¹ Inyanga yeneyo Yesu yarula munzu natsia okhwikhala khulukuku lweinyanza. ² Nachio emikanda emikali nichitsa nichiakanila ewa yali, naye niyenjira muliaro niyekhala; nakwo omukanda nikuba nikusinjile khulukuku. ³ Naye nabechesia amakhuwa amanji mutsinjero, naboola, lola omumiitsi yatsia okhumiitsa imwo; ⁴ Ne olwa yali namiitsanga imwo eyindi yakwa khunjira nako amanyonyi nikeetsa nikabootsa. ⁵ Nayo eyindi niyikwa khulwanda, ewa liloba lilali eliiinji ta, niyiromba niyimera lwangu okhuba emisi shichiatsia hasi muno ta. ⁶ Nakwo omubasu olwa kwabuukha nikutsisamba nayo okhuba yabula emisi yaniaala. ⁷ Nayo imwo yindi niyikwa mumarakalu, nako amarakalu nikakhula, nikachitiiya, nikachiira. ⁸ Habutswa eyindi yakwa mwiloba lilayi, nayo niyama ebiamo, eyindi niyama tsimia, eyindi amakhumi kasasaba, etsindi amakhumi kataru. ⁹ Ulia ouli nende amarwi kokhuhulira, ahulire.

¹⁰ Nabo abeechibe nibamwitsira, nibamureeba; shichira shiina noboola nende abandu mutsinjero?

¹¹ Yabakalusia nababoolera, kakhoyeere enywe mumanye amabiso kobwami bwomwikulu, ne nabo shibahebwa tawe. ¹² Okhuba ulia yesiyesi ouli ninashio, alameterwa, naye alaba ninabio ebiinji nibishiranile, halali ulia yesiyesi oubula, kata shititi shiali ninashio shilabukulwa okhumurulakhwo. ¹³ Niko kachira nebaboolera mutsinjero, shichila bahenganga neshibalolanga ta, khandi bahuliranga neshibahulira ta, kata shibamanyirisia ta. ¹⁴ Nabo mubo, obunabii bwa Isaya buusibwa, ebabolela mbu khulwa okhuhulila mulahulila, ne shimulamanyilisia ta; nakhwo okhukhola mulakhola ne shimulatiira ta.

¹⁵ Okhuba emioyo chia abandu bano, chiaboolera mubusilu, nako amarwi kabwe nikasitoha, okhulila, natsio tsimoni tsiabwe nitsitiimba; kalali kario khubise bioosi bioosi, babe abanyala okhukhola nende tsimoni tsiabwe, khandi bahulile namarwi kabwe, khandi babe abamanyirisia mumioyo chiabwe mbu, babe abanyala okhukalukhasibwa, mana nasi embe oubahonia.

¹⁶ Halali tsimoni tsienywe tsili nende ikhabi mbu tsilolanga, nako amarwi kahulilanga. ¹⁷ Emuboolela toto mbu, abanabii nende abandu abalunjishi abanji bekoomba okhulola ebia enywe mulolanga, nabo shibabilolakhwo tawe; nende okhuhulira akeenywe muhuliranga, nabo shibahuliakhwo tawe.

¹⁸ Bulano khahulire akoluchero lwomumiitsi; ¹⁹ Olwa omundu aba nahulila likhuwa liOmwami, naye shalimanyirisia ta, omubi oyo alamwitsila, nabirusia bioosi ebirachirwe mumwoyokwe, niye ounyoola imwo eyakwa khunjira. ²⁰ Naye ulia owinjisia imwo khulwanda acherasibwa nende ulia ouhulira likhuwa nende okhwikhoya halala nende obutsatsafu nalinjisia; ²¹ Kata kario muye mwene abula emisi, habutswa alefwirakhwo ebise bititi, ne olwa amasila nohomba okhunyakhana khumwitsia, khulwa likhuwa, hatiti hatiti niyesichirala. ²² Naye ulia owanyolere imwo mumarakalu, niye ouhulira likhuwa; nako amahendo keshialo shino, nende obukatibwi bwobuyinda, bimika likhuwa, naye shiaba owokhwama ebiamo tawe. ²³ Halali owanyoolere imwo mwiloba lilayi niye ulia ouhulira likhuwa, mana alimanyirisia; naye yama ebiamo, ebiitsa mumikanda chia imia ndala, amakhumi kasasaba, echindi amakhumi kataru.

²⁴ Khandi nabacherera oluchero lundi, naboola, obwami bwomwikulu bucherasibwa shinga omundu owaraaka imwo mumukunda; ²⁵ Ne olwa abandu bakona, omusukuwe niyeetsa naraakamwo libanze muungano, mana niyetsiira ewuuwe. ²⁶ Olwa biamera nibikhula, mana bichaaka okhwama, ne libanze liosi lilolekha. ²⁷ Kho abatiiyi ba mwene omukunda betsa nibamureeba, Omwami, shikhwaraka imwo indayi mumukundakwo, ne lola, libanze liruliire heena?

²⁸ Naye nababoolera, omusuku niye oukholeere kano. Abatiiyi nibamuboolera mbu, khutsie khwiyemwo mana khulibunjishe halala?

²⁹ Naye nababoolera, tawe okhuba olwa mulaba nimwiiyanga libanze, muleyeramwo khandi ingano. ³⁰ Leshe biosi bikhule okhula khwichesa, mana ebise biohuchesa ndalabiira abokhuchesa mbu, ranjirire muchesa libanze, muliboye mubikolo bisaambwe, nayo ingano mubunjeresie nimurera mushiachi shianje.

