¹ Oruto Yesu to kaji lo Lobanga. La ngun lo loro inyi, ofuonu jayona kunenge o utahini lofere lo duho nenge. ² I tifi inyi icieng o jo, i deu ite kuno sangite fad? Ahi rihohi nan ite tenya lo dede, o ru mute lobo moru lo ngerihini i cadoho kue lo kaletoni. I biruni mute fad kov.

³ Ojo Yesu li tongohino kai lo donge lo Oliv, o fuonu jayona kunenge diho inyi lo lit ko jimitan. Ki rihohi ba ohoi anu mute i tiihino ene tenya, ko nyio mute li totoro iituno nino ko lohicungi lo kov?

⁴ I nyahahi Yesu icieng o jo, iti geny ke co kiti nonongi. ⁵ Tonyo, o borengi mute kula lo fuonu to karana nei o jo, "Nan Kristo" ko kiti nononga cio becek. ⁶ I ning ca ite remiremi ko tenyitenyi kuna li gugumoti to rem, oto ke ngangalitati. Tonyo, i tiihino ca kuna sangite i rumu lohicungi o rihe o lotuno. ⁷ Orem ca kov ko kov, okabue ko okabue. Ongön mute kingaco ko otirahin fajihit becek ⁸ A ra kuno sangite pili ki tera lo kidak na lo lolotuno kov. ⁹ ofuonuni mute kiti gimi ite, ki tahitati a ra lo ki fadaru. Ki beru ca kovikovi pili ite to nan. ¹⁰ To kuna faritin o ngerihi mute cio becek kiruk ofuonuni a rahiti kopoci. ¹¹ Ofuonu manyu mute kamocok katalerok becek, iti nonongi cio becek. ¹² To sodoro lo rohojun, o huliete ca kimara diho cio kula i borengi. ¹³ oto, o luahuni ca cio kula lo dik many lohicungi. ¹⁴ O jir manyu ene layomit i jir lo okabue iti sarihini kovikovi pili o lotunore hati lohicungi lo kov.

¹⁵ Tona ka li deu ite kikumi na i yeyer na liti banga lafa lo teny kamoconi Daniel o woita faji na inyu. (I ngohi kakenani i niang o toc) ¹⁶ I ngohi cio kulo Judea i fe iya dongeco ¹⁷ ke co tungani na lo ngön kai lo kaji o jo a lö dumuno lobo tohi to kaji. ¹⁸ Ke co tungani na lo ngön mana o iite ki yamaru kyela nenge. ¹⁹ Orohori mute kunu faritin to ngoruo kafongak ko katinahak. ²⁰ I livati jimitan ojir angwala ningi i da a ra furat kode to sabit. ²¹ Tonyo, ara mute lo kunu faritin tamot lo kidak na hitok lafa lo rihe i da oboto many to kiteri ko nu far, i da manyu mute lobo ori ko inyi. ²² Ngi da iti suhi kunu faritin, ngo ru tungani lo fur. Oto to cio kula lo nyumu Lobanga, iti suhi mute kunu faritin. ²³ To kunu faritin, ko lo jo tungani; to de Kristo ene kode nu idi, keruk. ²⁴ Tonyo, o fuonu mute kristohin ko kamocak kula i taleri i tii kitotorihin ko tanguhin kuna hitoha lo kiti nononga koko cio kula lo nyumu Lobanga ko lo tumuno. ²⁵ Naha, lahi rihohi nan ite berien o rihe i da li tiihino. ²⁶ Ko lohi rihohi mute tungani ite ojo oinu idi kuny, ke lö ija. Kode o jo o ngön ene kudule, ke ruk. ²⁷ Tonyo, iya na li medehare hila i nuak kov many to ngati lo Okangere many Lodoyore lo kolong, o ri manyu mute lotuno lo kito lo tungani ji. ²⁸ Faji na lo ngön tohi na i wei, a ra lotubare lo taruha.

²⁹ Deu to omot lo faritin kulo kidak, "Omutok mute kolong ko ofa manyu i da i cuara wangun oruruno mute kanger to kai ko golun fad to kai iti nienianga. ³⁰ To kuna faritin o boto ca kitotorita lo kito lo tungani to kai naha cio to kovikovi pili i toyo. O deu ca icieng kito lo tungani o lotuno to idis lo kai ko tuman ko farangun na hitok. ³¹ Oto ca inyi o son malaikahin kunenge ko ture na i kuat, oto ca icieng i turubu cio kula lo nyumuni to mogori kulo kov ongon fad to lobito ngati lo kai many a ngati.

³² Ito rumu ene kitiyena iyo bule. Ka li deu ite tanitanihin kunenge lo cief ko bene o lit, iti yen jimitan lo nyiha kamieu ³³ Iya na manyu ka li deu ite kuno sangite fad, iti yen jimitan lo nyiha tang lo ngön agwala. ³⁴ Ahi rihohi nan ite tenya lo dede, i da ca ene olek oringe i rumu kuno sangite li tiihino. ³⁵ Oru mute kai ko kov oto tenya nei i da oru. ³⁶ Oru tungani lo yen na far ko na tik. Ida kileng malaikahin to kai kode kito oyen oto Apa ake. ³⁷ Iya lafa to faritin kulo Noa, ori manyu mute lotuno lo kito lo tungani ji ³⁸ To kuna faritin orihe kivi i sod, i da lo dile kov, odaha afa cio omatahinoti, kilahaji ko karyok oyemaroti many far na lo rutorore Noa tigol ³⁹ I da o yeniti nyio lo lotuno many ofuonu kivi i sod o dile icieng fad. Ori mute lotuno lo kito lo tungani iya na. ⁴⁰ Ongön mute cio are mana, o dumari lobito o tong lobito. ⁴¹ Ongön mute ngorua are ki ria, o dumari lobito o tong lobito. ⁴² Iya na, i ririati. Tonyo, i da ite i yen far na lo lotunore Lahitok ningi. ⁴³ Oto ito yen jimitan, nga ra o yen monye lo kaji tik lo karue na ngo lotunore kakoni, ji i riria i da kakoni o gil kaji nenge. ⁴⁴ Tona, ito gol many ite, tonyo, o lotuno kito lo tungani to tik na li da ite i ter.

⁴⁵ Ngai hati karwaani la li genuno ko la i geny la lo fik Lahitok lenge o bolorohi karwaak kulakude to kaji lenge, i corihita icieng daha lecieng to tik na lo cam? ⁴⁶ O jir ca diho la karwaani ko lo itu Lahitok lenge o rumahi inyi i tiyo ji. ⁴⁷ Ahi rihohi ite tenya lo dede, o fik mute Lahitok inyi o bolorohi sangite kulenge pili. ⁴⁸ Adi ba ngo rohoi la karwaani, ngi buha ake ake ojo; I rungo Lahitok lei ⁴⁹ Oto hati i cak lumo karwaak kulakude, o lorita daha ko mata ko karumak. ⁵⁰ Olotu ca lahitok lo la karwaani far na li da inyi oter jimitan olotuno inyi, iyo tik la lo lunya inyi. ⁵¹ I ngohi ca inyi kula sidiha ongar kidak lo katalerok faji na li cirarehin ko komo lo kala.