¹ Ne olwa Yesu yali namalire okhwechesia amakhuwa yako koosi, yaboola nende abeechibe, ² Mumanyire mbu olunyuma yitsa okhuba Ipasaka ne Omwana wOmundu yetsa okhukhobwa nende okhurebwa khumusalaba.

³ Mana ebise bienebo nibamala nibeetsa halala abakofu baabandu nende abakhulundu babakuhani munzu ya Omukuhani omukali oulangwa mbu Kayafa. ⁴ Mana nibakhola obuloli halala mbu, bamutiire Yesu mana bamwire. ⁵ Halali nibaboola khunyanga eya Ipasaka tawe, kho kaletsa okhurulira mubandu obuyoka tawe.

⁶ Naye olwa Yesu yali Bethania munzu ya Simoni owobuchere, ⁷ Yetsa omukhasi weshibeti eshilimwo amarashi nende amafura kobukusi obweikulu, mana nasuta ahambi ewayali natsukha amafura khumurwe olwa bali nibenya okhulia. ⁸ Halali olwa abeechibe balola basinyikha, nibaboola, "nibwashiina obusasishi buno? ⁹ shichira amafura kano kakhakusibwe obukusi bweikulu mana kakhonye abatakha."

¹⁰ Olwa Yesu yahulira yabareeba mbu, shichira nimunyasia omukhasi uno nishina? Shichira nomulimo omulayi okwayakholeere. ¹¹ Shichira mubetsanga nende abatakha bulinyanga halali isie shiebetsanga ninenyu ta. ¹² Khulwa yako yanzushilire amafura kano mbu, kho ndirecheshe khukhuyabirwa khwanje. ¹³ Subira, ebabolera buli olwa injili yino yitsa okhukambwa buli habundu mushialo, eshikhole shino eshia omukhasi uno akholele nishiboolwe kata khulwa okhumwitsulira.

¹⁴ Mana mulala hakari wa ekhumi nende babiri, oulangwa Yuda Isikarioti, natsiira omukhongo wa bakuhani. ¹⁵ Naye nababoolera, mwitsa okhumberesia shina? nasi ndiitsa okhumuhaana khwinywe, nabo nibafuchirisania ninaye okhumeheresia ebipande amakhumi kataru ebia mang'ondo. ¹⁶ Naye okhurula ebise bienebo nakhaba obwiyangu bwokhumukhoba.

¹⁷ Bulano, inyanga yambeli eya emikate chibulamwo limera, abeechi abo nibamutsiira Yesu nibamureeba, ni halena wawenya khukhukasirie noliireho Ipasaka?

¹⁸ Naye nababoolera, mutsie mwitookho mukhabe omundu, mumuboolere Omwami aboola mbu ebise bibie biulire, ne euwo niho ewakhwitsa okhukholera Ipasaka nende abeechi. ¹⁹ Ne abeechi bakhola shinga olwa Yesu yababoolera, nabo nibakaasia Ipasaka.

²⁰ Ne olwakhwola mukoloba, yekhala hasi nende ekhumi nababiri khushiokhulia. ²¹ Ne olwa bali nibalitsaanga, nababoolera; subira ebaboolera, mulala khwinywe niyakhobe.

²² Nabo nibaberera muno ne nibachaka okhureebana mbu Omwami nembe esie noho?

²³ Nabakalusia nababoolera, ulia ourere omukhono kukwe halala ninasi mushikaye niye owitsa okhukhoba. ²⁴ Omwana wa Adamu atsia shinga olwa yahandichilwa, ne wowe! khumundu oyo oumukhoba Omwana wa Adamu, bwakhabeere obulayi omundu oyo alabula okhwibulwa. ²⁵ Mana Yuda owamukhoba nakalusia khandi nareeba ari, Omwami nisie noho? Naye namuboolera; shinga olwa oboola.

²⁶ Ne olwa bali nibaliitsanga, Yesu nabukula omukate nakulamira ikhabi mana nasonyola, naheresia abeechibe ne naboola ari, bukule mulie kuno nomubiri kwanje. ²⁷ Khandi nabukula eshikombe nakhupa mbu orio, nabaheresia naboola nywekhwo mwesi; ²⁸ Okhuba kano namabanga kanje akeIndakano, akaraatsa khulwa okhulesherwa ebionono. ²⁹ Halali ebaboolera okhurula lwa leero shindalanywakhwo khubiamo bino biemitsabibu ta, okhuula khunyanga yiilia olwa ndalanywakhwo obuyia nineenywe halala mubwami bwa Papa.

