¹ Kurus, ofuonu kaduarak kula hitoha ko ngoroyok kula lo lanyu cio i ruhi o jir i fadari Yesu. ² Otori inyi ko rihoroti i yahahini diho Lahitok Pilato la lo lanyu Judea lo kuna karihin.

³ Ojo kopoc, Judas o ning o jo lo ngotohini weun kue lo Yesu, inyi ko ki rwo i nyahahi robia keek uni diho kaduarani la hitok ko ngoroyok kula lo lanyu cio. ⁴ o jo diho icieng, "la pal nan a gwila tungani la lo ru ko kipal." I nyahahi icieng inyi o jo, "a ra hati na nyio diho ohoi? Tic nino na." ⁵ Judas ko ruacahino kuna robia katua lo kaji lo Lobanga ko rocoro gororo. ⁶ I numu kaduarani la hitok kuna robia, ko jimitan, "i da cik i ruk o fihahini kuno robia ogogor lo robia kulo kaji lo Lobanga. Tonyo, i tongo a ra robia kulo okoto. ⁷ O fuonu icieng o ningoroti o jir o dumuni kula robia i nyangarehin mana lo kaduhoni lo motiong a ra faji na lo nuharehin misiok. ⁸ Inyina liti bari na mana o barare 'mana lo okoto' ko jija. ⁹ Iti fut lafa tenya lo teny kamoconi Jeremia ojo, "odumu icieng robia keek uni, wel na liti lotore cio kulo Israel inyi ¹⁰ inyangarehin mana lo kaduhoni lo motiong iya na lohi cihahinore Lahitok nan."

¹¹ O woita Yesu ketemoni lo gavuna, na ha gavuna ko ki tifia inyi o jo, "I ra isi kabu lo Judea?" I fotu Yesu o jo, "Ibo, iyana li tenyare isi".

¹² Ojo kaduarak kula hitoha ko lohituaha iti ringa ki tobo inyi, i da inyi i fotu. ¹³ Pilato ko ki tifia inyi ojo, i da isi i ningo kuno sadeni lo tenya cio ken lilo? ¹⁴ Oto Yesu i da i fotu ko lobo bito, i co gavuna i pany noo. ¹⁵ To faritin kuna hitoha, o lahahita afa Pilato katorani lobito la wak ilulung. ¹⁶ To kuna faritin o ngön o rumu lobo katorani lo kuat noo, o bara Barabas. ¹⁷ Ojo la ngun lo tuba ilulung, i tifi Pilato icieng o jo, "I wak ite nan ahi lahahi ite ngai, Barabas kode Yesu la li lolongoti o jo Kristo?" ¹⁸ Tonyo, o rumu inyi o yen o jo o kaine li co icieng i yahahinore Yesu diho inyi.

¹⁹ Ojo Pilato li tongohino diho seger lo ngoto lo tenya, ngoruani lenge ko culuno tenya diho inyi o jo, "ke tii lobo tohi ken lo la tungani lo rujore kipal, tonyo, a rumu adi nan kidak iyo kitirija to inyi.

²⁰ Oto o rihohi kaduarak kula hitoha ko lohituaha ilulung o jimi, iti lahu Barabas o ngerihini Yesu o jir i fadari. ²¹ I tifi gavuna o jo, ani diho kulo are i wahita ite nan ahi lahahi ite? I fotu icieng o jo, Barabas!

²² I tifi Pilato o jo, nga tii ha ba nan nyio diho Yesu la lo jimi Kristo? Icieng ko ki nyahahino o jimi, "to gurohi diho kete"

²³ I tifi Pilato o jo, to nyio? Nyio kipal lenge? Oto i gorori bebe "to gurohi diho kete!"

²⁴ Ojo lo deu Pilato ojo o ru lobo tohi nga tii inyi, i caha manyu cio ki gororo, ko dumuno kivi ko ki lala kac kulenge ketemoni lo ilulung ko jimitan, i da cien lo ele tungani ki nief nan. Tic lingi la.

²⁵ I fotu cio pili o jimi, i ngohi cien lenge to ngön kueci kuliyang ko kulo tee kuliyang. ²⁶ Inyi ko lahahino Barabas diho icieng. Na ha ko kiti lumo Yesu ko ki yahahino inyi o jir i fadari.

²⁷ Na ha asegere kulo gavuna ko ki yaruno Yesu kaji na i lalat i furuni olek lo asegere fad i riti inyi. ²⁸ O pucari kielani kulenge ko buburahinoti inyi kiela na i do. ²⁹ ko ki tirunoti i gita lo kikwa ko pucahinoti kue lenge. O fihi col kana lenge iteten ko gungon ketemoni lenge, o kwenitare inyi o jo, "To fonyo kabu lo Judea!" ³⁰ O miti kamilak ken lenge, o duhi kue to iluk kakeny kakeny ³¹ Ojo lo kerihi icieng kwenitare inyi, ko pucaroti la kiela i do. Iti ciefohini kielani kulenge ko rihoroti inyi o fuori gurohino diho kete na li riwa.

