¹ Olwa Isabato yali niyihwere, nibushietsanga, Mariamu Magadalina nende Mariamu wundi bakalukha okhulola eshilindwa. ² Ne khwaliho okhurenga okhukhongo khweshialo, shichira omumalaika womwami yekha okhurula mwikulu niyeetsa naserenjesia lichina nilikalukha inyuma mana nalikhalakhwo. ³ Yafwana shinga oluhenu, netsingubotsie nitsing'inang'ina shinga eliuba. ⁴ Abasikari bamuria muno nibatechera nibaba shinga abafwire.

⁵ Malaika naboolera abakhasi yabo mbu, "mularie tawe, shichira mbu, emanyire mukhabaanga Yesu owabambirwe khumusalaba. ⁶ Shiali hano ta, amalire okhulamukha shinga olwa yaboola, Yitse hano mulole aha yalisibwa!

⁷ Kho mutsie bwangu muboolere abeechibe mbu ulamuushe okhurula mubafu, ne lole! abaranjirira okhutsia eGalilaya namumulolere ebweneyo, Kho emalire okhumuboolera."

⁸ Mana nibarula bwangu hashilindwa nibali noburi, nebutswa bali nokhwikhoya okhunji, nibatsia tsimbiro okhuboolera abeechibe. ⁹ Ne lola Yesu yabakanira naboola mbu, "Omulembe kube ninenywe," Nibasita khuye nibamukwa mumakulu nibamwinamira. ¹⁰ Mana Yesu nababoolera mbu, "Mularie tawe, tsie muboolere abaana befwe mbu, batsie eGalilaya balandolera ebweneyo.

¹¹ Ne olwa abakhasi yabo bali nibatsiitsanga, balala khubasikari abali nibalindire eshilindwa bakalukha mwitookho, nibaboolera abesaalisi abakhulundu boosi akali nikekholeshe. ¹² Ne olwa abeesalisi abakhulundu bali nibaakanire nende abakofu, nibahulirisaniye akabakhola, babaheresia abasikari yabo amapesa amanji. ¹³ Mana nibababoolera mbu, "Muboolere abandu mbu abeechibe betsere eshiro nibamwiba nikhukonanga. ¹⁴ Ne nikakhaba mbu, Omukafuna ahulira kano, khulamuhomberesia afuchirire mbu, enywe mubula eshikha kho shimuli nende elimuhendia tawe. ¹⁵ Abasikari yabo nibabukula amapesa yako, mana nibakhola shinga olwa bali nibaboorewe, mana amakhuwa yako niko akamala katswanibwa mumbeka tsiosi nabaYahudi okhurula olwa leero.

¹⁶ Abeechibe ekhumi nababiri batsia khushikulu eshia eGalilaya ewa Yesu yali nabalachirisiye okhutsia. ¹⁷ Ne olwa bamulola bamwinamira kata olwa abandi khubo bakanakania mumioyo chiabwe. ¹⁸ Yesu yasita ahambi khubo nababoolera mbu, "Nyasaye yayamberesie obunyali bwosi mwikulu nende mushialo. ¹⁹ Kho mutsie khubandu bosi mubakhole abalondi banje, mubabatisie muLiira elia Sefwe, Omwana nende Roho Omutsienukhu, ²⁰ Khandi mubechesie okhulonda koosi akemulachirisiye. Nasi ndalabetsanga mwinywe buli lwosi, okhurula khushihesi shieshialo."