¹ Olo lusiku lonolo, Yesu ahuluka omu nju, ajiyikala eburhambi bw'enyanja. ² Lubaga lunene, lwachilunda ahaburhambi bwage, aja omu bwarho, ayikala. Olubaga loshi lwali yimangire eshi. ³ Ababwira binene omu migani, aderha: ⁴ muhinzi muguma ajagi rhwera emburho. Abere aherhe arhwera, ziguma zarhogera eburhambi bw'enjira: enyunyi zayinja zanachirirazo. ⁵ Ezindi zarhogera omu mabale, aharhali budaka bunene: zamera dubaduba, bulala zirhabonaga budaka bunene; ⁶ aliko amango ezuba lya kolaga, zasirera zanayuma, bulala nta mizi zaligwerhe. ⁷ Ezindi zarhogera omu mishaki; emishaki yamera ya zinyagandiza. ⁸ Ezindi zarhogera omu budaka bukwirire: zaburha amalehe, nguma yaburha egana, eyindi makumi galindarhu, eyindi makumi masharhu. ⁹ Oherhe arhwiri g'okuyunva, ayunve!

¹⁰ Abegirizwa bage bamushegerera, banamubwira: chirhuma obayigiriza omu migani?

¹¹ Yesu abashubiza: bulala mwahabirwe oku menya amahwe g'omu bwami bw'embingu, ch'abala bowe barhakuhabwagwa. ¹² Bulala banaha oherhe, nji anaba omu binene, aliko orhaherhe nji bamunyega n'ehyaherhe. ¹³ Che chirhumire nabwira bo omu migani, bulala okubona barhabona, n'okuyunva barhayunva, chiro barhacha n'ehuzihuzi.

¹⁴ N'obulebi bwa Isaya bwa hikirira okubo: mwakazi yunviriza n'amarhwiri genyu, murhanayunva; mwakazi lolereza n'amesho menyu, marhanabona. ¹⁶ Aliko amesho genyu gali garagi, bulala gaherhe gabona, n'amarhwiri genyu, bulala gaherhe gayunva. ¹⁷ Mbabwirire okuli, balebi banene n'abashinganyanya balilonzeze babone ebi muherhe mwabona, barhanachibibonaga, okuyunva ebi muli mwayunva, barhanachibiyunvaga. ¹⁸ Mwabo muyunvage gurhe ogu mugani g'omuhinzi guderhere. ¹⁹ Amango omuntu amayunva omwazi gw'obwami arhanagurhegereze, lyangombe anayinja, anachirholera ehy' alirhwerere omu murhima gwage: Oy'omuntu ali olala wayankiriraga emburho eburhambi bw'enjira. ²⁰ Owayankiriraga emburho ahantu h' amabale, y'olala wayunvirhe omwazi ana gushagalukira; ²¹ aliko nta mizi aherhe omu yewe, abulire emisi, n'ery'abona amalumwa n'amalibuko enyanya ly'ogo mwazi, anabona ebichanji by'okuhera. ²² Owayankiriraga emburho omu mishaki, y'olala oyunva omwazi, aliko oburhe b'omu gulu n'okurhebekwa kw'obugale byananyagandiza omwazi, zirhachiburha malehe. ²³ Owayankiriraga emburho omu budaka bukwirire, y'olala oyunva omwazi n'okuguhikiriza, gwanayana amalehe, n'e mburho nguma yanaburha egana, eyindi makumi galindarhu, eyindi makumi masharhu.

²⁴ Ashubibacha ogundi mugani, ababwira: obwami bw'empingu bushushene n' omuntu wajagi rhwera emburho ekwirire omu shwa lyage. ²⁵ Aliko, amango abantu balilyamire, omushombanyi wage ayinja arhwera emishaki omu ngano, anachigendera. ²⁶ Amango olubala lwameraga n'okuyana amalehe, emishaki nayo yachiyerekena. ²⁷ Abambali banin'eshwa bayinja mubwira: Nahano, k'arhali emburho ekwirire walirhwerere omu shwa lyawe? Ngahe emburho ebihire erhengerere?

²⁸ Abashubiza: mushombanyi ojirire ntyo. N'abambali bamubwira: K'oshondere rhuji yi shugula?

²⁹ Aderha, nanga, bulala hano mukula emishaki, mwanayishugula haguma n' emburho. ³⁰ Mubileke byombi bikulire haguma kuhika amango g'okushalula, njinabwira abashaluzi: murhange mukule emishaki, muyishweke rhuzigo rhuzigo eyoswe, aliko mubike emburho omu nguli yani.

