¹ Ito geny, ke tiyo ticitici kuningi kulo jiran ketemoni lo cio a ra lo ki totoro. Ka lihi tii ite ji, ida ca ite i rihe irumu bahasis ningi to ketemoni lo Apa ningi na lo ngön kai. ² Hati ka lihi cuara diho kakidahani, ke kut ture lo ki totoro iya na lihi tiyore katalerok to lotubarehin ko kikohin ojo o jir cio ki majare icieng. Ahi rihohi tenya lo dede, lo kerihini duma necieng rief. ³ Oto ka lihi luaha isi kakidahani ke co kana nino ikajong oyen tohi na lihi tiyo kana nino iteten. ⁴ ojir luaha nino ara lo lit. Ojo ca Apa nino na lo deya tohi na lihi tiyo isi lo lit, ki co isi bahasis.

⁵ Manyu ka lihi lifa ite, ke ri iya katalerok. Tonyo i maru icieng ki lifa i rumu o woitati lotubare kode lokudit lo kikohin o wahitarehin ki totoro kenite o jir cio o deya. Ahi rihohi tenya lo dede, lo keruni duma icieng rief. ⁶ Oto ka lihi lifa isi i lo to rute kudule nino i genihi agwala i lifare iyo Apa nino na li da o boto. Oto Apa nino na lo deya tohi na lihi tiyo isi lo lit ki co isi bahasis. ⁷ Manyu ka lihi lifa ite ke fulik tenyitenyi becek iya pagani kuna li iiyo o jo o ningo ba Lobanga icieng to tenyitenyi kunecieng kuna i borengi ⁸ Ke mana rijon ko icieng, tonyo o yen Apa ningi tohi na lihi wak ite many o rihe ite i da lihi tifi inyi.

⁹ Iyana, I ngohi kilifa ningi to ri ji; Apa niyang na lo ngon kai Karana nino o bangiti ¹⁴ Tonyo ka lihi lau isi cio kuna li pal diho isi, ki lau manyu Apa nino isi to kai ¹⁵ oto ka li da isi i launta cio palipali kunecieng, i da manyu ca Apa nino, ki lau isi.

¹⁶ Ka lihi faran ite kinga, ke boto i jon iya na li tiyore katalerok tona liti nor icieng komoma lo ki totoro iyo iyo cio jimitan ki faran icieng kinga. Ahi rihohi tenya lo dede, lo keru icieng rumuno bahasis necieng rief. ¹⁷ Oto ka lihi faran isi kinga, to twehi ngoroni kue i lal manyu komom ¹⁸ ojir i da oboto iyo cio jimitan i faran isi kinga, oto honyi Apa nino na lo deya tohi na tiyo isi lo lit ki co isi bahasis.

¹⁹ Ke ricahiti bara ningi ene kov, faji na lo tum ingenyuk ko nyal ki papala kode faji na lo tum kakatak gila ko kataru korony: ²⁰ Oto iti ricahiti bara ningi kai, faji na li da ingenyuk ko nyal o tum ki palaru ko faji na li da kakatak o tum goruno kata. ²¹ Tonyo, faji na lo ngön bara nino o ngön manyu tau nino ija. ²² Lomo lo ken inyi konyek. Ko lo jiri konyeha kunino, ken nino fad ko wangun ²³ Oto ko lo rohori konyeha kunino kimuyuk hati ko ki burahino ken nino fad. Ka la ra wangun na lo ngön kennino lokimuyuk o ri mutohun lo na lokimuyuk iya nyo? ²⁴ Oru lobo tungani lo tum ki rwa lokotorohi are, ngo beru ha inyi lobito i maru hati lu bito kode o ric lobito iti kaj lu bito. I da isi i tum kirwa Lobanga a ra lobito ko sang. ²⁵ Tona ahirihohi nan ite, keboro to warun ningi iiyo jimitan a nya ca nyo kode a mat ca nyo kode to ken nino jimitan a cief ca nyo. I da warun i lany daha i lany ken kielani? ²⁶ I tode ba kweny kulo kai; i da o yati kinyemo i da kileng o dengoti, i da manyu i juhoti daha derona. Hati hony Apa ningi na lo ngön kai i fita icieng. I da ite i goli iyo inyi i gal kweny? ²⁷ Ngai to kiji ningi lo tum sodohino tik lobito iyo warun nenge to kiiyo? ²⁸ Manyu nyo i bohohi ite taulo iyo kielani? To de koditi na lo turore katurahak kulo muang. I da icieng i tiyo, i da manyu o rifati. ²⁹ Oto ahi rihohi nan ite jimitan kileng kabu Solomon to bara ko kwatun nenge fad, i da afa i cief kielani kuna i duaruha iya kuno. ³⁰ Ka liti ciefita Lobanga nyari kulo muang ji, kuna lo litu jija ojo kianyi i birohini kimatare, ngi hati inyi ki cief ite o gal, ite kuno li sidi kiruk? ³¹ Tona, ke iiyo jimitan ki nya ca nyo? Kode ki mat ca nyo? Kode ki cief ca nyo? ³² Tonyo, o tahita pagani kuna sangite fad oto o yen Apa ningi na lo ngön kai jimitan i wak ite icieng. ³³ Oto iti tak re okabue nenge ko nyujon nenge ki cuari hati ite kuno sangite fad. ³⁴ Tona ke iiyo to kianyi tonyo i iyoro ca kianyi ake. I ngohi far lobito lobito to tumoro ko kidak nenge.