¹ Obwami bwomwikulu bufwananibwa shinga omundu owelitaala owarula mumabwibwi natsia okhukhaaba abakholi bomukunda kwemitsabibuchie. ² Olwa yafuchirisania nende abakholi mbu, alabarunga itinari ndala khunyanga, yabaruma mumitsaabibu chichie. ³ Ne naye narula khulisa liakhataru ne nalola abandu bandi nibasiinjiire haluyia nibabula eshiabakhola, ⁴ Ne nababoolera mbu, tsie mumitsabibu chianje ndalabaheresia eshilaba nishimukhoyere, ne nabo nibatsia. ⁵ Khandi yamala narula khulisa liakhasasaba nende elia shienda khandi nakhola ario. ⁶ Ahambi khulisa elia ekhumi nende elala, yarula nanyoola khandi abandi nibasinjire, nabareeba ari, mbushina nimusinjira hano eshitere shiosi nimulakhola shiosi ta?

⁷ Nabo nibamukalusia mbu, shichila abulaho owitsire okhukhukhaaba khumukholere. Naye nababoolera mbu, mwesi tsie mumitsaabibu chianje, ne eshilaba shibakhoyeere ndalabaheresia.

⁸ Ne olwa ebise biokhwinukha bioola, omwami mwene mitsaabibu naboolera omusinjiriri wuwe mbu, langa abakholi mana obarunje emirungo chiabwe, ochachile khubalia abetsele mukhumalirikha notsia khubalia ababere bokhuranga. ⁹ Nibeetsa balia abali nibabukulwe okhutiiya khulisa elia ekhumi nende elala, buli shiamulala yabukula itinari ndala. ¹⁰ Ne olwa balia abali baranjirire mumukunda beetsa, bapaara mbu balarungwa akasitirekhwo; boosi barungwa itinari ndala shingana abandi. ¹¹ Ne nibamalire okhubukula itinari, bachaaka okhwiniakanira mwene omukunda.

¹² Nibaboola mbu, ababeere bokhumalirikha bakholere lisa elala lionyene, nawe obakholere okhuherana ninefwe abakholere emilimo emisiro khumubasu eshiteere shiosi!

¹³ Naye nakalusia nareeba mulala khubo mbu, omwitsa shekhukholeere libii liosi ta, shikhulakaane mbu ebarunje itinari? ¹⁴ Bukula shilia eshili eshishio mana otsie, nokhuchama khwanje okhuheeresia owokhumalirikha shinga olwa ekhuheresiye.

¹⁵ Shikakhoyere mbu, ekhole elia ndeenya nende ebili ebianje? nohomba ouliire obubi shichira endi omuhaani? ¹⁶ Owokhumalirikha alaba wokhuranga ne naye wokhuranga alaba wokhumalirikha, okhuba abanji balangwa, halali nibatiti abahulwa.

¹⁷ Olwa Yesu yali khuluchendo okhutsia Yerusalemu, yabukula abeechibe ekhumi nababili, nabakwenya khunjira nababoolera ari; ¹⁸ Lole, khuchomere eYerusalemu, naye Omwana wOmundu alahanwa mumikhono chiabakuhani abakhongo nende bahandichi, nabo balamukhalachira eshiina shiokhufwa. ¹⁹ Khandi balamuhaana khubalia abamahanga okhumutsesherera, mana bamusalisie, khandi bamubaambe, naye khunyaanga yakhataru yakhalamushe khandi.

²⁰ Olunyuma lwene nyinamwana abasiani ba Zebedayo niyeetsa aha yali halala nende abaanabe, namwinamira, nali nende elienya nalebe. ²¹ Naye namureeba ari, wenya shiina? Ne naye namukalusia ari, subisia mbu abaana banje bano mulala yakhekhale omukhonokwo omusaatsa ne naye oundi khumukhonokwo omukhasi mubwami bubwo.

²² Naye Yesu namukalusia namuboolela ari, shiomanyire eshiosabanga tawe. Munyala okhunywakhwo khushikombe eshiendi ahembi okhunywakhwo? Mubatisibwe ibaatiso eyanditsa okhubatisibwamwo? Ne nabo nibamukalusia bari khunyala.

²³ Nabakalusia nababoolela, obulamba buli mbu namunywe eshikombe shianje khandi namubatisibwe ibaatiso yanje eya nditsa okhubatisibwamwo, halali okhwikhala omukhono omusaatsa nohomba omukhasi shindi nisie ouhananga tawe, habutswa bulahebwa balia abakasiribwa nende Papa wanje.

²⁴ Nabo balia ekhumi olwa bahulirakhwo yako, lirima nilibaiyiinga khulwa babiri yabo. ²⁵ Yesu nabalanga bosi betsa aha yali, naye naboola ari, mumanyire shinga abaruchi bAmahanga olwa babaamihanga, khandi abakhongo babwe shinga olwa babarukanga? ²⁶ Habutswa shikala kario hakari wenywe ta; halali yesi yesi owitsa okhwenya okhuba woluyali olukhongo mwiinywe, akhoyeere okhuba omurumushi wenywe; ²⁷ Khandi yesi yesi owenya okhuba omuruchi hakari wenywe, leshe abe omusumba wenywe. ²⁸ Shingana kali, Omwana wOmundu shiyayitsa mbu arumushirwe tawe, halali mbu arumushe, mana ahane obulamu bubwe shingana omusango khulwa abanji.

²⁹ Ne olwa bali nibarulanga Yeriko, omukanda omukhongo nikumulondakhwo. ³⁰ Lola, abandu babiri ababofu abali nibekhaale khundulo womuhanda, olwa bahulira mbu ni Yesu owubiranga, balanga nomwoyo omukhongo; ee Omwami, ewe Omwana wa Daudi, khubeere tsimbabasi. ³¹ Nakwo omukanda nikubayibira, mbu behotseresie nomulembe, kata kario bameeta okhulanga nende omwoyo omukhongo, Ee Omwami, ewe Omwana wa Daudi, khubeere tsimbabasi.

³² Yesu nasinjira nabalanga, nabareeba, ni shiina eshiamwenya mbu ebakholere? ³³ Nabo nibakalusia bari, Omwami nochama okhwikule tsimoni khulole. ³⁴ Yesu nabalolera eshibeera, mana nabatiira khutsimoni tsiabwe nitsinyoola obunyali bwokhulola, nabo nibamulondakhwo.