¹ Yesu ko jimitan diho ilulung ko kalihitak kunenge o jo, ² katiyenak kulo cik ko Farisihin lo luny seger lo Moses ³ Tona, o jir ite i ning icieng i tiyo manyu sangite pili kuna lo teny icieng diho ite. Oto ke tiyoti ticitici kunecieng, tonyo, I da icieng i tiyo tohi na liti yena icieng. ⁴ Otor icieng ter na i rwoci o fihahini okokoho kulo cio, icieng hati i da oting kileng kafiele ojir i ngaruni tingo. ⁵ Sangite fad kuna li tiyo icieng ara kulo ki totoro o jir cio odeu. Iti lalata icieng okokoho kulo kyelani kunecieng manyu iti karioti kanyihin kunecieng. ⁶ Onyumoti lohitongorehin to karamahin ko segeri kulo obolore to lotubarehin. ⁷ Imaruni o jir ki fonyoti to cuk, ojir manyu cio ki lolongo ojo Katiyenani. ⁸ Oto keruk ki lolongi isi ojo lahitok, tonyo, i ngönore ite Lahitok lobito hilong. ⁹ ke lolong manyu lobo tungani ten to kov i jo apa, tonyo, i ngön ite ko apa lobito na lo ngön Kai. ¹⁰ ke co manyu ki lolongi o jo Katiyenani, tonyo, i ngön ite ko Katiyenani lobito, inyi Kristo. ¹¹ La i bolo to kaji ningi, o jir a ra karwaani. ¹² Tonyo, tungani la lo ting ken lenge kai iti culuni. Tungani manyu la liti sidiaru ake o tingi kai.

¹³ kidak diho ite katiyenak kulo cik ko Farisihin, ite katalerok. I gienihi ite agwala lo kai to komoma kulo cio, i da manyu ite to kenite i wak rutoro i tiho manyu kula lo tema rutoro. ¹⁴ kidak iyo ite katiyenak kulo cik ko Farisihin, ite katalerok. I dile ite kajihit kulo lafuseritohin, iti karita kiliva lo ki totoro kenite. Tona, kiti gimi mute ite o gal. ¹⁵ kidak diho ite katiyenak kulo cik ko Farisihin, ite katalerok! I rang ite kovikovi ko nam lo ki belo tungani lobito. Ojo li belo, iti rak inyi a ra kito lo Geena kakeny are iya ite.

¹⁶ kidak diho ite, karihitak kula i ngodoho! I jo ite ka li butia tungani to kaji lo Lobanga, i da a ra lobo tohi, oto ka li butia tungani to dab na lo ngön kaji lo Lobanga, i nief kibutia lenge inyi. ¹⁷ Ite kadatarok kula i ngodoho! Ani lo bolo dab kode kaji lo obanga na liti nyu na dab. ¹⁸ Ijo manyu, ka li butia tungani to cali lo kicorita, ida a ra lobo tohi; oto ka li butia to kicorit na lo ngön kai lo cali, i nief kibutia lenge inyi. ¹⁹ ite kangodok, ani lo bolo kicorit? kode cali na liti nyujo kicorit? ²⁰ Tona, tungani la li butia to cali, i butia to sangite fad kuna lo ngöni kai nenge. ²¹ Tungani manyu la li butia to kaji lo Lobanga, i butia to sangite fad kuna lo ngöni katua ko inyi la li tongo katua. ²² Manyu la li butia to Kai, i butia to Lobanga la li tongo ija.

²³ kidak diho ite katiyenak kulo cik ko Farisihin, ite katalerok! I cuari kititomoni kulo jationgo iya kwilili, ikadye, ko olii. Oto iti kaj tenyitenyi kuna i goli diho cik; ngoto lo tenya a ra na i bir, kisa ko kigenoro. O jir adi ite i tiyore kuno, i da iti kaj. ²⁴ Ite karihitak kula i ngodoho, i dumarita ite kujangati to imatit oto i dile lonaga.

²⁵ kidak diho ite, katiyenak kulo cik ko Farisihin, ite katalerok! Iti nyujo Koruong lo icoli ko sahan oto katua i fut ko ngatun ko damun sangite a ra kuningi ake. ²⁶ Farisihin kangodok! I temo re i lal katua lo icoli ko sahan oto ca manyu Koruonga manyu ko nyujon.

²⁷ kidak diho ite katiyenak kulo cik ko Farisihin, ite katalerok! I ri ite iya kwecerehin kuna lo tuei to buya na i kwe, kuna lo botoho o duaruha to oleng, katua hati i fut koi kulo kaweyak ko sangite kuna i rohori. ²⁸ Iya na li botoho ite i nyuji, i jiri to oleng oto katua i lik a ra talerun ko rohojon.

²⁹ kidak diho ite katiyenak kulo cik ko Farisihin, ite katalerok! I duk ite kwecerehin kulo kamocok, iti bibil manyu kwecerehin kulo cio kula i jiri ³⁰ I dima i jo, nga ra ki ngöni afa ohoi to faritin kulo monyeri kuniyang, ngi da afa ohoi ki ngar ko icieng ki juho okoto kulo kamocok ³¹ Iti futata ha kipal lo munyiri. ³² Iti futata ha kipal lo munyiri. ³³ Ite munuok! Ite tee kulo ibohoyohin, aja ca ite i fur fuoro kimatare lo Geena? ³⁴ Iyana, ahi culahino ite kamocok ko kagenyak ko katiyenak. Kude to kiji necieng i fade mute ite, i gurohi diho keek, kude i lum to lotubarehin kuningi, i fuk to kangite ko kangite. ³⁵ O jir i gerihini okoto lo cio kula i jiri fad kula li fadari to ene kov kweci kuningi; many to okoto lo Abel o goru diho okoto lo Zakaria kito lo Berekia la li fadihi ite kiji lo kaji lo Lobanga ko cali lo kicorita. ³⁶ Ahi rihohi tenya lo dede, kuno pili o fuonu ca kweci kulo cio kulo kuno faritin.

³⁷ Xai Jerusalem, Jerusalem isi na li fad kamocok i cak many to kula lo culuni diho isi, kakeny baya a kodomo nan ķi furuno tee kunino iya na li furore i kokor tee kunenge iyo fuho kunenge isi hati i da i wak. ³⁸ to de lo tong kaji nino a ra mura ³⁹ Inyina ahi rihohi nan isi; i da ca isi i rihe i deu nan ari many mute ka li jo isi, o ngönore gum inyi na lotu to karana lo Lahitok.