¹ Mana obwami bwo mwikulu bulifwananisibwa nende abakhaana ekhumi ababukula tsitaha tsiabwe nibarula nibatsia okhumwakaanira omukhwe. ² Barano khubo bali abachesi nebarano bali abasiru. ³ Abasiru babukula tsitaha tsiabwe ne nibalabukula amafura ta; ⁴ Nabo abachesi babukula amafura mubimuka biabwe halala nende tsitaha. ⁵ Ne olwa omukhwe yachelewa okhuula, bosi bareenjetsa nibakona tsindoolo.

⁶ Ne mushiro hakari obuyoka nibumoka mbu omukhwe ngwoyo tsie mumwakanire. ⁷ Mana abakhaana yabo bosi nibabuukha nibakaasia tsitaha tsiabwe.

⁸ Kho abasiru nibaboolera abachesi bari, mukhuhekhwo khumafura keenywe shichira tsitaha tsieefwe tsisimanga, ⁹ ne abachesi nibakalusia nibababoolera mbu shikakhuhera efwe nineenyu ta; nobulayi mutsie khubakusinjia mwikulire abeene. ¹⁰ Olwabali nibashitsia okhukula, omukhwe niyeetsa mana abali niberecheshe nibenjira ninaye.

¹¹ Olunyuma abakhaana bandi abo nabo niboola, nibaboola bari Omwami, Omwami, khwikulire; ¹² naye nakalusia bababoolera mbu, emuboolera tooto mbu, shimumanyire tawe.

¹³ Khulwesho mubetsenje meso shichira shimumanyire Inyanga kata isaa eya Omwana wOmundu aliitsa tawe.

¹⁴ Okhuba obwami bwo mwikulu bulifwana shinga omundu owenya okhutsia mushialo shiehaale, nalanga abasumbabe nabaleshera emianduchie. ¹⁵ Oundi namuheresia tsitalanda tsiraano, oundi tsibiri, oundi ndala; buli mundu obunyalibwe shinga olwa bwali; mana nachaka oluchendolwe. ¹⁶ Mana owahebwa tsitalanda tsiraano natsia natsikholera obukhala nanyoola etsiindi tsiraano. ¹⁷ Khandi owali naheelwe tsibiri yesi natsikholera obukhala nanyoola etsindi tsibiri. ¹⁸ Ne oyo owali naheerwe ndala yatsia nayabira hasi nabisaho amapesa kOmwamiwe.

¹⁹ Olunyuma lwe tsinyanyanga tsinyinji okhubura, Omwami wa Abasumba abo niyeetsa ne nabasia ninabo. ²⁰ Mana owaheebwa tsitalanda tsirano niyeetsa nende etsindi tsirano naboola ari; Omwami wamberesia tsitalanda tsiraano ne lola, hano endi nende etsindi tsirano obukhala.

²¹ Omwamiwe namuboolera mbu, oli omusumba omulayi khandi omusuubirwa, wabeele Omusuubirwa khu bindu ebitiiti nasi ndalakhukhola omukhongo khubindu ebinji; winjire mubutsatsafu bwOmwamiwo.

²² Yesi owali nende tsitalanda tsibiri niyeetsa naboola ari, Omwami wamberesia tsitalanda tsibili, lola, hano endi nende tsitalanda tsindi tsibiri obukhala.

²³ Omwamiwe namuboolera mbu, oli omusumba omulayi khandi omusuubirwa khubindu ebitiiti, ndalakhukhola omukhongo khubindu ebinji; winjire mubutsatsafu bwOmwamiwo.

²⁴ Ne naye owali neitalanda ndala niyeetsa naboola; Omwami, ndakhumanya shinga olwa oli omundu omutinyu; ochesanga ewa olarachira ta, nokhung'aasia ewa olabakaliire ta. ²⁵ Mana ndali omurii, nenjibisa mwiloba, njieino.

²⁶ Omwamiwe namuboolera eywe omusumba omutofu khandi omumayanu, omanyire shinga olwa efunanga ahandalarachira, nekhung'asia ahandalasalasie ta. ²⁷ Wakhabuukule amapesa kanje noheresia abakhala mbu olwa ndiitsa ekanyoole halala nende obukhala. ²⁸ Kho mumunule italanda eyo mumuheresie oyo ouli nende tsitalanda ekhumi. ²⁹ Okhuba buli mundu ouli nende ebindu alameterwa ne alaba ninabio ebinji; ne oyo oubula ebindu, kata eshiali ninashio shilamurulakhwo. ³⁰ Ne mumusukune omusumba omubii oyo mushirima elwanyi; eyo khulayo okhulira nende okhulumaasia ameeno.

³¹ Ne olwa Omwana wOmundu aliitsa muluyalilwe, halala nende abamalaika abatakatifu nindio alikhala khushifumbi shioluyalilwe; ³² Mana amahanga kosi kalikhung'asibwa imbeliwe, ne naye alikaabukhasia elala elala khulindi shinga olwa omwayi yaabukhasia amakondi okhurula mutsimbusi. ³³ Naara amakondi khumukhonokmwe omusaatsa natsio tsimbusi khumukhonokwe omukhasi.

³⁴ Mana Omuruchi alibasunjira abali khumukhono omusaatsa mbu mwitse inywe abalamirwa ikhabi nende Papa mbu, mulie obulamu obwa mwakasiribwa okhurula mubuchachiro bweshialo; ³⁵ Okhuba ndali inzala nimumbeeresia eshiokhulia, ndali nobuloho nimumbeeresia eshiokhunywa, ndali omucheni nimunzinjisia, ³⁶ Ndali echiechenyi, nimumberesia ebifwalo, ndali omulwale, nimunjendera, ndali mumbohe, nimwitsa okhungoonya.

³⁷ Nindio abalunjishi balireeba mbu, Omwami, khwakhulola liina noli inzala, nikhukhuheelesia ebiokhulia? Kata obulo nibukhulia nikhuheeresia eshiokhunywa? ³⁸ Kata khwakhulola liina noli omucheni nikhukhwinjisia? kata noli eshiechenyi nikhukhufwala? ³⁹ Khandi khwakhulola liina nolwala, kata noli mumbohe nikhukhwitsilayo?

⁴⁰ Omuruchi alikalusia, nababoolela ari, emuboolera toto, mbu shinga olwa mwakholera mulala khubaana befwe abatiiti bano kho mwakholera sie.

⁴¹ Ne nindio aliboolera yabo abali khumukhoknokwe omukhasi mbu, rule imberi wanje inywe abalamwa mutsie mumuliro kweinziayo okwakasiribwa Setani nende abamalaikabe. ⁴² Okhuba ndali inzala nimulamba eshiokhulia ta, ndali nobuloho nimulalamba eshiokhunywa tawe. ⁴³ Ndali omucheni, nimulanzinjisia ta, eshienchenyi nimulafwala ta, ndali omulwale khandi mumbohe nimuletsa okhundola tawe.

⁴⁴ Nabo boosi balireeba bari mbu, Omwami niliina olwa khwakhulola noli inzala, nobuloho, noli eshiechenyi, noli omulwale kata mumbohe ne nikhulakhukhalabanira ta?

⁴⁵ Naye alibakalusia nababoolera mbu, ebaboolera tooto mbu, shinga olwa mulaabakholera batiiti banje bano ta, kho nindio mwachweya musio okhukholera isie.

⁴⁶ Mana bano balitsia mumuliro kweinziayo nabo abalunji nibenjira mubulamu bweinziayo.