³⁰ Ne olwa bali nibakhamala okhwimba, barula elwanyi nibatsia khushikulu shia Mizeituni.

³¹ Mana Yesu nababoolera, enywe mwesi mwitsa okhusinyikha ninasi eshiro shino, shichira kahandikwa, nditsa okhumukhupa omwayi, ne nako amakondi komushiayoshie ketsa okhusalana. ³² Halali ndakhasimulukushe khandi ndakhabaranjirire eGalilaya.

³³ Petero Nakalusia namuboolera mbu, kata kakhaba abandu boosi betsa okhusinyikha khulwa iwe, halali esie shinditsa okhusinyikha tawe.

³⁴ Naye Yesu namuboolera subira, ekhuboolela mbu eshiro shino, ingokho nishiri okhulakula witsa okhunzikaana amakhabi kataru.

³⁵ Petero namuboolera kakhoya esie ninawe, khandi shindiitsa okhwikana tawe, kata kario abeechi boosi baboola bario.

³⁶ Mana Yesu natsia ne naba habundu halangwa, Gethsemani, naye nababoolera abeechi, mwikhale hano, nasi enziekhwo imberi okhusaya. ³⁷ Naye nabukula Petero nende abasiani babiri aba Zebedayo ne nachaaka ukhubeerera. ³⁸ Mana nababoolera, omwoyo kwanje kuli nende eshibeera eshinji kata eshiokhufwa. Mwikhale hano, mube meso ninasi. ³⁹ Naye natsia imberi hatiti ne niyenama hasi obweni nachaaka okhusaaya naboola, O Papa wanje, nikaba nikanyalikha eshikombe shino shirulekhwo halali shinga olwa esie ndenya tawe halali shinga olwa iwe wenya. ⁴⁰ Mana niyetsera abeechibe naye nabanyoola nibakonanga ne nareeba Petero mbu, shichira shina nolanyala okhusaayakhwo ninasi kata lisa elala? ⁴¹ Mube meeso nimusaaya mbu mulenjira mumateemo ta, omwoyo kwanje kwikomba ne halali omubiri nomutofu.

⁴² Natsia khandi olwakhabiri, nasaaya mbu E Papa, nikaba kanyalikha eshikombe shino shimbirekhwo nendashinywakhwo ta, kho akawenya kekholeshe.

⁴³ Niyetsa khandi nanyoola nibali mutsindolo shichira tsimoni tsiabwe tsiali nitsisitoere. ⁴⁴ Mana nabalekha ario, natsia, nasaaya olwakhataru, nakalushira khandi amakhuwa malala kalia. ⁴⁵ Mana niyeetsa khubeechibe ne nababoolera, mushikonaanga nimuhulukha, lola, ebise biitsanga khandi biulire, mbu omwana wa Adamu yetsa okhubambwa mumikhono chia aboononi. ⁴⁶ Rule khutsie, lola, wulire ulia owitsa okhukhoba.

⁴⁷ Ne olwa yali nashiboola, lola, Yuda, mulala khu ekhumi nende babiri, yola nende Omukanda omukali nibachinjire Tsimbanga nende Tsindabushi okhurula khubakhulundu baAbakuhani nende abakhulundu ba abaandu. ⁴⁸ Naye owokhumukhoba yali nabaheresiye eshilolero, naboola ari, owandiitsa okhutsunzuna omunwa niye mumutiire. ⁴⁹ Mubwangu namutsiira Yesu namureeba orie omwibali, ne namutsunzuna.

⁵⁰ Naye Yesu namuboolera mbu, owashianje, khola elia witsire okhukhola. Mana nibeetsa nibamukwakhwo Yesu nibamutiira. ⁵¹ Ne lola, oundi khu bali nende Yesu yaila omukhono natsomola olukangalwe namurema eshirwi omurumishi womuKuhani omukhulundu. ⁵² Mana Yesu namuboolera ari, kalusia olukangalwo halubeetsanga, shichira boosi abachinga olukanga, balifwa khulukanga. ⁵³ Nomba oparanga mbu shienyala okhumusaba Papa naye alarumila Abamalaika abashira amahe ekhumi nakabiri? ⁵⁴ Nebutswa amaandiiko kakhoosibwa karie, mbu nolwa kakhoyile okhwikhola?

