¹ Kula okuba obwami bw'empingu bushushene na nin'eshwa walamukiraga esezi kulonza abakozi bamuhingira omwishwa ly'emizabibu. ² Amango alaganyanya na bakozi oku lufuranga luguma omu zuba liguma abarhuma omwishwa lyage ly'emizabibu. ³ Ashubi genda s'esharhu abugana abayumangire busha omu chambu; ⁴ Ababwira, muje nenyu omwishwa lyani ly'emizabibu nabalipa nenyu olufuranga, bajamo. ⁵ Bashubi genda saa ndarhu na saa mwenda ajira ntyo. ⁶ Ashubi genda saa kumi na nguma, abona abandi bayumangire busha, ababwira mpu mwabo muyumangire busha hano ezuba lyoshi?

⁷ Bamubwira: bulala nta muntu warhuhamagere oku mukolera, ababwira mpu nenyu munjire omwishwa ly' emizabibu. ⁸ Egolo lyabere nina eshwa abwira abemangizi bage, mpu muhamagale abakozi mbahe oluhembo lwabo, arhangirira oku wobuzinda kugera oku owarhonderaga.

⁹ Amango ahamagalaga, abayinjaga saa kumi nanguma abaha lufuranga luguma luguma. ¹⁰ Amango abarhonderaga babonaga ntyo, bamenya mpu bowe bahabwa zinene, nabo bahabwa lufuranga luguma luguma. ¹¹ Namango bakamarhaga bagaya nin'eshwa. ¹² Baderha: abala bakolere saa ngoma yonyine yonyine, gurhe wakabaha kuguma nerhu, rhwerhwakolere ezuba lyoshi, rhwamakomerera ezuba likali n' omurhamo.

¹³ Naye ababwira, abashubiza, mpu bera bani ntabajirire kubi, rwalagananaga; ka rhurhalagananaga lufuranga luguma? ¹⁴ Rhola oluli lwawe ochigendere, nsimire okuha abola nabo luguma kuguma nawe. ¹⁵ Ka birhakwirire, nka hana ebyani oku ndonzeze? Changwa elisho lyawe lyandola kubi okuba najirire amenja? ¹⁶ Intyo kw'omuzinda nj'aba mwambere, n' omwambere anaba wabuzinda.

¹⁷ Namango Yesu azamukiraga e Yerusalema agenda nabalala begirizwa bage ekumi nababiri bonine ababwira: ¹⁸ Tala rhuje e Yerusalema, mwene omuntu ahebwa omu maboko g'abadahwa n'ag' Abandisi; nabo bamuchira echihano ch' okufa. ¹⁹ Nabo bamuheba omu maboko g'abanya mahano, bamubonerera n'okumushurha n' okumuhanika, n'oku lusiku lwakasharhu anafulwa.

²⁰ Lero nyina wabana ayinja n'abagala aha Yesu ali amuharamya, amuhema mwazi muguma.

²¹ Amudosa mpu bichi walonza: Amushubiza mpu orhegeke abana bani abala babiri bakuje hofi muguma ekulyo n' owindi ekulembe omu bwami bwawe.

²² Aliko Yesu abashubiza, ababwira mpu murhamanyire ebimuli mwahema. Mwakagalinywa oku ngumbu nji nanywa? Baderha mpu nechi rhwakayinywa.

²³ Kubinali nji mwanywa kw'eyo ngumbu yani, aliko okuyikala omu kuboko kwani kwamalyo, n'okuboko kw'amalembe, ntaherhe obulenganjira okubaha aliko abanji bahabwa oko bali abo barheganyizwe na Darha. ²⁴ N' amango balala ekumi bayunvaga ntyo, balubira balala babiri. ²⁵ Aliko Yesu abahamagala ababwira: Mumanyire oku abarhambo b'abantu babarhambula oku misi n' abakulu babo babakolesa. ²⁶ Aliko mwabo nji birhaba ntyo, owalonza abe mukulu mumwabo, abakolere. ²⁷ N'owakalonza okuba mwambere achijire muja w'ababo, ²⁸ Nka kulala mwene omuntu ayinjire arhali kukolerwa s' aliko kukolerana; n' okuhana akalamo kage kabe buchunguke bwa bantu banene.

²⁹ Amango barhenga e Yeriko, echigusho chinene ch'abantu cha mukulikira. ³⁰ Tala mpumi ebiri zaliyikere aha burhambi bw'enjira n' amango bayunvaga mpu Yesu oyo wagera bahira omulenge enyanya: Nahano arhubere obonjo, mwene Daudi. ³¹ Olubaga lw' abantu lwabakalihira mpu basire, aliko bowe bahira omulenge enyanya baderha: Nahano orhubere obonjo mwene Daudi.

³² Yesu ayimanga, abahamagala, aderha: bichi mulonzeze mbajirire?

³³ Bamubwira: Nahano amesho merhu mabone. ³⁴ Yesu ayunvira bwo obonjo abahuma oku mesho mabo, n' okuliguma babona, bamukulikira.