¹ Mwago mango, mwami Herode abere ayunva baderha enyanya za Yesu, abwira abambali, ntya: Yohana Mubatiza oyo! ² Afukire omu bafu, ch'echirhumire ly'achijirira ebirhego.

³ Bulala Herode alifarhire Yohana, amushweka anamuhira omu mpamikwa, eyi Herodiya mukw'omulumuna Filipo orhuma, ⁴ bulala Yohana alimubwirire, ntya: birhakuhemere okw'oshabe Herodiya, muka mulumuna wawe. ⁵ Herode abwiraga amuniga, aliko ayubaha olubaga, bulala lwalemaga lwalola Yohana nka mulebi.

⁶ Lero, oku lusiku lukulu lw'okuburhwa kwa Herode, mwali wa Herodiya aja omu luhya, azina, asimisa Herode, ⁷ kugera oku chihe ch'okumulaganya n'endahiro mpu amuha ngasi hyoshi akamuhema. ⁸ Oku mashumi ga nyina, aderha ntya: mpebera hano oku mbale bo nabuno erhwe lya Yohana Mubatiza. ⁹ Mwami agaya; aliko, enyanya z'endahiro n'abali oku lusiku lukulu lwage, kwarhuma arhegeka mpu bamuhe lyo. ¹⁰ Anarhuma mpu bache Yohana erhwe omu mpamikwa. ¹¹ Erhwe lyage lyalerhwa oku mbale, baliha olala munyere, naye alihekera nyina. ¹² Abegirizwa ba Yohana bayinja, barhola omurhumba gwage, bajiguhamba; banagenda kubibwira Yesu.

¹³ Eri Yesu ayunva ntyo, arhenga ho omu nkuge, achiyeguza ho, aja omu rungu hale n'abantu; n'olubaga lumenya ntyo, lwarhenga omu chizungu, lwamushimba oku magulu. ¹⁴ Abere arhenga omu nkuge, abona lubaga lunene lw'abantu, alubera obonjo, afumya abalwala baliri omu bo. ¹⁵ Kwabere golo, abegirizwa bage bamuja ahaburhambi, bamubwira ntya: lyamaba rungu lino, bwanayirire; lika bano bantu bajichigulira ebiryo omu bishagala.

¹⁶ Yesu abashuza, ntya: barhalonzeze bagende; mubahe ebi balya mwabo.

¹⁷ Aliko bamushuza: ntacho rhugwerhe hano harhenga migati erhano na fi ebiri zonyine.

¹⁸ Naye ababwira ntya: mubinderhere hano. ` ¹⁹ Ayikaza abantu oku birhi, arhola elala migati erhano na zilala fi ebiri, alola omu chanya, abigisha. ²⁰ Abere amalichagulanga emigati, ayihereza abegirizwa bage, nabo bayigabira abantu. ²¹ Boshi balya, bayugurha, barhola ebi balekaga, bayunjuza rhurhanda ekumi na rhubiri. Abalyaga, kuleka abakazi n'abana, baliri balume bihumbi birhano.

²² Hon'aho, Yesu aseza abegirizwa bage mpu baje omu nkuge, babe bashokola, bashabuke enyanja, oku naye alaga abantu. ²³ Abere amalekana n'abantu, azamukira oku ntondo yenyine, ajihema Nyamuzinda. Lyabere lyaba golo, aba ery'aliho yenyine. ²⁴ Enkuge nayo, eri yamahika ahagarhi k'enyanja, yashurhwa n'omulaba; bulala omuhusi gwabahulukiraga embere. ²⁵ Bucha sezi, Yesu abahika ko, ayinja alambagira oku nyanja. ²⁶ Abegirizwa bage bamubwene ly'alambagira oku nyanja, bashalama, banaderha ntya: muzimu oyu! N'omu buba bwabo, babanda endulu.

²⁷ Honaho, Yesu ababwira ntya: muhire omurhima omu nda, murhayubahaga, nyono.

²⁸ Petero naye amushuza: Nahano, akaba woyo, ontegeke nani ndambagire oku menji nkushimbe.

²⁹ Na Yesu naye aderha: Yinjaga! Petero arhenga omu nkuge, alambagira oku menji, mpu aje emunda Yesu ali. ³⁰ Aliko abere abona empusi erhakalindirwa, ayubaha; abere akola ali azika, abanda endulu, aderha: Nahano, onyokole!

³¹ Hon'aho Yesu alambula okuboko, amufarha, amubwira, ntya: oli muntu w'obwemere bugeke, charhumire warhindira?

³² Babere bamaja omu nkuge, empusi yarhulera. ³³ N'abaliri omu nkuge, bayinja, bamuharamya, banamubwira ntya: kubinali, oli Mwene Nyamuzinda.

³⁴ Babere bamali shabuka enyanja, baja omu chihugo ch'e Nazareti. ³⁵ Abantu ba mw'echo chihugo balimuyinji, balumiza omwazi oku balungwe boshi, banamulerhera abalilwere boshi. ³⁶ Bamuyinginga mpu chiro bahume oku chishumiro ch'omushangi gwage, na ngasi bahumaga oku cho, bafuma.