¹ Ojo Yesu lo kerihi tenya kuno tenyitenyi fad ko jimitan diho jayona kunenge; ² Iyana li yenare ite lo tong faritin kulo Paska are, i yahahini manyu ca kito lo tungani o gurohini diho kete.

³ Naha kaduarak kula hitoha ko ngoroyok kabolorok kulo cio ko tubahinoti kolo kaduarani la hitok la lo bara karana lenge Kaipas. ⁴ I tifia icieng ki niefuno Yesu lokokole o jir i fadari inyi. ⁵ Ojo icieng, ke cio i tiyohino far lo karama, i karutoro ca cio.

⁶ Na lo ngönore Yesu Beteni kaji lo lobo tungani lo jimi Saimon lo lotululu. ⁷ Lobo ngoruani ko lotuno diho inyi ko okuluka lo ngoroni na i ur noo o gol manyu wel nenge ko ki juhohino kue nenge o rumu inyi o ngön daha. ⁸ Ojo jayona kulenge o deu ji, i longojitati noo. O jo icieng, nyio i palari ene ngoroni ji? ⁹ Ji ito lotori na ngoroni to wel na i bolo i cori robia kulenge diho kakidahak.

¹⁰ O yen Yesu kuna fad, ko jimitan diho icieng. Nyio iyeyela ite ene ngoruani? I tii inyi tohi na i duaru bebe diho nan ¹¹ Ingönota ca ite ko kakidahak faritin fad, oto hati, Ida ca ite i ngönita ko nan faritin fad. ¹² Ka li juhohi inyi na ngoroni kenlei, i kukumahino nan a ra lo nuha. ¹³ Ahi rihohi ite tenya lo dede. Faji na liti timarehin nayomit na i jir to kov fad, i letohitati ca tohi na li tii ene ngoruani lo ki iyiunitare inyi.

¹⁴ Naha lobito to kiji lo kula tomon ko are, la lo bara Judas Eskariot ko liebaru diho kaduarak kula hitoha ¹⁵ ko ki tifia icieng o jo, nyio i co ca ite nan ka la yahahi nan inyi kac kuningi? Icieng ko ki kenahino inyi robia keek uni ¹⁶ Many tona, o titilita Juda deya tik lo ki yahahino Yesu kac kunecieng.

¹⁷ Iyo far lo ketemoni to faritin kulo ibune na lo ru ibula to katua. O fuonu jayona diho Yesu ko ki tifiati inyi o jo, aji i wak isi ohoi ki kukumahi isi daha lo karama lo Paska?

¹⁸ Ifotu inyi o jo, i fuo Jerusalem diho lobo tungani, ito torohiti inyi iti jo. Ojo Katiyenani lo nyihu tik lei, a lotu daha karama lo Paska ko jayona kulei kaji lilo. ¹⁹ Ofuo jayona i tii iya na lo cihare Yesu icieng ko ki kukumahinoti Paska.

²⁰ O goru kurou o rumu Yesu o ngön daha ko kula jayona tomon ko are. ²¹ Oto o rihe icieng, o jo inyi diho icieng. Ahi rihohi nan ite tenya lo dede, lobito to kiji ningi ca lohi tob nan.

²² I toyo icieng bebe, i cahi ki tifia inyi to lobito to lobito. "Lahitok, nan ba?"

²³ I fotu Yesu o jo, la lohi daha ilebu lobito ko nan ca lohi tob nan. ²⁴ I jiv ca kito lo tungani kikoi lafa li gerorehin to inyi. Oto kidak diho la tungani li tob kito lo tungani, o yak nga ra i da afa o tomonuni inyi.

²⁵ Oto Judas, kopoc ko jimitan, "Lahitok, nan ha ba?" I fotu Yesu o jo; Ibo, isi.

