¹ Olwa Yesu nende abeechibe bali ahambi nende Yerusalemu, boola eBetsefage, hashikulu shiEmiseituni, yaho Yesu yaruma abeechibe babili batsie imbeliwe. ² nababoolera ari, mutsie mwitaala liheengane ninenywe, ne mulanyoola isishiri niyiboherwe nende eshimosi shiayo, mubiboholole mubinderere. ³ Ne omundu niyakhamureeba likhuwa liosi mumuboolele mbu, omwami abienya, ne omundu oyo alabilekhula.

⁴ Kano nako kekholekha khulwa okhuusia akaboolwa nende omulakusi mbu; ⁵ "Muboolere abandu ba Sayuni mbu Omwami wenywe yetsaanga ewa muli, nomuholo, ne uninire khushimosi shieisishili."

⁶ Abeechibe nibatsia, nibakhola shinga olwa Yesu yali nababoolele. ⁷ Nibamurerela isishili nende eshimosi shiayo, nibaalakhwo ebifwalo biabwe ne naye Yesu niyekhalakhwo. ⁸ Ne omukanda omukhongo okwa abandu baala ebifwalo biabwe khunjira, ne abandi nibarema amasaka akemitende nibaala khunjira. ⁹ Emikanda chiabandu nichiimira nende okhumulondakhwo, nibalanjirisia mbu; "Omwana wa Daudi yetsomibwe! Noweikhabi owitsa muliira liOmwami! Nyasaye ouli ikulu mwikulu yetsomibwe.

¹⁰ Ne olwa yesu yenjila eYerusalemu, abandu boosi bomwitookho batsatsala muno, nibareeba bari, "Uno ni wina?"

¹¹ Abemikanda nibakalusia bari, uno niye omulakusi Yesu okhurula mwitookho lia Nasareti muGalilaya."

¹² Mana Yesu niyenjila muhekalu. Nalonda abandu boosi abali nibakholeraangamwo obukhala. Nafumamia etsimesa etsiabafunji bamapesa nende ebifumbi bia abakusi bamahuusi. ¹³ Nababoolela ari, "Kahandikwa mumahandiko mbu, Nyasaye yaboola mbu, Ihekalu yanje ilalangungwa mbu; 'inzu yamasayo,' nebutswa inywe muchikholele habundu wabanuuli."

¹⁴ Ne ababofu nabalema nibamwitsila muhekalu nabahonia.

¹⁵ Nebutswa olwa abakhulundu babakuhani nende abahandiichi balola amangalimwa aka yali nakholanga, nende abali nibalanjirisinjia muhekalu mbu, "Omwana wa Daudi yetsomibwe!" basinyikha muno.

¹⁶ Nibareeba Yesu mbu, ohuliranga akaboolungwa? Naye nabakalusia mbu, "ehuliranga; ne mushiri okhusoomakhwo amahaandiko kaboolanga mbu, okhurula muminwa chiabaana abatiti nende tsindaana Nyasaye omwene yeekasirie obwitsoomi?

¹⁷ Mana Yesu nabalekha narula mwitookho natsia eBetsania niyeyalisiayo eshiro isho.

¹⁸ Mumabwibwi olwa Yesu yali nakalukhanga mwitookho, yahulira inzala inyinji munda. ¹⁹ Nalola omukhuyu khundulo weinjira, natsia ewa kwali, ne nalanyoolakhwo eshindu ta, habula amasafu konyene. Obulayanza naboolela omukhuyu ikwo mbu, "shiolamakhwo ebiamo khandi tawe!" habwene nahabwene omukhuyu nikuniala.

²⁰ Ne olwa abeechi balola, bachenya, nibareebana bari, omukhuyu kubere kurie okunialire tsa bwangu kurio?

²¹ Ne naye Yesu nabakalusia ari, "Emuboolela toto mbu, nimuba nimusuubira nimulakanakania ta, munyala okhukhola akekholere khumukhuyu yikwo, ne shikali kano konyene, nebutswa munyala okhuboolela eshikulu shino mbu 'wichinje wisukune munyanza,' ne shilakhola shirio. ²² Ne nimuba nimusuubila, mulanyoola shiosi eshiamusaba mumasaayo.

²³ Yesu nakalukha muhekalu ne olwa yali niyechesinjia abakhulundu babakuhani nende abakofu betsa khuye nibamureeba mbu, "Nibunyali shiina obwa oli ninabwo okhukhola ebindu bino, Niwina owakhuheresia obunyali buno?"

