¹ Ago mango Yesu ager'omu mashwa g'engano. Entumwa zage, za yunv'eshali, za rhondera kucha eminkenyi zalya. ² Abafarisayo, babona ntyo, ba mubwira: Lolagw'okw'entumwa zawe ziri zajira ebirhahemerw'olusiku lw'e Sabato.

³ Aliko Yesu abashubiza: Kamurhasomag'oku Daudi ajiraga amango ayunvag'eshali, yewe na balihaguma naye; ⁴ okw'ajaga omu shengero lya Nyamuzinda alya yewe n'entumwa zage ebiryo birhalihemerw'okulibwa na ngasi muntu chi badahwa bonine? ⁵ Na kandi kamurhasagi soma omu rhegeko okw'esiku z'e Sabato, abadahwa bagerag'eburhambi omu shengero buzira ku chij'emurhima? ⁶ Na ntyo mbabwirire hano hali echintu chizibuzibu kulush'eshengero. ⁷ Nka mwalimenyer'ogu mwazi: Bonjo bunene emunda muli, si ntalonza mburano, murhakalwisize abashinganya. ⁸ Bulala mwen'omuntu ye kulir'e Sabato.

⁹ Na ntyo eri arhengahola, Yesu aj'omu chishagala. ¹⁰ Mwaliri omuntu oholer'okuboko. Badosa Yesu: Kabirhuhunir'okufumya olusiku lw'e Sabato? Kwali kumulonza kunyamanja.

¹¹ Abashubiza: Nde mu mwabo nka herhe chibuzi chiguma chonine chikarhemba omu chiriba olusiku lw'e Sabato arhankaja ku chirhembula? ¹² Kw'Omuntu arhalushir'echibuzi? Kuliku derha, oku bihunire oku jir'amenja olusikulw'e Sabato. ¹³ Oku ntyo Yesu abwira oy'omuntu: Lambul'okuboko kwawe. Alambulako kwaba kuguma n'okundi. ¹⁴ Abafarisayo bahuluka bajidosana oku njira nchi banka muyirha.

¹⁵ Aliko Yesu, aber'amanya, aja hale nabo. Lubaga lunene lwa mushimba. Afumya abalwala banene, ¹⁶ ana bakomereza oku bunene barhajaga kubiderha. ¹⁷ Y'okubuzinda bihikirir'ebyo mulebi Isaya alebaga, ²² N'oku ntyo bamulerh'omuntu wa bazimu, orhabona, chiro arhanaderha, ana fumya elyo gama lya derha lyanabona. ²³ Olubaga lwoshi lwasomerwa mpu: Karhali mugala wa Daudi oyu?

²⁴ Abafarisayo, babere bayunva ntyo baderha: Oyu muntu yalibisy'abazimu oku zino lya Belizebuli mukulu w'abazimu.

²⁵ Bulala Yesu alimenyer'endalala zabo, ababwira: Ngasi bwami bukachigaba kukumbagala bukumbagala na nta nju eri chishagala chichiberamo chiyimanga. ²⁶ Akaba lyangombe analibisya lyangombe, agabirwe oku yenine, gurh'obwami bwage bwankayimanga? ²⁷ Na nkaba nyono, na ndibisy'abazimu oku misi ya Belezebuli, abana benyu misi yande babalibisyako? Chinji charhuma baba bach'amanja benyu. ²⁸ Aliko, ankab' oku Muka gwa Nyamuzinda kundi na libisy'abazimu obwami bwa Nyamuzinda bwayinjire enyanya zenyu. ²⁹ Ngahe, omuntu akaj'omu nju y'owindi muntu oherh'emisi ashambuh'ebikulo byage, buzira kurhaga shwek'oy'omuntu w'emisi? Oku ntyo agaleshambuha enju yage. ³⁰ Orhali haguma nani eri mushombanyi wani, n'orharhola haguma nani eri kushandaza ashandaza. ³¹ chochirhumire nderhere: Ngasi chaha na ngasi chijachi nji chababalirwa oku bantu, aliko echijachi enyanya za Muka wa Nyamuzinda chirhakababalirwa chiro n'ehityu. ³² Owelerhe obushombanyi enyanya za mwene muntu nj'ababalirwa, alik'owejachire Muka gwa Nyamuzinda arhakababalirwa kuno gulu chiro n'enyuma omu myaka ya yinja. ³³ Omurhi gwinja n'elehe lyago; omurhi gubi n'elehe lyago; bulala bameny'omurhi kugerer'elehe lyago. ³⁴ Eli burha ly'enjoka, gurhe mwankalonza kuderh'aminja nabo muli babi? ³⁵ Omuntu mwinja omu hantu hinja, akol'aminja, n'omuntu mubi ahantu habi akol'amabi. ³⁶ Mbabwirir'okw'olusiku luzinda ngasi mwazi gwabushabusha gwaderherwe nji gwadoswa. ³⁷ Bulala kugerer'enderho zawe wechungulwe, na kugerer'enderho zawe nji wahanwa.

³⁸ Oku ntyola baguma babandisi n'aBabafarisayo bamushubiza, omu kuderha: Mwigiriza rhulonzeze orhuyerek'echimanyiso.

³⁹ Naye abashubiza ababwira, mpu: Eli burha libi n'ely'endyalya! Ligwerhe ly'alonz'echimanyiso, chirali ch'omulebi Yona. ⁴⁰ kulala Yona ajiraga siku esharhu na madufu masharhu, omunda y'efi nantyo mwen'omuntu nj'amala siku esharhu na madufu masharhu omu shinda. ⁴¹ Abantu b'e Ninawi nj'ibayumuk'amango gw'olubanja n'eri burha banalihane bulala balichiyunjwize amango Yona abayigiriza, n'olushire Yona y'on'oli hanola. ⁴² Omwami kazi w'ekarhi k'ezuba nj'ayimanga n'okujisa lubanja n'eri burha, nj'analihana bulal'arhengerera ngasi hantu h'egulu kuyunviriz'obwenge bwa Solomono, talaga hano hali olushire Solomono. ⁴³ Amang'omuzimu mubi amarhenga omu muntu anagend'alonza lonza ahantu hayumire eyahabula. ⁴⁴ Anaderha: nagenda kushubir'omu nju yani, omu narhengaga. N'eyayinja ashimana ntaye olimo, enabizizwe, enarhindirwe. ⁴⁵ Oku ntyo anagenda, mwebyo bichanji anajilerh'abandi bazimu mushanvu babihirhe ku mulusha n'eli bayinja banachilambulamo, n'oborhere bw'oyu muntu bwanaba bubi kulushiriz'oborhe bwage burhanzi. Kunji byera eri burha lirhajira lugero lubi.

⁴⁶ Aber'ali abwir'abantu, lolaga Nina na bene bayiker'embuga, balonza kumuderhesa. ⁴⁷ Ler'omuntu muguma Amubwira mpu: Nyoko na bali benyu bayimangire embuga, bali bakulonza.

⁴⁸ Naye ashuz'owa mubwiraga, mpu: Nyama yende na bene berhu balande? ⁴⁹ Alambul'efune yage okuntumwa zage, ababwira, mulolage Nyama na bene berhu; ⁵⁰ bulala ngasi uwunji wajir'obulonza Darha oli nyanya, yoyola ye mwene werhu, na mwali werhu, na Nyama.