yekanira nakalusia tsifetsa itsio amakhumi kataru khubakuhani nende abakhulundu.

⁴ Naboola ari, "enzoononire okhukhoba amatsayi kabula eshikha." Nibamukalusia bari, "elo nelikhuwa shiina khwifwe, tsia olikasia omwene." ⁵ Ne nasukuna tsifetsa etsio muhekalu natsia niyemika.

⁶ Ne Abakhulundu ba abakuhani yabo nibakula tsifetsa etsio nibaboola bari, nomusiro okhukara mwibishiro liebihanwa shichira nobukusi bwamabanga. ⁷ Ne nibarecheresania okhukula omukunda kwomulonji mbu, bayabirenjemwo abacheni. ⁸ Niko akachira omukunda ikwo nikulangwa mbu, omukunda kwa matsai okhurula olwa leero.

⁹ Kho nikatusibwa akaboolwa nende omulakusi Yeremia mbu, nibabukula etsifeetsa amakhumi kataru, obukusi bwoyo owachererwa obukusi, oyo owabaana baIsiraeli bacherera obukusi. ¹⁰ Ne nibatsiikhoyera okhukula omukunda kwomulonji shinga Omwami olwayandaka.

¹¹ Ne Yesu yasinjira imbeli womukafuna ne Omukafuna namureeba ari, "iwe niwe Omuruchi wa Abayahudi noho?" Yesu namukalusia, "Niwe ouboolere."

¹² Ne olwa abakhulundu babakuhani nende abakofu bamukhalachira, shiyakalusia liosi ta.

¹³ Mana Pilato namureeba ari, "shiohuliranga amakhuwa shinga olwa kali amanji akarumbulungwa khwiwe?" ¹⁴ Naye naramukalusia likhuwa ta, mbu Omukafuna nahuka muno.

¹⁵ Ne khwisabo elo Kafuna yahinyanga okhulakhulira abomukanda omubohe mulala owabeenya. ¹⁶ Ne bali nende omubohe undi owamanyikhana shinga Barinaba.

¹⁷ Kho olwa bali nibakhung'anire halala, Pilato nareeba ari, "Niwina owamwenya mbu emulakhulire, Baraba nohomba Yesu oulangwa Kristo?" ¹⁸ Okhuba yamanyirisia mbu imbalikha niyo eyichirire bamwibala khuye mbu amukhalachire okhufwa.

¹⁹ Ne olwa yali nashikhaale khushifumbi shobuyaasi, omukhayewe naruma likhuwa liboola liri, "shiolakholakholakhwo likhuwa liosi liibi khumulunjishi oyo ta, okhuba embere nende okhusandibwa okhuunji okhuburira mumalooro khulwaye."

²⁰ Ne butswa abakhulundu babakuhani nende abakofu bakatirisia abomukanda mbu basabe Pilato okhubalekhuulira baraba ne naye Yesu yerwe. ²¹ Omukafuna nakalusia nababoolera, khu babili bano ni wina owamwenya mbu emulekhuulire? Nibakalusia bari, Baraba!

²² Pilato nababolela ari, "kho emukhole endie Yesu ulangwa mbu Kristo?" Boosi nibakalusia bari, "Abambwe!" ²³ Ne Omukafuna nabareeba ari, "Nelibi shiina eliakholire?" Ne butswa nibameeta okhupa oluyoka mbu "Abambwe!"

²⁴ Olwa Pilato yalola mbu, shianyala okhukhola eshindu shiosi ta, habula mbu indiri yali niyenya okhwikhola, yabukula amatsi nasaaba amakhonoke imberi womukanda okwo naboola ari, "shiendikhwo neshikha khushitsayi shiomundu Omulunjishi uno tawe. Ako nakenywe abeene."

²⁵ Ne abandu boosi nibakalusia nibabola bari, "Amabangake kabe khwifwe nende khubaana befwe." ²⁶ Mana Pilato nabalekhuulira Baraba ne namunywekha Yesu mana namuhaana mbu abambwe.

²⁷ Mana abelihe ba Kafuna nibayira Yesu mulwanyi olukhongo lwomuruchi mana omukanda okwa belihe kwosi nikumubotokhana. ²⁸ Ne nibamufwalula tsingubotsie nibamufwala ingubo yeikitani. ²⁹ Mana nibalukha olusimbi lwamahwa, nibamura khumurwe ne nibara indabushi mumukhonokwe omusaatsa, kho nibasikama imberiwe nibamutsesherera nibaboola bari, "Oyindire iwe Omuruchi wAbayahudi!" ³⁰ Nibamufutsakhwo amare nibabukula indabushi eyo nibamunyweshera khumurwe. ³¹ Ne olwa bali nibamalire okhumutsesherera bario, bamufwalula eshifwalo eshio nibamufwala khandi tsingubotsie omwene ne nibamuyira okhubambwa.