²⁶ Orihe icieng o daha, odumu Yesu ibune i livahi ko benya. Ko jimitan, i kai iti nya. A ra ene kenlei. ²⁷ ko dumuno manyu icoli. I co kwama diho Monye ko ki cuara icieng o jo; iti mat to ene icoli, ite fad. ²⁸ A ra ene icoli lo okoto litole, lo cik na li juhoro to cio kula i borengi lo dumaru kipal. ²⁹ Ahi rihohi ite. I da ca nan a rihe a mat vino ari many ka la lotu mute a mat ko ite diho okabue lo Apa lei.

³⁰ La ngun lo wol icieng wole ko fuoroti iya donge lo Oliv. ³¹ Na ha Yesu ko rihohino icieng o jo, na karue i sara ca ite i corahi nan ake. Tonyo, i gero o jo; A bohe ca katibalani I sara kera kulo twol. ³² Oto ka la buhu nan, a tem ca nan Galile.

³³ Pita ko jimitan, "Kileng ngi sara kulakude fad, i da ca nan ahi corahi isi.

³⁴ O jo Yesu, ahi rihohi tenya lo dede. Ene karue o rihe ocikor i da li kök o rumu re isi li mon kakeny uni.

³⁵ Oto Pita o jo, kileng ba nga ra weun ko isi, ngi da nan ahi beru isi tur ko lobo. O teny manyu jayona kulakude ji.

³⁶ To inya, o fuo oho Yesu ko jayona kulenge many lobo faji lo bara Getesemani ko rihohino icieng o jo, i tongoti re ene a rihe nan a lö idi kiliva. ³⁷ I yaru inyi Pita ko tee kulo Zebedi, ko ki caha ki toyo ko ki udo. ³⁸ ko jimitan diho icieng, I büle kidak tau lei many a mana weyaru. I tongoti ene, i ririati kov ko nan. ³⁹ Loro ketemoni lobo gaa ji ko urohino o cumohi komom kov i liva o jo, Apa lei ka lo tumuno ngo dumari ene icoli diho nan oto i da a ra to wahun lei o jir a ra wahun nino li tiihino. ⁴⁰ Ojo inyi o yitu diho jayona kulenge, o rumu icieng li lüra. I tifi inyi Pita o jo, i da ite i tum ki riria kov ko nan kileng to tik lobito? ⁴¹ Iririati i liva o jir i da kiti labi. I ruk tau oto ken o karu. ⁴² O yite ari kiliva kiti are, o jo, Apa lei ka li da o tumuno dumaru lo ene icoli diho nan, o jir nan a mat. I ngohi i tiyohinp to wahun nino. ⁴³ Ojo inyi o yitu ari o rumu icieng lo getoroti, tonyo, i ruociha o rumu konyeha kulecieng. ⁴⁴ Inyi ko ngerihino icieng o yite ari kiliva lo kakeny uni, i nyahat inyi na kiliva bito. ⁴⁵ Na ha inyi ko yituno diho jayona ko jimitan diho icieng, "o rihe ite i geto ko kiyoma? To de lo nyihu tik, manyu li yahahini kito lo tungani kac kulo kapalak. ⁴⁶ Ito wojuti lohi fuo. Ene lo goru katoboni lei!

⁴⁷ Orihe inyi o tenya, o tul Judas la la ra lobito to kiji lo jayona tomon ko are. I lihu inyu ko ilulung la hitok kula lo tahitati latuboti ko iluhi. Kaduarani lahitok ko ngoroyok kula lo lanyu cio liti vahu icieng. ⁴⁸ Katoboni ja li kukumahi kitotorita ko icieng jimitan tungani la la fony nan, iti runy ki niefa inyi". ⁴⁹ Judas ko ringahino fonyo Yesu, o jo, to fonyo Katiyenani.

