¹ Mwebyo bisanzi, entumwa za yegerera Yesu za derha: Inde oli mukulu omu bwami bwa Nyamuzinda?

² Yesu, ahamagala omwana mudorho, amuheba omu kagarhi kabo, ³ aderha mpu: Mbabwirir'okuli, akaba murhachichese na nka murhabere nk'abana badorho, murhakaj'omu bwami bw'empingu. ⁴ Che chirhumire oyinji chirhohya nk'oyu mwana mudorho njaba mukulu omu bwami bw'empingu. ⁵ N'owunji wayegerez'omwana mudorh'oku zino lyani, anyengerez'enyenine. ⁶ Aliko ery'omuntu akagayaguza muguma mw'aba badorho banyemere, kwaka bere kwinja ashwekerwe ebale ly'okusherwa omu gosi n'oku mukweba omu nyanja.

⁷ Buhanya bwe gulu enyanya y'oku gayaguza! bulala bishinganene oku gayaguza kubeho; aliko buhanya kola muntu njibwa hikira! ⁸ Na kaba efune yawe eri okugulu kwawe kuli kuguma kwakarhuma wabul'omurhula oyiche ona yikwebe hale nawe; kuli kwinja kuwoyo okuja omu kalamo kw'obuzine, kulusha okuba n'amagulu mabiri n'amaboko mabiri n'oku kabulirwa omu mulliro gw'esiku n'amango. ⁹ Na kaba elisho lyawe lya karhuma wagoma, olikule onalikabule hale nawe; kulikwinja kuw'oyo okuja omu kalamo kw'obuzine, oherhe lisho liguma, kulusha okuba na mesho mabiri nji banakukabulire omu muliro gw'ekuzimu. ¹⁰ Muchilange okugayaguza muguma mwaba bana badorho; bulala mbabwire oku bamalaika babo bw'omu mpingu bagendekere okubona esiku zoshi obusu bwa Darha oli omu mpingu. ¹¹ Bulala mwene muntu ayinjaga kuchungula owaherere. ¹² Kurhe mubwene? Nk'omuntu aherhe bibuzi egana, chiguma omubyo chihere, karhakaleka bilala galimwenda na mwenda oku ntondo, n'oku jilonza chilala chaherere? ¹³ Neri akachibona, mbabwirire okuli, chinamulerhera obushagaluke kulusha bila galimwenda na mwenda garhaliherere. ¹⁴ Kubinali, burhali bulonza bwa Darha oli omu mpingu oku muguma mwaba badorho ahere.

¹⁵ Na kaba mwene wenyu akagoma, ogende emund'ali, oyo naye yenine, eri aka kuyunva, eri wayungukire mwene wenyu. ¹⁶ Eri akaba arha kuyunvirhe, rhola wenyu muguma changwa babiri, okubuzinda mu malise olo lubanja oku buhamirizi bw'abantu ba biri changwa basharhu. ¹⁷ Akalahira kubayunviriza, obubwire eshengero; na kalahira kuyunva eshengero, omu murhole nka mupagani eri munyabyaha. ¹⁸ Mbabwirire okuli, ngasi byoshi mwashweka oku gulu, nji byashwekwa omu mpingu, na ngasi byoshi mwashwekula oku gulu byashwekulwa omu mpingu. ¹⁹ Kandi mbabwirire oku bantu babiri ahagarhi kenyu bakahuna akantu kwoshi kwoshi, bakahabwa na Darha oli omu mpingu. ²⁰ Bulala eri babiri changwa basharhu balihaguma okuzino lyani, nani naba omu kagarhi kabo.

²¹ Oku ntyo Petero amushegerera aderha: Nahano, kanga nakababalira mwene werhu, amango amangomera? ka kali mushanvu?

²² Yesu amubwira: Nta kubwirire mpu oku kali mushanvu, s'aliko kali makumi gali mushanvu kali mushanvu. ²³ Che chirhumire, obwami bw'empingu bushushanyizwe na mwami walonzaga okudosa abambali enyanya z'ebikulo byage. ²⁴ Eri aba aliaganja, bamulerhera muguma wa limuherhe omwinda (deni) gwa bihumbi ekumi bya magerha. ²⁵ Okubona ntacho aliherhe akajuha, Nahamwabo arhegeka mpu aguzwe, yewe, na mukage, n'abana bage na byoshi aliherhe ly'omwinda guhwa. ²⁶ Olala mwambali achikuba oku daho amuyinginga, n'okuderha: Nahano, omber'obonjo, njinakujuha byoshi. ²⁷ Oyo mwami amubera obonjo, amuleka agenda, ana babalira gula mwinda goshi. ²⁸ Eri oyo mwambali ahuluka ashimana muguma w'omu bera bage walimuherhe omwinda gw'afuranga egana; amugwarha omugosi, n'oku mubwira: onjuhe eby'onkwanene.

²⁹ Oyo mwirawage achikuba oku daho, amushigirira n'oku derha: Ombere obonjo, njina kujuha. ³⁰ Alik'oyo mwambali alahira, aJa kumukweba omu mpamiko kuhika amango njamujuha ebyalimushinganene. ³¹ Berabage eri babona ebyabere, bagaya bwenene, bagenda kubwira olala Nahamwabo byoshi byagerere.

³² Nahamwabo ahamagala oyola mwambali, amubwira: Mwambali mubi, na kuberag'obonjo oku mwinda gwawe goshi bulala walinshigirire; ³³ chakarhuma orhaber'owenyu obonjo nk'okunani na kuberag'obonjo? ³⁴ Nahamwabo agaya, amuha abamulibuza, kuhik'amango njajuha ogola mwinda goshi. ³⁵ Na ntyo ku Darha w'empingu nja bajira, akaba ngasi muguma mu mwabo arhababalire owabo n'omurhima goshi.