¹ Mana Yesu narula muhekalu nachaaka okhutsia, abeechibe nabo nibeetsa ewa yali okhumumanyia amombakho keihekalu. ² Naye nakalusia nababoolera ari shimulolanga ebindu bino biosi? Emuboolera tooto mbu libulaho lichina kata elala elilatong'a khulindi elilasukunwa hasi ta.

³ Ne olwa yali niyekhaale khushikulu shiemisaituni, abeechi nibeetsa mabiswi nibamureeba bari, okhuboolerekhwo mbu nilina olwa amakhuwa kano kaliikhola? mbu neshilolero shiina eshilamanyia okhwitsakhwo nende obumalirishi bweshialo?

⁴ Mana yesu nabakalusia nababoolera mbu, mube meso mbu, omundu shialabakatia ta. ⁵ Okhuba abanji baleetsa mulira lianje nibaboola mbu, nisie Kristo ne nibakaatia abanji. ⁶ Mulahulira aka obusoolo nende obuupani ta, mwirecheshe nimuraheenda ta, okhuba yako kakhoyire okhwikhola nebutswa obumalirishi bulaba nibushiiri. ⁷ Okhuba lihanga lilabuushira khwihanga lindi, oburuchi khuburuchi bundi, khulaba nende inzala nende okhurenga khweshialo khulabaho mutsimbia tsiabukhane. ⁸ Ne kano koosi nokhuchaka butswa khwobutsuni.

⁹ Mana balamuhana mbu, munyasibwe nimwirwa, mulasirwa nende abamahanga bosi khulwa eliira lianje. ¹⁰ Mana abanji baleesichirala, nibakhobana abeene khubeene. ¹¹ Khandi abanabii bobubeyi balabuushiramwo nibakaatia abanji. ¹² Ne okhuba obumayanu bulametekha, obuheeri bwa abanji bulanyira. ¹³ Ne ulia oulefwira okhula mukhumalilikha alahonokosibwa. ¹⁴ Mana amakhuwa kano akobwami kalakambwa mushialo shiosi ne obumalirishi buloola.

¹⁵ Kho olwa muloola eshisinyo eshiaboolwa nende omunabii Danieli nishisinjiire habundu hatakatifu. ¹⁶ Mana abo abali mubuYahudi beerushire mubikulu. ¹⁷ Ne ulia ouli khushisuli shieyinzu aleekha mbu yetsa okhubukula eshindu shiosi munzu yiye ta. ¹⁸ Kata ouba nali mumukunda alakalukha ingo okhubukula ingubo ta. ¹⁹ Wowe! khubalia abaliba nibabereshe nende balia abaliba nibanuninjia mbu buliba obutinyu khubo okhwirukha. ²⁰ Musaayenje mbu, okhwirukha khwenywe shikhulekhola mumunyiri kata khusabato yosi ta. ²¹ Shichira khulabaho nende okhunyakhana okhukali okhushiri okhubakhoho okhurula okhuchaaka khweshialo khandi khulibakhoho ta. ²² Tsindalo etsio tsilabula okhutitiyibwa khane shiyakhahonibwe kata mulala tawe, nebutswa khulwa abalobole ba Nyasaye tsinyanga yitso tsiembichitibwa.

²³ Mundalo etsio omundu yesi naba nababoolera mbu, 'Lole, Kristo ali hano,' 'nohomba halia,' shimulasuubira tawe. ²⁴ Okhuba abaKristo abanji balabuukha abobubeeyi ne balakaatia abanji mbu nikaba kanyalikha bakosie kata abalobole. ²⁵ Ne lole, shimuleebirira mbu, ababoolere ebise nibishiri. ²⁶ Kata nibamuboolera mbu, lola Kristo ali mushitsiimi, shimularule tawe, mbu lole, ali ahebisu, shimulasubira tawe. ²⁷ Mbu shinga olwa olweni lwakhanga nilurula ebukwe nilutsia mumbo, nindio okhwitsa khwomwana womundu khuliba khurio. ²⁸ Ne kali habulafu khu bulimundu mbu, ewa emilambo chili, eyo niwo ewa tsingosia tsibukaniraanga.

