¹ Ne Yesu nakalusia khandi nababoolela mutsinjero ari; ² Obwami bwo Mwikulu buli shingana Omuruchi wundi owakasia lisabo lieshiserero shiomwanawe. ³ Ne naruma abasumbabe okhubalanga abali nibalanjirwe mushiserero, ne shibamala nibetsa ta. ⁴ Khandi naruma abasumba bandi ari, baboolere balia abalanjirwe mbu 'lole' emalire okhuteekha ebiliibwa bianje, ichirushi nende ebimoosi bianera bisinzirwe, ebindu biosi biirechekhwe, mwitse mwisabo lieshiserero. ⁵ Nabo nibakabukulira amangu, nibatsiririra nende emilimo chiabwe, oundi mumukundakwe, oundi khubukhalabwe. ⁶ Ne abandi nabo nibabukula abasumbabe, nibabakhupa nibabeera. ⁷ Ne Omuruchi olwayahulira yasinyikha muno ne naruma amahe kabasikaribe ne nibamulula abeeri abo nende okhusamba litookho liabwe. ⁸ Mana nababoolera abasumbabe mbu "Lisabo lieshiserero lirechekhwe nebutswa abalangwa shibakwanira tawe. ⁹ Kho mutsie khumihanda mulanje boosi abamunyoolakhwo betse mwisabo lieshiserero. ¹⁰ Kho abasumba abo nibarula nibatsia khumihanda nibakhung'asia boosi ababanyalirwa okhunyoola, ababi nende abalayi, ne eshiserero nishitsulamwo abacheni. ¹¹ Omuruchi yenjira mbu, alole abacheni, ne nalola Omundu undi ourali nafwalire tsingubo tsieshiserero ta, ¹² Ne Omuruchi namureeba ari, owashianje winjiire orie muno norafwalile tsingubo tsieshiserero, naye nabula eliakalusia. ¹³ Mana Omuruchi naboolera abasumbabe, "Mubohe amakhono nende ebilenje," Mumubukule mumusukune elwanyi mushirima, ebweneyo alalira nende okhulumaasia amenoke. ¹⁴ Abanji balangwa nebutswa nibatiti abaahulwa.

¹⁵ Mana abaFarisayo barula nibatsia okhwirechekha shinga olwa bakhamureka mukhuboolakhwe. ¹⁶ Nibamurumira abeechi babwe nende aba Herode nibaboola bari, Omwechesia khumanyile shinga olwa oli Omwechesia watooto ne wibalaanga injira ya Nyasaye mubwatooto norateebanga akomundu yesi ta; shichira shiopaaranga khushiimo shiomundu yesi ta. ¹⁷ Ne bulano khuboolere ololanga orie? Khukhoyeere okhurunga obushuru khuKaisari, nohomba ta?

¹⁸ Ne butswa Yesu nalola obumayanu bwabwe, kho nababoolera ari, mundeema shichira shina enywe abekaatii? ¹⁹ Manyiekhwo amapesa kene akobushuru, ne nibamurerera itinari. ²⁰ Naye nabareeba ari, obukondo buno nende elira ni bia wina?

²¹ Ne bamukalusia ne biaKaisari, ne nababoolera mumurunjenje Kaisari ebili bia Kaisari nebili bia Nyasaye mumurunjenje Nyasaye. ²² Ne olwa bahulira amakhuwa kano hahukana nibamulekha nibatsia ewabatsia.

²³ Inyanga yene eyo nibamwitsira abaSadukayo ababoolanga mbu, obulamushi bubulaho ne nibamureba? ²⁴ Nibaboola bari omwechesia, Musa yaboola ari, omundu nafwa narali nomwana, omusiani wabwe alateshia omukhasiwe ne achinguule olwibulo lwomusiani wabwe. ²⁵ Kho baliho abasiani musafu abamenyanga ninefwe, ne owambeli olwayateshia omukhasi naye nafwa, ne olwa arali nolwibulo ta, namuleshera omusiani wabwe omukhasi oyo. ²⁶ Kho malala yako khandi khu wakhabiri, owakhataru mana okhula khu womusafu. ²⁷ Ne olunyuma omukhasi oyo namala yesi nafwa. ²⁸ Kho bulano mubulamushi omukhasi uno nowawina khu bano musafu, okhubera mbu bosi bamuteshia?

²⁹ Yesu nabakalusia nababoolera ari, mukorirwe, shichila shimumanyire amaandiko noho obunyali bwa Nyasaye tawe. ³⁰ Okhuba mubulamushi shibateshia kata okhuteshibwa ta, ne halali shinga abamalaika ba Nyasaye mwikulu. ³¹ Ne khumakhuwa kobulamushi bwabafu, shimwasoomakhwo akomwaboolerwa nende Nyasaye naboola? ³² Nisie Nyasaye wa Aburahamu khandi Nyasaye wa Isaka, Yakobo, Nyasaye shali Nyasaye wabafu tawe habula owabalamu.

³³ Ne olwa abemikanda bahulirakhwo amakhuwa yako bahuchisibwa muno nende ameechesioke.

³⁴ Olwa abaFarisayo bahulira mbu Yesu aholelesiye abaSadukayo, bakhung'ana halala. ³⁵ Ne mulala khubo owali omukhulundu wamalako namureeba liirebo khulwa okhumuteema naboola ari, ³⁶ "Omwechesia liri hena lilako likhongo mumalako koosi?

³⁷ Yesu nakalusia namuboolera ari, "Oheere Omwami Nyasayewo nomwoyokwo kwosi, neshiimoshio shiosi nende okhuhiririsiakhwo khwosi. ³⁸ Lino nilio lilako likhongo muno khandi likhulundu mukoosi. ³⁹ Eliakhabiri eliri shinga elo ndielino mbu, "Oheele owashio shinga olwa wiheera omwene". ⁴⁰ Amalako koosi nende obunabii biileetanga khu kano kabiri.

⁴¹ Olwa abaFarisayo bakhung'na halala, Yesu yabareeba, ⁴² Naboola mupaara murie khumakhuwa ka Kristo? Nomwana wa wina? Nibamukalusia nibaboola bari, "Nomwana wa Daudi."

⁴³ Nababoolera ari, kho Daudi amulangarie mbu, Omwami? Niyeebalirwa nende Roho ari, ⁴⁴ Nyasaye yaboolera Omwami wanje ari, "Yikhala khumukhono kwanje omusaatsa okhula olwa era abasukubo hasi webirenjebio." ⁴⁵ Kho Daudi naba niyamulanga mbu, Omwami, Kristo yakhaba arie omwanawe? ⁴⁶ Abulaho owanyalirwa okhuheresia Yesu likalusio ta, Ne okhurula inyanga eyo abulaho Omundu owatsalikha okhumureeba amareebo khandi tawe.