¹ Ojo Yesu lo deu ilulung, ko kirwoho gum lo donge o lö i tongohino. O fuonu kalihitak kunenge ² inyi ko ki caha ki tiyena icieng o jo;

¹¹ Ingönore ite gum ko lehi moro cio ite, kiti gimati ki gwilihitati tenyitenyi kuna i rohorri cak to nan. ¹² Iti kwamati i ngohi taulo kuningi to kwerri tonyo obolo bahasis ningi idi kai, tonyo, iti gimi manyu afa kamocok kulafa li tem iyo ite.

¹³ Ira ite balang lo kov. Adi ka li tiri balang lemun nenge o tum ki nyahuno lemun nenge aja? Li da orihe o jir la ra lo ki biroro oleng i pudiari to kejuha. ¹⁴ Ira ite wangun lo kov, siti na lo ngön kai lo donge i da i duha. ¹⁵ Ida manyu cio i nohahita lomo i muhohini to ilebu, otedohini faji na lo tya o jir o farang iyo cio pili kuna lo ngön kaji. ¹⁶ To na kikoi bito i nuahata manyu ketemoni lo cio owang ojir icieng o deu ticitici kuningi kuna i jirri ko kiti kwatati Apa ningi na lo ngön kai.

¹⁷ Ke iiyo i jo a lotu nan ki fufuso cik ko imociti. I da nan a lotu ki fufuso icieng oto a lotu nan kiti futa icieng. ¹⁸ Ahi rihohi tenya lo dede, many ori mute kai ko kov i da lobo kigero sidi kode kiswahit lo galam ori iyo cik i tiyohino sangite kuna li gero fad. ¹⁹ Tungani na lo gil kileng lobo sidi to kiji lo kuno cihicihi, i teyanahi manyu cio gila necieng, i lolongi mute o jo i sidi iyo okabue lo kai ojo tungani na li tiyo iti yena manyu cio kuno cihicihi i lolongi mute o jo o bolo iyo okabue lo kai. ²⁰ Tonyo, ahi rihohi nan ite a jo; mayak ko lo gal nyujon ningi lo kulo Parisihin ko katiyenak kulo cik, i da ite i tum rutorro okabue lo kai.

²¹ I ning ite o jo o jimi afa iyo cio berien, "ke fade". Tungani na li fade kaletoni, o ngiru ngoto lo gedia kue nenge ²² Oto a jo nan diho ite tungani na li longo iyo rece a rus, o ngiru ngoto lo gedia kue nenge. Tungani na lo mor rece, i yari ketemoni lo lokiho. Manyu tungani na lo jo iyo rece, 'dataru isi!' I lo ca kima lo Geena. ²³ Inyi li co ka li cuara isi kicuara nino cali iyo Lobanga oto hati iyiu jimitan o ngön tenya kiji nino ko rece nino, ²⁴ i ngohi kicuara nino cali i lo re to yomo ko rece nino i lotunore hati ki cuara kicuara nino. ²⁵ To keru tenya ko meroni nino deudeu o rihe i da li goru lokiho. To ruk deu o rihe i ngon kikoi tonyo ki co ca isi iyo kangotoni lo gedia la manyu ca lohi co isi iyo asegere kifihi isi lotorare. ²⁶ Ahi rihohi tenya lo dede i da isi i lahuno manyu i keru duma mongiyo nino fad.

²⁷ I ning afa ite o jimi ke yiau ngoruani lo tungani. ²⁸ Oto ahi rihohi nan ite jimitan, tungani na lo de ngoruani lo kaletoni to damun, lo keru ki yiauno inyi to tau nenge. ²⁹ ko lihi co konyek iteten nino isi kipal, to wolohosu oleng i bire. Oyak iyo isi kiti rijoro ngati lo ken lobito i lany mute ken nino fad ranguno kibiroro kimatare. ³⁰ Manyu ko lihi co kana iteten nino isi kipal, to ngute i bire, Oyak diho isi kiti rioro ngati lo ken lobito i lany mute ken nino fad ki biroro kimatare. ³¹ Otenyi afa ojo kolo jo tungani a jaha ngoruani nenge ojir re i gerohi inyi waraga lo jaha. ³² Oto a jo nan diho ite, tungani na lo jak ngoruani nenge mayak to rujon lo kue, iti rangu na ngoruani ki tiyo lomuna. Tungani manyu na lo ngotohino yema na ngoruani li tii lomuno.

³³ Li ning manyu ite ojo o jimi afa diho cio berien, ke butia to talerun. Iti futa tenyitenyi fad kuna li butihi isi iyo Lobanga. ³⁴ A jo nan ke butia tur to kai tonyo a ra seger lo obolore lo Lobanga kode to ³⁵ kov tonyo i tongo a ra taban lo kejuha kunenge kode to Jerusalem tonyo i tongo a ra siti lo Kabu Nahitok. ³⁶ kode ke butia to kue nino tonyo i da isi i tum ki kukumuno kileng fofiti lobito i ruok kode okwe. ³⁷ Iti suho i ngohi ibo nino to a ra ibo kode ida a ra ida; tonyo lobotohi lo gal na olotu iyo karohojani.

³⁸ I ning ite o jimi afa konyek to konyek, kale to kale ³⁹ Oto ahi rihohi nan ite; keti baha kasusuani. Ko lohi nang tungani makal nino ngati lo iteten i belohi manyu ngati lo ikajong. ⁴⁰ kode ki tob tungani isi owak dumaru long nino, icuarahi manyu cati ⁴¹ kode ko lohi fudahi tungani isi loro mail lobito ko inyi, ilo ko inyi maili are. ⁴² Icuara na lilifa diho isi, manyu ke mitere na lo wak kuro diho isi.

⁴³ Ining ite ojo ojimi afa i loriehat nino iberu hati meroni nino ⁴⁴ Oto ajo nan diho ite, imaruti merok kuningi manyu i lifa to cio kuna lehi yeyela ite ⁴⁵ Ojir ite fad i ra tee kulo Apa ningi na lo ngön kai. Ico inyi kolong otulu iyo karohojak ko kajirak a ra lobito, manyu iti ca kuju iyo cio kuna i nyuji taulo ko kuna i boti taulo. ⁴⁶ Ka lihi maru isi cio kuna lohi maru isi jia bahasis nyo mute i rumu isi? Ida kileng kasovok kulo mucoro idima ji? ⁴⁷ manyu ka lihi fonyo isi recerra kunino jia, nyo ba i tiyo isi i cio kula kude? Kileng pagani, ida re itiyoti ji? ⁴⁸ Ito bir iya na lo birarre Apa ningi na lo ngön kai.