¹ Ne olwa tsinyanga tsisasaba tsiali nitsiweere, Yesu yabukula Petero nende Yakobo nende Yohana omusiani wabwe natsia ninabo ikulu khushikulu. ² Ne ebweneyo Yesu nakalulwa likondolie imberi wabwe, niliakha shinga na eliuba, tsingubotsie nitsiakha shinga na omubasu. ³ Ne lola, Musa nende Eliya nibabaloleshera, nibabolanga ninaye. ⁴ Mana Petero nakalusia, namuboolela Yesu ari, Omwami, nobulayi okhuba hano; noba nochama mana khumbashe amatiri kataru; elirio, elia Musa nende elia Eliya.

⁵ Ne olwa yali nashiboolanga lola, lileesi ling'inang'inanga liabafunikha ne lola, Omwoyo omukhongo nikurula mwileesi nikuboola kuri; Wuno niye Omwana wanje owandaheera, mumuhulire. ⁶ Ne olwa abeechi bahulira, bakwa hasi mafumama nibali nende oburii obunji po.

⁷ Yesu niyetsa nabatilakhwo nababoolera mbu bushe; shimularia tawe. ⁸ Nibachingula tsimoni, shibaalola omundu wundi yesi ta, halali Yesu yenyene.

⁹ Ne olwa bali nibashiikhanga okhurula khushikulu, Yesu nababoolela lole, mulaboolerakhwo omundu Yesi akelibisulo lino ta, okhuula olwa Omwana wOmundu alaba nalamuushe okhurula mubafu.

¹⁰ Abeechibe nibamureeba bari, nishiina eshichira abahandichi nibaboola mbu Eliya akhoyeere okhwitsa mberi?

¹¹ Yesu nabakalusia naboola mbu, toto Eliya yeetsa nende okhukalukhasia ebindu biosi. ¹² Nasi ebaboolera mbu Eliya yamala okhwitsa, nibaramumanya ta, ne bamukholera koosi akabeenya, Khandi nolwa Omwana wOmundu yesi alefwila akabwe. ¹³ Kho abeechibe nibamanyirisia mbu ababooleranga aka Yohana Omubatisi.

¹⁴ Ne olwa Yesu nende abeechibe boola ahomukanda kwali, omusatsa wundi namwitsira namusikamira naboola mbu; ¹⁵ Omwami khola aketsimbabasi khumwana wanje okhuba noweindulume ne akhanji akwitsanga mumulilo khandi mumatsi. ¹⁶ Ne lola, emurere khubeechibo ne halali shibanyalirwe okhumuhonia ta.

¹⁷ Yesu nakalusia naboola ari; enywe abolwibulo olumayanu, olulasubiiranga ta, nembetsenje ninenyu okhuula liina? Murere hano. ¹⁸ Olwabamurera khuye; yakondoshera litimoni ne nilirula, omwana nahona okhurula olwenolo.

¹⁹ Olunyuma abeechi betsa ewa Yesu yali nali nibareeba bari; nishiina eshichilire efwe nikhulanyalirwa okhulirusia ta?

²⁰ Naye nakalusia naboola ari, shichila obusubili bwenyu nobuleemu, ne ebaboolera tooto mbu nimuba nimuli nende obusuubiri shinga imoni ndala eya olufwa lwelisaatsi, mulaboolera eshikulu shino mbu, rula hano otsie hano nashio shilarulaho; ne shililabakhoho likhuwa liosi elilamunyalishila ta. ²¹ Ne imbia ino shiyirulanga butswa ta halali okhusaaya nende okhwihima.

²² Olwa abeechi bali nibamenyile eGalilaya, Yesu yababoolela mbu, Omwana wOmundu alahanwa mumakhono kabandu; ²³ ne balamwira, ne khunyanga yakhataru alalamusibwa; nabo nibaberera muno.

²⁴ Olwa boola muKaperinaumu, abasololi bobushuru nibatsia ewa Petero yali, nibareeba bari, Omwami wenywe arunganga obushuru? ²⁵ Petero nabakalusia mbu kali kario ne niyenjira munzu, Yesu namureeba ari, Simoni, oluutsi orie? Abaruchi bomushialo, nabandu shiina ababarunjinjia obushuru? abaana babwe nohomba abamenyani?

²⁶ Ne olwa yakalusia mbu, mbula abamenyani; Yesu namuboolela mbu khulwako abaana abeebule nabalakhuule. ²⁷ Nebutswa mbu, khuleshe okhubasinyisia, otsie khunyanza, winjisie olulobolwo mumatsi, obukule inyeeni eyiitsa okhuranjira okhufutukha, ne olwa oloba, wikule omunwa kwayo, olanyola ishekeli; ochibukule, obarunje khulwanje khandi khululwo.