²⁹ Ne olunyumakhwo olwa amakhuwa kano okhwikholekha, eliuba lilafunikhwa nende eshirima, omwesi nakwo shikularusia obulafu bwakwo ta, kata tsing'ining'ini okhwakha ta. ³⁰ Mana eshilolero shiOmwana wOmundu shilalolekha mwikulu mana tsimbia tsiosi tsia bomushialo tsilekhuula nitsilola Omwana wOmundu niyetsa mumaleesi komwikulu nobunyali nende oluyali olukhongo. ³¹ Mana alaruma abamalaikabe nende oluyoka olukhongo lwa olwika nabo balikhung'asia abalobolebe okhurula tsikoona tsiosi tsine tsieshialo, okhurula khundulo tsieshialo okhula khundulo tsindi.

³² Kho mweche akomukhuyu mbu tsisaka tsiakhwo olwa tsibetsanga nitsiakhakalukha tsimbisi nikusebukha amasafu kakhwo. ³³ Mumanyanga tsinyanga tsiomubasu tsiulire. Kario khwinywe mbu olwa mulola amakhuwa kano kosi nikekholekha mumanye mbu obumalirishi busitire ahambi hamuliango. ³⁴ Ebaboolera obwatieri mbu, oluyia luno shilulahwaho amakhuwa kano kashiri okhwikholekha ta. ³⁵ Likulu nende eshialo bilabira ne habutswa likhuwa lianje shilibura ta.

³⁶ Ne inyanga eyo abulaho ouchimanyire, kata omwana, kata malaika abulaho, Papa yenyene. ³⁷ Ne shinga olwa tsinyanga tsia Noa tsiali nindio tsinyanga tsiokhwitsa khwomwana womundu tsiliba. ³⁸ Mbu shinga olwa bali nibaliitsanga nende okhunywa nibateshinjia nende okhuteshibwa, mundaalo etsio Omuyembo nikurashiabaho ta, okhuula khunyanga eyo eya Noa yenjira musafina, ³⁹ Nibaramanya ta okhuula olwa Omuyembo kwoola nikubakholomosia boosi, nolwa okhwitsa khOmwana wOmundu khuliba. ⁴⁰ Mana abandu babili balaba nibali mumukunda; mulala alabukulwa ne mulala atong'a. ⁴¹ Abakhasi babili baliba basietsanga, mulala alibukulwa ne oundi alitong'a. ⁴² Mube meso shichira shimumanyire inyanga eya Omwami wenywe aletsa ta. ⁴³ Ne mumanye likhuwa lino mbu, omundu omulayi niyakhamanyire eshise eshia omwifi aleetsa, shiyakhaleshere inzu yiye ifunakwe ta. ⁴⁴ Kho kario nineenywe mwesi mbu khunyanga yilia eyamulamanyire ta Omwami wenywe aleetsa.

⁴⁵ Ni wina oyo Omusumba Omwisikwa khandi Omuchesi wOmwamiwe aleshera abeinzuye mbu, abaheeresie eshiokhulia khubise bikhoyeere. ⁴⁶ Noweikhabi owa Omwamiwe aletsa nanyoola nakholanga ario. ⁴⁷ Ebaboolera tooto alamuheeresia abe Omukhongo webindubie biosi. ⁴⁸ Ne Omusumba oyo Omusiru naba naboola mumwoyokwe mbu, Omwami wanje ashindire; ⁴⁹ mana nachaka okhuupa abasumba bashie, nalia nanywa nende abameesi; ⁵⁰ Omwami wOmusumba oyo aleetsa khunyanga yalaparire ta, khandi khusa eyalamanyire ta, ⁵¹ namurememwo ebitonye bibiri ne omukabokwe alamuhaana khubakaati, ebweneyo khulabayo okhulira nende okhusia ameeno.