¹ Ne olwa Yesu yali namalile amakhuwa kene yako, yarula eGalilaya niyoola mutsingongo tsiebuYahudi injelekha wa Yorodani; ² Ne emikanda emikhongo chiamulondakhwo ne naye nabahoniriayo.

³ AbaFarisayo bosi nibamwitsira okhumuteema nibamureeba bari, nobulayi omundu okhumulekha omukhasiwe khulwa eshifune shiosi shiosi?

⁴ Naye nabakalusia nababoolela, mushiri okhusoma mbu, owabalonga okhurula mubuchachiro yalonga omukhasi nende omusatsa, ⁵ Ne naboola mbu, khulwa eshifune shino, omusaatsa alalekhanga samwana nende nyina, ne yetsa okhuungana nende omukhasiwe, nabo babili betsa okhuba omubili mulala. ⁶ Khulwesho shibali khandi babiri ta, halali mulala, ne eshia Nyasaye arere halala, omundu shialakabukhasia ta.

⁷ Ne nibamureeba mbu, shichila shina Musa yabeyamila okhuhana ibarwa yokhulekhana nende okhumulekha?

⁸ Naye nababoolera mbu, Musa khulwa obumu bwemioyo chienywe, yabeyamira okhulekhana nende abakhasi benyu, halali okhurula mubuchachiro shikali kario ta. ⁹ Ne nasi emuboolela mbu, omundu yesi owitsa okhulekhana nende omukhasiwe khulwa obutamba mana ateshie oundi, aheya, khandi yesi outeshia oulesherwe; aheya.

¹⁰ Ne abeechibe nibamuboolela mbu, amakhuwa komukhasi nende omusaatsa nikakhaba kario, shibuli obulayi omundu okhuteshia ta.

¹¹ Ne naye nababoolela mbu, abandu bosi shibanyala okhwiyama amakhuwa kano tawe, habula abanyalirwa bonyene, ¹² Shichila khuli nende abalate bandi abebulwa bario okhurula mundaa mwa nyina; khandi khuli nende abandi abakholwa nende abandu okhuba abalate; khandi khuli nende abandi abekhola abalate abeene khulwa oburuchi bwomwikulu, ounyala okhuhulira nende okhukeyama, akabukule.

¹³ Mana nibamurerera abaana abatiti mbu, abarekhwo emikhono nabasayira; nabo abeechibe nibabayibira. ¹⁴ Ne Yesu nababoolera mbu leshe abaana abatiti betse khwisie, shichila obwami bwomwikulu nobwa abafwana shingana yabo. ¹⁵ Ne nabarakhwo emikhono nabalamira ikhabi ne narulaho.

¹⁶ Khandi lola, olwa Yesu yali nachendanga, omundu mulala yamwitsila namureeba ari, Omwibaali, enyala okhukhola endiena kho enyale okhwinjira mubwami bwomwikulu?

¹⁷ Ne naye namureeba ari, shichira shina niunanga omulayi? abulaho omulayi halali mulala ouli Nyasaye, ne nikakhaba mbu wenya okhwinjira mubwami bwomwikulu, olinde amalako ka Musa.

¹⁸ Namureeba akalena? Yesu namukalusia mbu ni kano; shioleera ta, sholaheya ta, sholeba ta, sholainia obuloli bwobubeyi ta, ¹⁹ Heresia Papa nende Mama oluyali, khandi oheele omumenyiwo shinga olwa wiheera omwene.

²⁰ Ne Omubukha wuyo namuboolera Yesu mbu, kano kosi ndakalinda okhurula mubwana bwanje, nishiina shienemerwa?

²¹ Yesu namuboolera mbu, niwenya okhuba Omulunjishi tsia okusie biosi bioli ninabio, mana oheresie abamanani, bulano witsa okhuba nende libishilo mwikulu; mana witse unondekhwo. ²² Ne olwa omubukha uno yahulira amakhuwa kano, yatsia mushibeela shichila yali nende emiandu eminji.

²³ Naye Yesu naboolera abeechibe mbu, ebaboolela toto mbu buliba obutinyu omundu omuyinda okhwinjila mubwami bwomwikulu, ²⁴ Khandi ebaboolera mbu, nobwangu ingamia okhubira mutundu yeisindani okhushira omundu omuinda okhwinjila mubwami bwomwikulu.

²⁵ Ne olwa abeechibe bahulira yako, bahuchisibwa muno, nibareeba; niwina bulano ounyala okhuhonibwa?

²⁶ Halali Yesu yabahenga nababoolera mbu, nende abandu kano shikanyalikhana tawe, ne halali khu Nyasaye kosi kanyalikhana.

²⁷ Naye Petero nakalusia namuboolera mbu, lola, efwe khwalekha koosi nikhukhulondakhwo, khwitsa okhunyoola shiina bulano?

²⁸ Khandi Yesu nababoolera mbu, toto ebaboolela, enywe abanondangakhwo, mushialo olwa Omwana wOmundu aliikhala khushifumbi shioluyalilwe, nenyu mwesi mulikhala khubifumbi ekhumi nabibiri nimubayasia abetsimbia ekhumi nende nende tsibiri tsia Isiraeli. ²⁹ Ne yesi yesi owalekha inzuye, nohomba omusiani, nohomba omukhaana, nohomba papa, nohomba mama, nohomba omukhasi, nohomba omwana, nohomba omukundakwe khulwa eliira lianje, yetsa okhunyoola liboho imia ndala khandi alilia obulaame bwobulamu bweinziayo.

³⁰ Halali abaanji abali beimbeli betsa okhumalirikha; nabo abamalirikha betsa okhuba imberi.