⁵⁵ Mubise biene yibio Yesu naboola nende Omukanda, Mwitsire shinga na mwiitsanga okhutiira omwifi? nende tsimbanga nende tsindabushi, ndekhalanga halala ninenyu muhekalu tsinyanga tsiosi nimurandiira ta. ⁵⁶ Halali kano koosi kekholeshe mbu, amahandiko kabanabii koosibwe mana abeechibe nibamulekha nibelukha.

⁵⁷ Ne balia abali nibamutiire Yesu bamuyira khu Kayafa, Omukuhani omukali, ewa bali nibakaaniire Abahaandichi nende Abakofu. ⁵⁸ Halali Petero yamulondakhwo ehale okhutsia ewa Omukuhani omukali, Khandi niyenjira mukarii, niyekhala halala nende Abarumishi alole akobumalirishi.

⁵⁹ Mana Abakhongo babakukani, nende abakofu nende abetsibarasa, nibakhaaba obuloli bwobubeyi khu Yesu, khulwa okhumwira. ⁶⁰ Ne shibanyoola ta, kata abaloli bobubeeyi bali abanji nebutswa shibanyoola ilkhuwa liosi ta, ne mubumalirishi betsa ne olunyumakhwo babili nibeetsa. ⁶¹ Nibaboola mbu, uno yaboola mbu nafunake ihekalu ne nachumbashe khutsinyanga tsitaru.

⁶² Naye omukuhani omukali nasinjira, naye namuboolera mbu, shiokalusia liosi ta? bano baboola shina? ⁶³ Halali yesu nauleera, Omukuhani omukali namuboolera mbu, ekhulaka muLiira lia Nyasaye oumenyanga mana okhuboolere niba mbu niwe Kristo omwana wa Nyasaye.

⁶⁴ Mana Yesu namukalusia ari, iwe oboleere, halali ebaboolera mbu, okhurula ebise bino mwitsa okhulola Omwana wa Adamu niyekhaale Omukhono omusaatsa kwa amaani niyetsa okhurula mwikulu mumalesi.

⁶⁵ Nolwa omukuhani omukali yarandula tsingubo tsitsie, naboola, abolere akobwicherasi nende Nyasaye; khushikhaba abaloli bandi mbushi? Loole! bulano muhulire obwicherasi bwene. ⁶⁶ Mulola murie inywe? ninakalusia nibaboola mbu kakhoyire yeerwe. ⁶⁷ Mana nibamufutsakhwo amare mumoni, nibamukhupa amateche, nabo abaandi nibamukhupa tsikhofi, ⁶⁸ nibaboola ewe Yesu, roobakhwo mbu niwina oukhupire?

⁶⁹ Naye Petero yali niyekhaale elwanyi, naye omukhasi mulala natsia namureeba mbu; kata wesi waliire nende Yesu wa Galilaya?

⁷⁰ Nakaana imberi wa abandu boosi, naboola, shiemanyire eshiamuboolanga tawe.

⁷¹ Ne olwa yali niyakharula elwanyi natsiire mushilibwa, omukhasi undi namulola namuboolera mubandu ari, "uno yali halala nende Yesu omuNazareti?

⁷² Naye nakaana khandi nende okhwitsuba mbu shimumanyile omundu uyo ta.

⁷³ Khubise ebititi, abali nibeetsire nibamutsiira, nibamuboolera mbu, Petero, obwatoto eyuwe oli mulala khubo, shichira kata okhuboola khukhwo khukhubuula.

⁷⁴ Nilwo olwa yachaka okhubalama kata niyestuba, naboola mbu, esie shiemumanyire omundu oyo ta, ne olwenolo Itaywa nilakula.

⁷⁵ Ne olwa yamala, Petero niyetsulira likhuwa lia Yesu yamuboolera, itaywa nishiiri okhulakula, naunzikaane amakhabi kataru, narula elwanyi, nalira narula amasika.