²⁴ Yesu nabakalusia mbu, Ndalamureeba lireebo elala ne nimuba nimunjiiba, ndalamumanyia obunyali obwa endi ninabwo obukholanga ebindu bino. ²⁵ Obunyali obwa Yohana omubaatisi bwarula heena, Bwarula khu Nyasaye nohomba khumundu? nibachaka okhuyingana abeene khubeene mbu, "Nikhwakhakalusia mbu burula khu Nyasaye, alakhuboolela mbu, shiina eshichila nimulasuubila Yohana?" ²⁶ Ne nikhuboola mbu, "bwarula khumundu, khurire emikanda, shichila boosi baloolanga Yohana shinga nomulakusi." ²⁷ Nibakalusia Yesu nibaboola bari "shikhumanyile ta," naye naboola mbu, "kata siesi shiebaboolela mbu nobunyali shiina obwa ekholeranga kano ta."

²⁸ Mulola murie? Yaliho omundu owali nabasiani babiri. Natsia khumulala namuboolela mbu, "mwanawanje, tsia okhole emilimo mumukunda kwe mitsabibu inyanga ino."

²⁹ Omwana wuyo namukalusia mbu "shinzia ta," ne halali olunyuma nakalukhasia amapaaroke mana natsia.

³⁰ Khandi namutsiira omwanawe wakhabiri, namuboolera amakhuwa malala yako, naye namukalusia, "Ee Papa ndalatsia," ne halali shiyaatsia ta. ³¹ Nouli hena khubabiri yabo owakhola akasamwana yenya? Nibakalusia mbu, "omukhulundu." Kho Yesu nababoolela mbu, "Emuboolela mbu abasololi bobushuru nende abatamba balamuranjirira okhwinjila mubwami bwomwikulu. ³² Okhuba Yohana omubaatisi yamwitsira, yetsa namumanyia injila yobulunjishi ne shimwamusuubila ta, ne abasololi bobushuru nende abatamba bamusuubirira. Ne kata olwa mwalola kano shimwamala mwikalukhasia mumusuubilira ta.

³³ Yesu naboola ari, "Recheresie oluchero luno, yaliho omundu owaraka omukunda kwemitsabibu, nakusira nende olukaka, nayaba obwina bwokhutinyilamwo amatsi kemitsabibu, niyombakha inzu yabalindi, nakuhosia khubalindi, mana narula natsia mushialo shindi. ³⁴ Olwa lichesa liola, yaruma abakholibe okhutsia khubalimi yabo okhunyoola eshitonyeshie shielichesa. ³⁵ Abalimi yabo nibatiira abakholibe yabo, mulala nibamunywekha, oundi nibeera, noundi nibamulasa amachina. ³⁶ Khandi naruma abakholi bandi abayomba abeimberi, mana abalimi yabo nibabakholera malala yako. ³⁷ Olwokhumalilikha yaruma omwanawe khubo, naboola mbu, "Balaheresia omwana wanje oluyali."

³⁸ Nebutswa olwa abalimi bamulola baboola bari, "Uno niye omwene obulaame bwomukunda kuno; kho yitse khumwire mana obulaame bulaba obwefwe!" ³⁹ Nibamutiira, nibamurusia mumukunda kwemitsabibu nibamwira. ⁴⁰ Yesu nabareeba mbu, "Bulano mwene omukunda kwemitsabibu olwa yetsa alabakholela shiina abalimi yabo?"

⁴¹ Nibamukalusia, "Alabeera abandu ababi yabo, mana ahosie omukunda kwemitsabibu yikwo khubandu bandi, abalamuheresinjia eshitonyeshie eshielichesa mubise ebikhoyeere."

⁴² Yesu nababoolela ari, "Shimwasoomakhwo amahandiko kano ta? mbu; Lichina liene elia aboombashi baloba likholerwe olwanziro lwomukoona. Kano kakholwa nOmwami nakokhuhuchisia mutsimoni tsiefwe.

⁴³ Kho khulwa yako emuboolela mbu, Obwami bwa Nyasaye bularusibwa khunywe nibuheresibwa lihanga elibula ebiamo. ⁴⁴ Ne nokwa khwichina lino olafunikhamwo ebitonye, ne lichina lino nilikwiila omundu yesiyesi lilamutubulila elala.

⁴⁵ Ne abakhulundu babakuhani nende abaFarisayo olwa bahulira amafumboke, balola mbu aboolanga bo. ⁴⁶ Beenya okhumutiira ne halali bariitsanga emikanda emikhongo echiamulondangakhwo shichila mbu nomunabii.