¹ Mutsiinyanga yitso, Herode omuruchi yahulila ifuma ya Yesu, ² Naye naboolera abasumba bebe, wuno shiali niye Yohana Omubatisi, owabuushile okhurula mubafu; Niko akachila amakhuwa amakali kekholekha okhubirira muye.

³ Okhuba Herode yali niyamutiira Yohana niyamuboha, niyamura mumnbohe, eshifune mbu Herodia omukhasi womusiani wabwe Filipo. ⁴ Okhuba Yohana yali niyamuboolera mbu, nomusilo yuwe okhumuteshia. ⁵ Olwa yenya mbu amwiire, yaria emikanda chia abandu, okhubela bamulolanga shingana omunabi.

⁶ Olwa inyanga yokhwibulwakhwe Herode yoola, omukhanawe Herodia yabashinila mana nachamisia Herode. ⁷ Naye namulaka niyetsuba okhumuhelesia shilia shiosi shiosi eshia alaba nasaba. ⁸ Yamala atsie niyebaalirwa nende nyinamwana, tsia oboole mbu, umbelesie omurwe kwa Yohana Omubatisi khuluteru. ⁹ Omuruchi yamala abeerere; shichila yali namalile okhwitsuba, nende khulwa balia abali nibeekhale ninaye nibalitsanga, yalachilisia mbu omukhana ahebwe omurwe. ¹⁰ Yarumasia, mana Yohana narusibwakhwo omurwe mumbohe. ¹¹ Nakwo omurwe kukwe nikurebwa khuluteru, nikuhebwa omwana omukhana uyo, naye nayilila nyinamwana. ¹² Nabo abeechi bebe nibetsa, nibabukula omubiri kukwe, nibakuyabila, khandi nibatsia nibaboolera Yesu. ¹³ Yesu olwa yahulila amakhuwa yako yarulaho naniina muliaro natsia habundu ahebisu; nabo abandu olwa bahulila bario, bamulondakhwo khubilenje okhurula mumatookho. ¹⁴ Yesu naye natsia imbeli nalola omukanda omukhongo. Mana natiirwa nende eshibeera khulwabo, naye nahonia abalwale babo boosi.

¹⁵ Obwiire bwamala buule, nabo abeeka bebe nibamwitsila nibamuboolela, habundu hano neshitsiimi, ebise nabio bitsiire muno, ruma abemikanda bakalushe ewabo, mbula batsia mutsisoma, mana bekulile ebiokhulia.

¹⁶ Naye Yesu nababoolera mbu shibakhoyere okhurula hano tawe, enywe mubahelesie eshiokhulia.

¹⁷ Nabo nibamuboolela mbu, khulihano nende emikaate chirano nende tsinyeni tsibili.

¹⁸ Naye Yesu nababiila, mungaamile hano ewa endi. ¹⁹ Naye Yesu nabayunjia abomukanda boosi mbu beekhale hasi khwiswa, nabukula emikate chirano nende tsinyeni tsibili, naraangala mwikulu, nabilamila tsikhabi, natonyola nahelesia abeechi bebe emikate, nabo abeechibe nibaheresia abomukanda. ²⁰ Boosi bamala nibalia, nibekura, mana nibatoola ebitonye biali nibitonyere ebimwero ekhumi nende bibili nibitsuule. ²¹ Abalia bali abandu abasatsa ebikhumi birano, okhuhiniakhwo abakhasi nende abaana.

²² Mubise biene yibo, Yesu nabayunjia abeechibe benjile muliaro, bamuranjirire okhutsia oluchelekha lundi, olwa aba nashiseebula abemikanda nibatsia. ²³ Olwa yali namalile okhuseebula emikanda nichitsiile, yamala natikulukha khushikulu yenyene okhusaaya: obwiire olwa bwoola yali nali yenyene. ²⁴ Nalio eliaro liali niliri muyanza hakarikari nilirundungwa nende amarunda shichila omuyeka kwali nikuhutsanga okhurula imbeli. ²⁵ Mumasayo kakhane mushiro Yesu yabatsiira, nachendanga khunyanza. ²⁶ Nabo abeechibe olwabamulola nachendanga khunyanza, batiirwa nende indenga, nibaboola, neshishieno, nibaayula obutinyu nibali nende oburi. ²⁷ Yesu nababoolela shirunji, yume ikholo, nisie, mulaba nende oburi tawe.

²⁸ Naye Petero namukalusia naboola, Omwami, kali neyuwe, nanga ndiitse ewa oli khumatsi.

²⁹ Mana namuboolela yitsa. Olwa Petero yali niyakharula muliaro, yachenda khumatsi, natsia ewa Yesu yali. ³⁰ Halali olwa yalola omuyeka nikuli nende amaani, yaatirwa nende oburi; yamala nachaka okhwiyinikha mumatsi, nalanjisia, Omwami, honokosia.

³¹ Bwangubwangu Yesu namunyirira omukhono, namutiira, namuboolela, Obeyabeyee! yuwe owobusubili obutiti, shichila shiina shiosubiire tawe? ³² Nabo olwa bamala nibenjila muliaro, omuyeka kwamala nikulekha okhuhutsa.

³³ Balia abali nibali muliaro beetsa nibamwinamila, nibaboola mbu, obwatoto buli mbu, oli Omwana wa Nyasaye.

³⁴ Ne namalire okhwambukha oluchelekha, eGenasareti. ³⁵ Olwa abandu beebweneyo bamanya mbu aliyo, natsia mutsingongo eyi nende ilia, nibamurerera balia boosi abali nibalwala;

³⁶ Nibamusaya mbu banyale okhutiirakhwo butswa lichemo lieingubo yiye: nabo obunji bwa balia abamutiirakhwo bakholwa abalamba kupu.