¹ To kunu faritin, ori mute okabue lo kai iya tee katyok tomon kula lo dumu lomohin kunecieng o fuori kiti ricoti lateran. ² Myet kulo kulo karyok o dataruha ojo myet o genyi. ³ O tehoro kula i dataruha lomohin oto i da i yari ngoroni yatiyati. ⁴ Oto kula i genyi i turarroti ngoroni to kutubahin a ra lobito ko lomohin kunecieng. ⁵ Irungo manyu lateran noo, ilura icieng many o yore jö. ⁶ Tuk lo karue o ninguni ki gorita, "lo goru lateran, ifuonu iti ricoto.'

⁷ Karyok fad ko kuenyuno, icahi ki kukuma lomohin kunecieng ⁸ Ojo kula i dataruha diho kagenyak, "Ki militahi ohoi lobo ngoroni ningi, lo dunyaru lomohin kuniyang"

⁹ Ojo icieng oru i da ca otum to ohoi ko ite, ifuo diho katilotok kulo ngoroni i nyangu ningi. ¹⁰ Oto o rihe icieng o fuoro ki nyanga ngoroni, lateran ko goruno. Karyok kula adi li kukumahino ko rutorroti ko inyi daha karama lo kiyemi ko ki gienihinoti agwala.

¹¹ To kifuongi o fuonu manyu kula adi, ilolongoti, "Lahitok, Lahitok, ki ngajahi ohoi"

¹² Oto inyi i fotu o jo, ahi rihohi nan ite tenya lo dede, i da nan ahi yen ite. ¹³ Tona iririati, tonyo, i da ite i yen far kode tik.

¹⁴ Ari, o ri mute iya tungani la loloro o wele. I lolongu karwaak kunenge o korahi sangite kunenge diho icieng. ¹⁵ Iyo lobito i co robia myet, iyo lobito robia are, iyo lobo lobito. I tutumohi to golun necieng, ko loro o wele nenge. ¹⁶ La tungani li cori robia myet ko ki caha ki tiyore robia kunenge, ito tomonu myet kude. ¹⁷ I tii manyu lo robia are iya na o rumu are kuna kude ¹⁸ Ojo la adi lo rumu robiati lobito ko loro boha tula, ko nuhahino robiati lo Lahitok lenge. ¹⁹ La ngun li yaru faritin becek, Lahitok lo kula karwaak ko lotuno, i cak ki ngingija tic necieng ²⁰ La tungani li cori robia myet ko ki yauno robia myet kula kude, ko jimitan Lahitok to de la rumu nan robia myet kula kude.

²¹ I tii isi o toc karwaani lei la li genuno. I genuno isi to sangite kula kuting, ahi fik ca nan isi i lanyu sangite kuna i borengi. Ou to ngar kwama lo Lahitok nino.

²² Olotu manyu la adi tungani lo robia are, ojo, "Lahitok i co afa isi nan robia are, to de, la rumu nan are kula kude."

²³ I nyahahi Lahitok lenge inyi ojo, i tii isi otoc karwaani la ijir i genuno kileng. I genuno isi to sangite kula kuting, ahi fik ca nan isi i lanyu sangite kula i borengi. Ou to ngar kwama lo Lahitok nino.

²⁴ Olotu hati manyu lafa lo rumu robiati lobito ojo diho Lahitok lenge, "Lahitok, a yen afa nan jimitan isi tungani la i gol, i dengo isi faji na li da isi i yihi kinyemo. I luco manyu faji na li da isi i rem. ²⁵ Tona, a lotu afa nan a bang, ko loro ko ki duhahino robiati nino kov. To de, tohi nino ene."

²⁶ I nyahahi Lahitok nenge inyi o jo, isi karwaani la i rohoi, i karu! I yen isi jimitan a dengo nan faji na li da a yihi kinyemo. A luco faji na li da a rem? ²⁷ Nyio hati i da isi i fihahi robiati lei beng o jir ngole ojo nan o lotu, ji a rumu ko kweci. ²⁸ Ito dume robiati diho inyi, i cuarata diho nu lo tehita tomon. ²⁹ Tonyo, tungani la lo tehita o sodohini. Ojir o tek oraban. Diho tungani la lo rujore, kileng lobo sidi lo tehita inyi odumari diho inyi. ³⁰ Manyu, iti warete la karwaani lo ru tic oleng katua lo lokimuyuk. Faji na li cirarehin ko komo lo kala.

³¹ Ko lolotu kito lo tungani to kimedek lenge ko malaikahin kunenge pili. I tongo mute inyi diho seger lo okabue lenge to kimedek lo kai. ³² Cio to kovikovi pili ko tubuno ketemoni lenge, i gegel ca inyi cio to kiji lo kaletok iya na li gegelare katibalani kera ko kiri. ³³ Ofik ca inyi kera ngati lo iteten ko kiri ngati lo ikajong lenge. ³⁴ Naha mute kabu ko rihohino kula to iteten, i fuonu ite kula lohi co Apa lei gum ito rumu lo lunyore ningi okabue lafa li kukumahini to ite many to duho lo kov. ³⁵ Tonyo, ki daha afa kinga nan, i co ite nan daha. A ura, iti mat ite nan. A ratu nan, i yaru ite nan kangite kuningi. ³⁶ A ngaturita afa nan, iti cief ite nan. A muai, iti muai ite nan. A ngön lotorare, i wajunta ite nan.

³⁷ Oto kajirak i tifi inyi, ojo," Lahitok afa kinga ki nya isi, ki fit ohoi isi kode i ura kiti mat ohoi isi? ³⁸ Anu afa ki rumu ohoi isi i ratita ki yaru ohoi isi kajihit kuniyang, kode i ngaturita, kiti cief ohoi isi? ³⁹ Anu afa i muai isi kode i ngön lotorare, ki waj ohoi isi?

⁴⁰ Oto kabu i nyahahi ojo, ahi rihohi nan ite tenya lo dede. Lobo tohi milit li tii ite diho lobo sidi to kiji lo kulo recerra kulei i tii ite diho nan. ⁴¹ Oto o jo diho kula lo ngön ikajong lenge, I ngadata ten diho nan ite kula lohi fici. I fuo kimatare la li kukumahini to Sitan ko mininga kulenge. ⁴² Tonyo, ki riafu afa kinga nan, I da ite ki co nan daha. A ura afa nan, i da ite kiti mat nan. ⁴³ Aratu afa nan, i da ite i yaru nan kajihit kuningi. A ngaturita afa nan, i da ite kiti cief nan. A muai afa, a ngön lotorare, i da ite i waju nan.

⁴⁴ O jo many ca icieng, Lahitok, anu afa ki deu ohoi isi ki riafu kinga kode i ura kode i ratita kode i ngaturita, i muai kode i ngön lotorare, ki beru luaha isi?

⁴⁵ I nyahahi mute inyi o jo, ahi rihohi nan ite tenya lo dede. Lobo tohi li da ite i tii diho lobo sidi to kiji lo kulo recerra kulei, i da ite i tii diho nan. ⁴⁶ Oto mute icieng o fuo diho kidak na li da o ru, oto hati kajirak diho warun na lo sio jik.