³¹ Ashubi bacha ogundi mugani, aderha: obwami bw' empingu bushushene n' emburho nguma y' esinapi, muntu muguma ayirhwera omu shwa lyage. ³² Eba mburho ngekegeke kulusha ezindi mburho zoshi, aliko, amango yameraga, yashisha bwenene gwanaba murhi, chiro n' enyunyi z' emalunga zalema zayinji yumbaka omu marhabi gago; ³³ Ashubi babwira ogundi mugani, aderha: obwami bw'empingu bushushene n'olwango mukazi muguma arholaga aluhira omu banamaha basharhu b' eshano, guhika amango obuntu boshi bwalugaga.

³⁴ Yesu abwira olubaga ebyo byoshi omu migani, arhanakazagi babwira buzira migani, ³⁵ mpu li kuhikirira okwaderhagwa n'omulebi: nashwekula obunu bwani omu migani, na nyalagaze byoshi bibishirwe gurhenga omu kulema kw'egulu.

³⁶ Lero afuhira olubaga, anachijira omu nju. Abegirizwa bage bamushegerera, baderha: rhufafanuliraga gulala mugani gw'emishaki omu shwa.

³⁷ Abashubiza, ntya: owarhwera emburho ekwirire, ye Mwen'omuntu, ³⁸ eshwa, ly'egulu, n'emburho ekwirire babene Obwami, emishaki babene lyangombe, ³⁹ omushombanyi wayirhweraga, ye lyangombe, omushalulo bw'obuzinda bw'egulu, abashaluzi bwo bamalayika. ⁴⁰ Nabo nkoku banashugula emishaki n'okuyikabulira omu muliro, kunji byanaba ntyo oku buzinda bw' egulu. ⁴¹ Mwene omuntu nj'arhuma bamalayika, bajikula omu bwami bwage abantu boshi b'enshuma na balala boshi bakazagi kola amabi; ⁴² nji bakwebwe omu ndugurhira y'omuliro, aho nji haba hakubanda endulu n'okuhekenya amenyo. ⁴³ Lero abashinganyanya nji balangikana nka zuba omu bwami bw' eshe. Oherhe amarhwiri gokuyunva, ayunve!

⁴⁴ Obwami bw' empingu kandi bushushire nka buhirhi bubishirwe omu shwa. Omuntu wabubonaga abubisha, n'omu bushagaluke ajiguza eby'aliherhe byoshi, ajigula elyo shwa. ⁴⁵ Obwami bw'empingu bushushene kandi n'omuchuruzi walonzaga amagerha makwirire. ⁴⁶ Abon'egerha liguma ly' engulo nene; agenda ajiguza byoshi aliherhe, agula elyo gerha.

⁴⁷ Obwami bw'empingu kandi bushushene n'omulaga bakabwire omu nyanja n'okurhega ebikwara bya ngasi lubero. ⁴⁸ Amango gwamabumba, abashana banagukululira eshi, banalondola, echikwara chikwirire banachibika, n'oku kabula echibihire. ⁴⁹ Kunji byaba ntyo oku buzinda bw' egulu. Bamalayika nji bayinja kuberula ababi n' abashinganyanya, ⁵⁰ n' okubakabulira omu ndugurhira y'omuliro, nji haba hokubanda endulu n'okuhekenya amenyo.

⁵¹ Ka mwayunvirhe ebyo byoshi? Bamushubiza, nechi.

⁵² Anababwira, ntya: che chirhumir' echo, ngasi mwandisi oyigirizwe ebiyerekere Obwami bw'empingu, ashushene na nin'enju oliwakula omu mbiko yage ebintu bihyahya n'ebikulukulu. ⁵³ Eri Yesu amala eyo migani, arhenga ho.

⁵⁴ N'eri ahika omu chishagala chage, ayigiriza abantu omu sinagogi, kuhika basomerwa, banalema baderha: ngahe akulire obula bumenyi n'ebi bisomerene? ⁵⁵ K'arhali mwana w'omubeji? K'arhali Mariya ye nyina? Yakobo, Yusufu, Simoni na Yuda, ka barhali bene babo? ⁵⁶ Na balibabo ka barhali haguma nerhu? Ngahe akulire ebi byoshi? ⁵⁷ Byaba bowe bisanzi bya kuhera. Aliko Yesu ababwira: nta handi omulebi abula kukengwa nk'omu chihugo chage n'omu nju yage. ⁵⁸ Arhanachijiraga bisomerene binene ahola, eri kubula obuyemere kwabo kurhuma.