³² La ngun lo fuoro icieng oleng, i riciti ko tungani lo Sairin la lo bara Saimon. I fudahini inyi tingita lo na keteiriwa. ³³ Ogoruni faji na lo bara Gologota (faji lo koite lo kue) ³⁴ To inya i cori Yesu vino na li karuto ko loduai. Yesu ki manga ji, ko beruno mata. ³⁵ La ngun lo gurohi icieng inyi, ko ki biroti gumar lo ki kokorare kielani kulenge. ³⁶ I tongohinoti kov i ririati inyi. ³⁷ Ogurohini tenya na li toborehin inyi to kai lo kue lenge, i geri o jo, "Yesu Kabu loJudea Ele." ³⁸ O guri inyi ko kakokok are, lobito ngati lo iteten ko lobito ngati lo ikajong lenge. ³⁹ Omoro cio kula lo lot a ra inya inyi i niningati kueci ⁴⁰ Ojimi, "isi la li bunyoro kaji lo Lobanga, iti ngejuhu to faritin uni. To luaharu bo ake i culuno to keteiriwa, ka li ra isi kito lo Lobanga."

⁴¹ To na kikoi bito, o kwenitare manyu kaduarak kula hitoha, katiyenak kulo cik ko lohituaha inyi, o jimi, ⁴² "Oluahita afa inyi cio kude i da hati o luahu ken lenge. Inyi kabu lo Israel, i ngohi re i culuno to keteiriwa o jir ca ohoi ki ruk inyi. ⁴³ I genita inyi Lobanga, I ngohi ha ba Lobanga to luak inyi jija ko lo wak inyi." Tonyo, o jo ngole inyi "Nan kito lo Lobanga" ⁴⁴ To na kikoi bito, kakokok manyu kula lo guri ko inyi, i lyelyeng moro ken lenge.

⁴⁵ I caha to kil many tik lo myetangon, i muhe lokimuyuk kov fad ⁴⁶ goruno tik lo myetangon i gore Yesu to ogoro na i kuat o jo, 'Eloi, Eloi lama Sabac thani' jimitan "Lobanga lei, Lobanga lei, nyio ki corahi isi nan?"

⁴⁷ Ojo kula lo woita inya o ning ji, o koboroti o jo, i lolongo inyi Elia.

⁴⁸ Deudeu, lobito to kiji lecieng ko dumuno amur i lutohi diho vino na i wawac. O subohi diho kete ko ki fotohino Yesu o jir o mat. ⁴⁹ Kulakude ko jimitan, ito ngerihiti ba inyi. Ki deu ko lo lotu Elia luaha inyi. ⁵⁰ Yesu ko ki gororo ari to ogoro na i kuat, ko lahahino Okorif lenge.

⁵¹ To na tik, kiela kitihit na lo kor kaji lo Lobanga ko cira to kiji o kora are to kai many fotiri. Iti nienieng otira kov, o bora morutok. ⁵² Ongaja kwecerehin, kenite kulo cio kula i nyuji kulafa loweiha many many ko waruno, ⁵³ orutuni to kwecerehin. La ngun lo waru Yesu, ko fuoroti Jerusalem obototi diho cio becek. ⁵⁴ Ojo lahitok lo asegere ko kula lo ngöni ko inyi ki ririati Yesu o deuni otira ko sangite fad kuna li tiihino. O bangiti bebe, o jimi, "A ra ele kito lo Lobanga, dede sek" ⁵⁵ Orumu ngoruo kula i borengi bebe o ngöni ija i ririati lolomaje. I jifuno icieng Yesu to Galile o ricati inyi to sangite kuna lo wak inyi. ⁵⁶ Kiji lecieng, o ngön orumu; Meri Magdalena, Meri ngoto Jemis ko Josef ko ngoto tee kulo Zebedi.

⁵⁷ La ngun lo goru kolong kurou, o lotu lobo tungani to Arimatea lo bara Josef, na la ra orumu kajifitani lo Yesu. ⁵⁸ Inyi ko loro diho Pilato ki lifa ken lo Yesu. Ocik Pilato ojo ojir i cori inyi. ⁵⁹ Josef ko tinguno ken lo Yesu, ko bubura to kiela iribi na inyu tii. ⁶⁰ Ko kiti getohino kwecere lenge na ngejuk, na lo bohu inyi o wod moru. Iti boboru moru na hitok ko tuhohino kutuk lo kwecere, ko loro. ⁶¹ Orumu Meri Magdalena ko lobito Meri i siraniti to kutuk lo kwecere.

⁶² Kianyi nenge na la ra far na li jifita far lo ki kukumahino, o fuo kaduarak kula hitoha ko Farisihin diho Pilato. O rihohini inyi o jo, ⁶³ lahitok, ki bühü ohoi jimitan o rihe afa la katinonongani o wuar. O jo afa, "To koruong lo faritin uni, a buhu ca nan ari." ⁶⁴ To na to cik i riri kwecere lenge many far lo uni. Nga yen o fuonu ca jayona kulenge o kokole ken lenge, o rohohini hati cio o jo, "li buhu inyi" O lotu hati ca na kiti nononga lo kifuongi o rohoi i lany lo ketemoni.

⁶⁵ I fotu Pilato o jo, "I yaroto asegere, i fuo ito ric ki riria kwecere o toc iya na li yen ite." ⁶⁶ Ofuo icieng igieni kwecere o toc ko duanyahinoti kiherita kutuk. O fihahini manyu asegere kaririak.