³¹ Khandi nababoolera oluchero naboola, Obwami bwomwikulu bucherasibwa shingana olufwa lwelisaatsi olwa omundu yabukula naluraaka mumukunda. ³² Nalwo nilwo olufwa olutiti muno mutsiosi halali nalwo nilwakhamera, nilwoolukali mumimera chioosi echirakwa mumikunda, nakwo kwikhola omusaala, mbu kata amanyonyi keikulu keetsa nikoombakha ebitsu mumasaka nikamenyamwo.

³³ Khandi nababoolera, oluchero luundi mbu, obwami bwomwikulu bucherasibwa shingana limera, elia omukhasi yabukula, mana nalibisa napanjiire mubichero bitaru, okhuula olwa bioosi biali nibifuuname nelimera.

³⁴ Yesu yaboolera abemikanda amakhuwa kano koosi mutsinjero, nelibulaho liosiliosi elia yababoolera muluchero tawe. ³⁵ Mbu kosibwe kalia akali okhuboolwa nende Omunabii olwa yaboola; ndakhekule omunwa kwanje mutsinjero, ndakharumbule ebindu biabikhwa shinga libiso okhurula okhuchaaka khweshialo.

³⁶ Olunyuma lwene Yesu nalonda abemikanda batsie, mana natsia munzu; nabo abeechibe nibeetsa ewa yali, nibaboola mbu, khwinoosiekhwo oluchero olwa libanze mumukunda.

³⁷ Nabakalusia nababoolera ulia oumiitsanga imwo indayi niye Omwana womundu; ³⁸ Omukunda nikwo eshialo; nayo imwo nibo balia abaana bOmwami; halali nalio libanze nibo balia abaana aba ulia omumayanu; ³⁹ Ulia omusuku owamiitsa ni Setani, nalio lichesa nishio eshihesi shieeshialo, nabo abokhuchesa nibo abamalaika. ⁴⁰ Kario shinga libanze likhung'asibwa niyiirwa mumuliro; yisho nishio eshiakhabe nishili eshihesi shieshialo. ⁴¹ Omwana wOmundu yakharume imberi abamalaika bebe nabo bakhakhung'aasie okhurula mubwami bubwe ebindu bioosi ebili ebiokusinyo, nende balia abakholanga obubii. ⁴² Mana bakhasukunwe mumuliro kuli shinga okwelirumbi; ebweneyo khwakhabeyo nende okhwikhuula nende okhusia ameno. ⁴³ Nolwa abalunjishi bakhamweshe shingana eliuba mubwami bwa Sabwe, ulia ouli nende amarwi ahulile.

⁴⁴ Khandi obwami bwomwikulu bufwana shingana libishiro eliabiswa mumukunda; mbu omundu naba nalinyoola alalibisa, naye alatsia natsatsaalire okhukusia ebindu bioosi ebiaba nali ninabio mana atsie akule omukunda tsana.

⁴⁵ Khandi bwingana shingana omundu omukhala oukhabanga ilulu indayi. ⁴⁶ Ulia, olwa yanyoola ilulu indayi eyobukusi bweikulu, yatsia nakusia bulishindu shiali eshishie, mana nayikula.

⁴⁷ Khandi obwami bwomwikulu bucherasibwa shingana olukhanda lulia olwebalwa munyanza, nalwo nilutiira bulishindu shialimwo. ⁴⁸ Nalwo, olwa lwali nilwitsuule, balukhweesa okhutsia khuluchinga, mana nibekhala hasi, mana nibahula ebialimwo ebilayi nibara omubachinjira ne nibasukuna ebialimwo ebibii. ⁴⁹ Endio nilwa kakhabe khushihesi shieshialo! abamalaika bakharanjirire, mana bahule abamayanu okhurula hakarikari wabalunjishi, ⁵⁰ Mana bakhasukunwe mumuliro kufwana shinga okwelirumbi, ne ebweneyo khwakhabeyo okhwikhuula nende okhusia ameno.

⁵¹ Yesu nababoolera, mwakhahulira ebindu bino bioosi? Nabo nibamukalusia, Ee Omwami.

⁵² Mana khandi nababoolera, kata kario buli omwechesia wamalako owikhola omweka mubwami bwomwikulu ali shingana mwene inzu ouyininjia mushikoro shiabiikhangamwo ebindu amabishiro amayia nende kata ebikhulu.

⁵³ Ebise ebia Yesu yali namalire tsinjero tsitsie, yarulaho. ⁵⁴ Ne olwa yali namalire okhuula mushialo shiewabo, yabechesia musinagogi yabo munjira yachira nibahuka, mana nibaboola Omundu uno yarusia hena obuchesi buno, nende ebikhole biokhuhuchisia bino? ⁵⁵ Shiali niye ulia omwana womubaatsi wetsimbao? Mariamu shiali niye nyinamwana? nabo abasiani babo shibali; Yakobo, Yusufu, Simoni nende Yudas! ⁵⁶ Kata abakhana baabo, shibali boosi halala ninefu? Naye omundu uno ahiniye hena ebindu bino?

⁵⁷ Mana nabo nibamusinyishira, halali Yesu nababoolera, omunabi shiachweyanga oluyali tawe, okhuyiniakhwo ewabo uyebulwa, nende munzu yiye yene. ⁵⁸ Naye shiyamala nakholayo amangalimimwa amakali tawe khulwa okhubula okhusuubila khwabwe.