⁵⁰ Yesu ko jimitan diho inyi, mortele, itiyo ja tohi na li lotunore isi. Cio ko fuonuno inya ketemoni ki niefa Yesu. ⁵¹ Na ha lobito to kiji lo kula jayona kulo Yesu ko wutuno latubot lenge ko ngoda karwaani lo kaduarani lahitok o ngutoro kiyok. ⁵² Yesu ko jimitan diho inyi, i nyahahi latubot lilo sohobo. Tonyo kula fad lo sutunita latuboti, o keroroti mute to latubot. ⁵³ I yio isi ijo i da ba nan a tum ki lolongo Apa lei o jir iti vahu malaikahin kula li lany ilulung lo karemok tomon ko are? ⁵⁴ Ngiti futi hati kigerit na lo jo i tiihino ca ji, aja? ⁵⁵ Tona tik Yesu ko ki tifia ilulung o jo, i fuonu ite ko latuboti ko iluhi ki niefa nan. A rihita nan kasasuok? Ati yenitita manyu nan kaji lo Lobanga faritin fad, i da ite i nief nan ⁵⁶ Oto i tiihino ene lo kiti futa kigoro lo kamocak.

⁵⁷ Kaniefak kulo Yesu ko ki yaru inyi diho Kaiapas, kaduarani lahitok faji na lo tubare katiyenak kulo cik ko ngoroyok kula lo lanyu cio. ⁵⁸ Na ha Pita i jif inyi to omot lolomaje many kolo kaduarani lahitok. Ko rutoro i tongohino kiji lo kakurak lo deya nyio ca li tiihino. ⁵⁹ I fifid kaduarani lahitok ko lokiho fad saden lo talerun o jir i fadarorehin Yesu ⁶⁰ Oto i da o rumuni lobo, kileng lo tem kopoci. To kifuongi o fuonu kude are o jo, ⁶¹ "O jo afa lerok, a bunye ca inyi ene kaji lo Lobanga ati ngejuhi to faritin uni."

⁶² Kaduarani lahitok ko wojuno ko jimitan diho Yesu, "i da isi i wak ki fotuno?" Nyio ele saden li yauno kulo cio diho isi? ⁶³ Oto Yesu iti ring buho. Na ha Kaduarani lahitok ko jimitan, "Ahiti tenya nan isi to karana lo Lobanga la i wuar, ki rihohi ohoi ka li ra isi Kristo, Kito lo Lobanga?"

⁶⁴ I fotu Yesu o jo, Ibo, inyi na li teny isi. Oto ahi rihohi ite pili jimitan, i deu mute kito lo tungani i sumo iyo iteten lo kaboloroni many o lotu to idis lo kai".

⁶⁵ kaduarani lahitok ko cira kielani kulenge, ko jimitan, "lo mor inyi Lobanga, saden nyio ki rihe ohoi ki tahita? Li ning ha ite moro lenge, ⁶⁶ Ijo hati ite aja?" Inyahahi icieng o jo, o cam inyi to weun. ⁶⁷ ko ki cahati mita kamilak komom lenge, onangi inyi. Kude ko nanga inyi ⁶⁸ itifiati hati ojimi, imoca ba diho ohoi Kristo. Ngai lohi nang isi?"

⁶⁹ Itongo o rumu Pita kilongoni, kito-karyoni karwaani ko lotuno diho inyi ko jimitan. I lihitita kileng isi ko Yesu to Galile.

⁷⁰ Oto inyi ko mona to ketemoni lecieng fad ojo, "Ida nan a yen tohi na li tenya isi."

⁷¹ Ko loro to inya iya lokoli. Lobo karyoni manyu ko deuno inyi ko rihohino diho cio kula lo ngöni inya ojo, "I lihitita ele tungani ko Yesu lo Nazaret"

⁷² Oberu inyi ari i dima ojo, "buti! i da nan a yen la tungani."

⁷³ Lobo gaa, kula lo woita inya manyu ko fuoro diho inyi ko jimitan, "dede i ra isi lobito to kiji necieng, tonyo, o heruno kileng itenyit lilo"

⁷⁴ Pita hati ko ki ficoro akeake ko rihohino icieng o jo, "buti! I da nan a yen lerok." Deudeu manyu, i kök ocikor.

⁷⁵ Pita ko ki yiuno tenya lo Yesu, la ngole lo jo, "O rihe ocikor i da li kök o rumu re isi li mon nan kakeny uni." Inyi ko loro oleng i cir bebe.