¹ Ntyo kw'Abafarisayo n'abashamuka b'ehano b'e Yerusalema bashimbire Yesu, bamubwira, ntya: ² Chichi chirhuma abegirizwa bawe barhashimbulira amarhegeko g'abamira? Barhachikalaba nka balya?

³ Abere abashubiza, ababwira, ntya: Chirhuma mwabo si murhashimbulira amarhegeko ga Nyamuzinda erhi ngeso za bashokuluza benyu zirhumire? ⁴ Chi Nyamuzinda aderhaga, oku: okenge isho na nyoko, mpu n'owakungulira eshe na nyina afe. ⁵ Na nenyu munalema mwaderha, mpu: ngasi yeshi webwire eshe chango nyina, ntya: echi nakakurhabere mwo, nachihanire nka ntulo (nterekero), ⁶ mwaderha mpu oyola arhachikwanene okurhabala eshe changwa nyina. N'oku ntyo mwanafundi kulikira amarhegeko ga Nyamuzinda erhi ngeso zenyu zirhumire. ⁷ Mani, ezi ndyalya! Isaya alilebere bwinja, amango aderhaga, ntya: ¹⁰ Yesu abere amahamagala olubaga lw'abantu, alubwira, ntya: Murhege amarhwiri munayunvirize! ¹¹ Arhali ehija omu bunu hye hizingisa omuntu, s'aliko ehirhenga omu bunu bw'omuntu hye himuzingisa.

¹² Abegirizwa bage babere bamushegerera, bamubwira, ntya: Ka wamanyire oku, amango Abafarisayo bayunvaga gulala mwazi gwawe baligayire?

¹³ Naye abashubiza, aderha ntya: Ngasi murhi gurharhweragwa na Darha w'empingu nji gwa chibwa. ¹⁴ Mubaleke; ziri mpumi ziyereka empumi enjira chi empumi ekachidalika okuyereka eyabo mpumi enjira, zombi zanachikweba omu nyenga y'omuliro.

¹⁵ Petero ashuza, amubwira, ntya: rhuhuguliraga nerhu ogo mugani.

¹⁶ Na Yesu naye amushuza, amubwira, ntya: Aye! gasi nenyu nta bwenge muherhe guhika zene! ¹⁷ Murhayunvirhe oku ehija omu bunu omu nda hirhogera, na kandi hyanayinji ja omu musarani. ¹⁸ S'aliko ebirhenga omu bunu omu murhima birhenga, bye binazingisa omuntu. ¹⁹ Omu murhima mwo murhenga enkengero zibi, okuyirha, okuhusha, okujira eby'eshonyi, okuzimba, okubesha, n'ebijachi. ²⁰ Ebyola bye bizingisa omuntu. S'aliko okulya buzira kukalaba, ntaye kwakazingisa.

²¹ Yesu abere amachirhengera ho, achijira entambi z'e Tiri n'ez'e Sidoni. ²² Ntyo kw'omukazi w'e Kanana ahulukire mw'echo chihugo, alema ayakuza (ahamagala), n'okuderha ntya: Mani we kalama, mwene Daudi, ombere obonjo: Mwali wani afire n'abazimu.

²³ Naye arhamushuzaga chiro n'ehityu. Ntyo kw'abegirizwa bage bamushimbire, bamushigirira, bamubwira, ntya: Bwira ye agende, bulala ali ajira olwamo enyuma zerhu.

²⁴ Naye abere ashuza, aderha, ntya: Ntarhumagwa arhali oku banabuzi b'e Israheli baherere.

²⁵ Ntyo kw'oyo mukazi ayinjire, amufukamira, anaderha, ntya: Ontabale, Nahamwerhu!

²⁶ Naye amushuza, ntya: Kurhakwanene okurhola ebiryo by'abana n'okubikweba abana ba nyakabwa.

²⁷ Olala mukazi aderha, ntya: kubinali ntyo, muchiza! S'aliko abana banyakabwa nabo banalya oku buhungumukiza burhoga oku meza (cibo) ga nahamwabo!

²⁸ Ntyo ku Yesu amushuzize, amubwira, ntya: Mukazi wee, obwemere bwawe buli bunene! Bibe nkw'oko walonza. N'omwali ava anafuma mwako kashanji.

²⁹ Obwola, Yesu abere amarhenga ahola, aja hofi n'enyanja y'e Galilaya; n'amango ajaga oku ntondo (omusozi), achiyikalira kwo. ³⁰ Abantu banene banene bamushimba, erhi baherhe abantu baholere amagulu n'entagenda, empumi n'orhuduma, n'abandi banene ba ngasi lubero: babarhabika oku magulu mage, naye abafumya. ³¹ Balala bantu boshi basomerwa amango babonaga okw'orhuduma rhwaderha, entagenda bafuma, abaholere amagulu balambagira, n'empumi zabona: Bachishingira Nyamuzinda w'e Israeli.

³² Yesu abere amahamagala abegirizwa bage, ababwira, ntya: Namayunvira olu lubaga obwonjo; bulala zikola siku esharhu zinola banshimbire, barhanaherhe echi balya. Ntalonzeze nkalika bo shali: bankafira omunjira.

³³ Abegirizwa bage bamubwira, ntya: ngahe emigati y'okuyugusa aba boshi yarhenga muno mpinga?

³⁴ Yesu abadosa, ntya: migati minga muherhe? Bamushuza, ntya: eri mushanvu na ndugu zigeke. ³⁵ Okuhandi, arhegeka mpu abantu bayikale oku daho. ³⁶ Arhola elala migati okw'eri mushanvu na zilala ndugu, akuza Nyamuzinda (avuga omunkwa), ayichagulanga, ayiha abegirizwa bage, abegirizwa nabo bayigabira olubaga. ³⁷ Balala bantu boshi balya banayugurha. Barhola ebichira byarhalaga, babumbya rhurhanda mushanvu! ³⁸ Abalyaga nabo, kuleka abakazi n'abana, baliri bantu bihumbi bine. ³⁹ Abere amalikula olubaga, aja omu nkuge; kw'okunahika omu chihugo ch'e Magadani.