¹ Khushise eshio abeechi nibeetsa ewa Yesu yali, nibamureeba, mbu kho niwina omukhongo mubwami bwomwikulu?

² Ne Yesu nalanga Omwana omutiti namura hakari wabo, naboola mbu; ³ Emuboolera toto mbu, nimuba nimuletutuyia mwaba shinga abaana abatiti, shimulinjira mubwami bwo Mwikulu ta. ⁴ Kho omundu yesi owitutuia naba shingana omwana omutiti, omwene oyo nomukhongo mubwami bwomwikulu. ⁵ Khandi omundu yesi owinjisia omwana omutiti shichila elira lianje, yanzinjisia.

⁶ Ne omundu yesi owisichirasia mulala khubatiti bano abasubiranga nobulayi abohwe lichina likhongo mwikosi mana asukumwe mulusiba olwomunyanza. ⁷ Woowe khubalia abesichirasia abashiabo shichila ebisichirasio shibilichweya okhubaho ta, ne halali woowe khu ulia ourera eshisichirasio. ⁸ Ne omukhonokwo nohomba eshirenjeshio nishiba nishikhwinjisia mutsimbi, oshireme, nobulayi winjile mubwami noli omulema kata outiechera okhushila okhusukunwa mumulilo kweinziayo noli nemikhono chibiri kata ebilenje bibiri. ⁹ Kata imoniyo niyiba nikhwisichirasia, ochitsomole ochisukune ehale, nobulayi winjile mubulamu noli oweimoni ndala okhushila okhusukunwa muGehena yomulilo noli netsimoni tsibiri.

¹⁰ Mwiyile kalaha, muleshe okhufwola mulala khubatiti bano okhuba emuboolela toto mbu, mwikulu abamalaika babwe obushia balolanga obweni bwa Papa ouli mwikulu. ¹¹ Shichila Omwana womundu yetsa okhuhonia eshiali nishiakora. ¹² Muluutsi murie? Omundu yesi naba nali nende amakondi eshikhumi, elala khuko niliba nilikora shialalekha kalia amakhumi shienda nashienda natsia mubikulu nakhaaba elikorire? ¹³ Ne naba nalinyoola, emuboolela toto, mbu aliikhoyeranga muno okhushira kalia amakhumi shienda nashienda akalakorirekhwo ta. ¹⁴ Kho kario mbu kata seenywe ouli mwikulu shianyala okhuchama mbu mulala khubatiti bano akore ta.

¹⁵ Ne omusiani weenywe naba nakhukosera tsia omumanyie eshikhashie nimuli mwenyene ewe ninaye; naba nakhuhulira, olaba nonyolere musiani wenywe. ¹⁶ Ne naba nalakhuhulila ta, otsie nende oundi mulala kata babiri mbu, khuminwa chiabaloli babiri kata bataru buli likhuwa litinyisibwe. ¹⁷ Ne naba naloba okhubahulira, oboolere ikanisa, ne naba naloba okhuhulira kata ikanisa, abe khwiwe shinga na omunashialo nomusololi wobushuru. ¹⁸ Emuboolera toto mbu, ebindu biosi ebia bulabohanga mushialo, bilabohwa mwikulu. ¹⁹ Khandi ebaboolela toto mbu, babili khwinywe nimuba nimufuchirisania mushialo khwikhuwa eliamusaba lilakholwa lirio nende Papa ouli mwikulu. ²⁰ Okhuba aha babiri nohomba bataru bakanira halala muliira lianje, nasi ndalaba halala ninabo.

²¹ Kho Petero niyetsa namureeba ari, Omwami, omundu yangosera amakhabi kanga nasi nemuleshelanga? okhuula musafu noho?

²² Ne yesu namukalusia ari, shikhuboolela mbu okhuula musaafu ta habula mbu okhuula amakhumi musaafu nende musafu. ²³ Kho Obwami bwomwikulu bucherasibwa nende Omuruchi owali niyeenya okhubasia emianduchie nende abasumbabe. ²⁴ Ne olwa yali nachaachile okhubala, yaleelerwa oundi owali nelikofi ebikhumira likhumi lietsitalanda. ²⁵ Ne olwa yakhaywa okhuurunga, Omwamiwe yalachirisia mbu akusibwe halala nende omukhasiwe, abaanabe, nemianduchie chiosi mbu arungwe likofi. ²⁶ Ne Omusumba oyo nakwa mumakuluke namusaya mbu, Omwami unzifile ndalakhurunga. ²⁷ Kho Omwamiwe namubeela, namulakhuula, namuleshera likofi. ²⁸ Ne olwa omusumba oyo yalakhuulwa, yatsia nanyoola omusumba washie owali nende likofilie elietsitinari ekhumi, namutiira, namuboha emikhono, namutiira mwikosi namuboolera ari runga likofi lianje.

²⁹ Omusumba washie nakwa mumakuluke namusaya mbu nochama mbeera tsimbabasi nekhurunje. ³⁰ Naye naloba natsia namura mumbohe mbu okhuula amurunje likofilie likhoyeere. ³¹ Kho abakholi bandi olwa balola kosi akekholekha nibaberera muno, nibatsia nibamuboolera Omwami wabwe kosi akali nikekholeshe,

³² Kho Omwami namulanga omukholi uno, namuboleera ari, ewe omukholi omubii, shindakhuleshere likofi likhongo shinga wasaba mbu obeerwe? ³³ Kho, mbu shina nawe shionyala okhuleshera owashio ta. ³⁴ Kho Omwamiwe nasinyikha muno namuyira mumboye khushinyaasio okhuula arunje likofi liosi likhoyeere. ³⁵ Kho Papa womwikulu alamukholera ario enywe nimuba nimulabaleshera abashienywe ta.