³² Ne olwa bali nibarula bulwanyi olwo, bakaana nende omundu oulalangwa mbu Simoni Omukurene, abelihe nibamulunyia okhuchinga omusabakwe. ³³ Ne olwa boola halangwa mbu Goligotsa mbu, habundu weshihanganga, ³⁴ Nibamuheeresia idivai eyitsokasibwemwo induswe ne olwa yali yakhakonyakhwo yaloba okhuchinywa. ³⁵ Ne nibamubamba, nibakabana ebifwalobie nibabiupira ikha, mbu kho kanyale okhuusibwa akaboolwa nende omunabii, "bakabana ebifwalo bianje nibabiupila ikha." ³⁶ Ne nibekhala hasi nibamuhenjeresia. ³⁷ Ne nibara hamurwekwe lihandiko liboola, "UNO NIYE YESU OMURUCHI WA ABAYAHUDI." ³⁸ Khandi baliho abeefi babiri ababambwa ninaye, mulala khumukhonokwe omusaatsa ne owundi omukhono omukhasi. ³⁹ Ne ababuri boosi bamunyeka nibamusungusira emirwe. ⁴⁰ Nibaboola bari, "Iwe ounyala okhulikulula ihekalu nochiumbakha khandi mutsinyanga tsitaru, wihonie omwene. Noba noli Omwana wa Nyasaye, wishe orule khumusalaba.

⁴¹ Khandi bario abakhulundu babakuhani bamutsesherera halala nende abahaandichi nende abakofu nibaboola bari; ⁴² Yahonia abandi, ne ye mwene shianyala okhwihonia ta. Niye Omuruchi wa Isiraeli kho yeshe bulano khumusalaba mana khumusuburire. ⁴³ Yesikaanga Nyasaye kho lekha Amuhonie bulano naba namwenyanga; okhuba yaboola ari; "Nisie Omwana wa Nyasaye. ⁴⁴ Kata abanuuli babambwa ninaye bosi nibamunyeka bario.

⁴⁵ Okhurula khusaa yakhasasaba eshialo shiosi shierima okhuula khulisa lia tisa. ⁴⁶ Mana ahambi khulisaa lia tisa, Yesu yalira nomwoyo omukhongo naboola; "Eli, Eli, lema sabakutani," eshisina mbu, "Nyasaye wanje, Nyasaye wanje, undeshire mbushiina?" ⁴⁷ Balala khubandu abali nibasinjireho olwa bahulira ne nibaboola bari, omundu uno alanganga Eliya. ⁴⁸ Ne habwenaho mulala khubo narula natsia tsimbilo nabukula eshiangwe, niyenikha mudivai nashira khulikata liolusi namuha mbu anywe.

⁴⁹ Ne abandi nibaboola bari; "Leshe khulole nikakhaba Eliya aletsa okhumuhonia." ⁵⁰ Naliira khandi nomwoyo omukhongo, ne nakhalaka omwoyo. ⁵¹ Ne lola, eshitambaa shiomuhekalu nishirandukhamwo ebitonye bibiri okhurula ikulu okhuula hasi, Eshialo nishirenga, tsinyanda nitsiatikha. ⁵² Tsing'ani nitsiikukha khandi emibiri eminji chiabatakatifu abali nibakona nichibusibwa. ⁵³ Ne nibarula mubilindwa olunyuma lwokhulamukhakhwe, ne nibatsia mwitookho litakatifu nibaloleshera abandu abanji.

⁵⁴ Ne omusesia nende abali ninaye nibamuhenganga Yesu olwa balola eshialo shirenga nende ebindu biekholekha, baria muno nibaboola; tooto mwene uno abeere Omwana wa Nyasaye.

⁵⁵ Khandi baliho abakhasi abanji abahenjeranga ehale nibasinjiire ne bali nibamulonderekhwo okhurula eGalilaya nibamukhalabanira. ⁵⁶ Ne mubo balimwo Mariamu Magadalina, nende Mariamu Nyinabwe Yakobo nende Yusufu, nende nyinabwe abaana ba Zebedayo.

⁵⁷ Olwa eshialo bwela Omusaatsa mulala omuyinda owarula Arimatheya oweliira mbu Yusufu, owali khandi omwechi wa Yesu yetsa. ⁵⁸ Natsia khu Pilato namusaba omubiri kwa Yesu. Mana Pilato nalaka mbu aheebwe. ⁵⁹ Mana Yusufu nabukula omubiri okwo nakubohera musanda indafu. ⁶⁰ Nakwalisia mung'ani yiye omwene imbia eya yali niyayaba mulwanda. Mana naselenjesia lichina likhongo nalira khumuliango kweing'ani eyo ne niyenyookha. ⁶¹ Ne habwene yaho Mariamu Magadalina nende Mariamu wundi baliho nibeekhale nibahengane nende ing'ani.

⁶² Inyanga yalondakhwo Abakhulundu babakuhani nende Abafarisayo bakhung'anira ewa Pilato. ⁶³ Nibaboola bari, "Omwami, khwitsulira mbu omubeeyi oyo olwa yali nashiri mwoyo yaboola ari, Ndalalamusibwa olunyuma lwetsinyanga tsitaru, ⁶⁴ Kho olachirisie mbu, Ing'aniye yilindwe obutinyu okhuula khunyanga yakhataru, abeechibe baleshe okhwitsa mushiro nende okhwiba omubirikwe mana baboolere abandu mbu, Alamushe okhurula mubafu, Kho mbu obushiamu bwali bwokhumalirikha bube obubi muno okhushira obwamberi.

⁶⁵ Pilato nababoolera ari, muli nabalindi, tsie mulinde Ing'ani eyo obutinyu shinga olwa munyala. ⁶⁶ Kho nibatsia nibalinda Ing'ani eyo obutinyu nibara khwichina elo eshibalikho mana nibalekhaho abalindi.