¹ Yesu aber'amamala enganiro; arhenga e Galilaya, aja omu Yudeya, eshiriza ly'e Yordani. ² Olubaga lunene lwamukulikira; afumya ho abalwala.

³ Abafarisayo bamushegerera, n'oku mubwira, yi bamurhega: Biyemererwe oku mulume kuhulusa mukage oku ngasi mwazi?

⁴ Yesu abashuza: ka Murhasomaga oku Lulema, oku murondere, ajiraga omulume n' omu kazi ⁵ anaderha mpu: Che chirhumire omulume nj'alek'eshe na nyina, n'okuchishwekera ku mukage, n'abo bombi nji gwaba mubiri muguma? ⁶ Nantyo barhaka chiba babiri, si bakala mubiri muguma. Nta muntu ogwasize okulikanya echi Nyamuzinda ahebaga haguma.

⁷ Bulagurhe, bamubwira, Musa ayandikaga mpu ku kwanene okuh'omukazi amaruba gw'okulekana n'oku muhulusa?

⁸ Abashubiza: yali enyanya y'emirhima yenyu mizibu che charhumaga Musa abayemerera ntyo, s'aliko kurhenga omurhondero birhaliri ntyo. ⁹ Aliko mbabwirire oku ngasi yeshi nji walekana na mukage, arhali oku mpanvu y'obuhushi, n'okushaba owundi njaba eri amajira obuhushi.

¹⁰ Entumwa zage zamubwira mpu: akaba lye rhegeko lyo mulume eryo oku mukazi, nta kamaro kokushaba.

¹¹ Abashuza mpu: boshi barhayunvirhe ogu mwazi, aliko ku balala baguhabirwe. ¹² Bulala haliri abalamba barhengaga ntyo omunda ya banyina; hali n'abalamba bajirirwe ntyo n'abantu; hali n'abalamba bachijirire ntyo enyanya z'obwami bw'empingu. Owayunva ayunve.

¹³ Honaho bamulerhera abana badorho, mpu abalambulire kw' amaboko anabahunira. Aliko abigirizwa babashunika. ¹⁴ Na Yesu ababwira mpu: muleke abana badorho, murhanabasikaga okuja emunda ndi; bulala obwami bw'empingu buli bwabo na balala babashushire. ¹⁵ Abalambulira kw' amaboko, anarhenga yo.

¹⁶ Muntu muguma ashegerera Yesu, amubwira: Mwigiriza, bichi njirage binja yi mbona akalamo k'esiku n'amango?

¹⁷ Yesu amushuza mpu: Bichi birhumire wandosa oku biyekere obwinja? Hali mwinja muguma yenyine. akaba olonzeze okuja omu kalamo okenge amarhegeko. Amubwira, mahe?

¹⁸ Na Yesu amushuza mpu: Orhahira okaniga; orhahira okahusha; orhahira okayiba, orhahira okabesha; ¹⁹ okenge yisho na nyoko, osime omwalungwe wawe, nk'oko chisima.

²⁰ Oyo musole amubwira: Ebyo byoshi mbiyinji; bichi bimbulire kandi?

²¹ Yesu amubwira: okalonza obe mushinganyanya, ogende, ojiguza ebyoherhe byoshi, obigabire abakene, nawe nji wabona obuhirhi omu mpingu; na buzinda waho yinja, onkulikire. ²² Abere ayunva eyo myazi, oyo muzana agenda agayire; bulala ali gwerhe bintu binene.

²³ Yesu abwira entumwa zage: Mbabwirire okuli, bikomere oku mugale okuja omu bwami bw'empingu. ²⁴ Nshubire babwira, biri bilembu bwenene engamiya okusheshera omu chirhule ch'esindani, hali h'omugale okuja omu bwami bwa Nyamuzinda.

²⁵ Entumwa, zayunvirhe ebyo, basomerwa bwenene n'okuderha: akaba ntyo nd'okwanene okuchunguka?

²⁶ Yesu abalola, ababwira: oku bantu ebyola birhankagalika, aliko emwa Nyamuzinda byoshi bigalikene.

²⁷ Petero, arhola omwazi, amubwira: lola, rhwalekere byoshi, rhwakukulikira, bichi nji rhwabona?

²⁸ Yesu abashuza: Mbabwirire okuli, amango Mwene omuntu, njayikala oku ntebe y'obwami omu buhyahya bwa ngasi chintu, njayikala oku ntebe y'obukuze, mwe mwankulikire, nji mwayikala nenyu oku ntebe ekumi n'ebiri, n'okuchira olubanja elala milala ekumi n'ebiri y'obuko bw'e Israheli. ²⁹ Na ngasi yeshi walekere bene babo, bali babo, eshe na nyina chango mukage, abana bage, amashwa, enju zage, enyanya zani nja habwa kaligana, n'okuyima omu kalamo k'esiku n'amango. ³⁰ Aliko banene bali boburhanzi nji baba bw'obuzinda, na banene baliri bw'obuzinda nji baba baburhanzi.