¹ Oteny Yesu iyo icieng ari to kitisiranihin ojo ² Ori okabue lo kai iya kabu la li kukum karama lo kiyemi lo kito nenge. ³ Oson inyi karwaak kunenge diho cio ki lolonguno icieng iyo karama lo kiyemi, o beru hati icieng fuonuno. ⁴ Inyi ko sona karwaak kulakude are o jo ito rihohiti kulangole cio li lolongi iti jo la kukumahi nan daha nei; lo ngoti mongi ko kacau kunei kuna i firi, lo tero sangite fad. I fuonu karama lo kiyemi". ⁵ Oto icon o beru ningo ko ki sararroti kikohin kunecieng; lobo iya mana nenge, lobo iya lohitilotore nenge ⁶ kude ko ki niefuno karwaak kulo kabu iti gimi ko ki fadaroti icieng. ⁷ Awo hati ko ki niefa kabu ko sona asegere kunenge ko keruno kunu kafadak, o curari ko kangite kunecieng. ⁸ To inya ojo inyi iyo karwaak kunenge, lo tero karama lo kiyemi nei oto ida kulangole cio la lolongu nan ocamiti fuonuno ⁹ Ifuo lokudit lo kikohin, ilolonguti iyo ene karama cio pili kula li rumu ite ¹⁰ Karwaak ko fuoro kikohin ko ki tutubunoti cio pili kula lo rumu icieng; kula i jiri ko kileng kula i rohori kaji lo karama o jir i fut. ¹¹ Ojo kabu o lotu deya welo, ko deuno lobo tungani li da i cief kialani kulo kiyemi ¹² ko ki tifia inyi o jo, "mortele, aja adi isi i rutu ene oru ko kielani kulo kiyemi? Oru ko tenya ngi nyahu na tungani. ¹³ Kabu ko rihohino kakurak o jo, "iti tor kac ko kejuha kunenge i ware oleng katua lo lokimuyuk faji na lo ngön kicira ko komo lo kala ¹⁴ Tonyo, o boreng kula li lolongi oto i kuting kula lo nyumuni.

¹⁵ Farisihin ko fuoru ki kukumahinoti lohuno Yesu to tenya nenge ¹⁶ ko sonahinoti kajifitak kunecieng ko kulo Erode diho inyi na ha o jimi diho Yesu; Katiyenani, ki yen ohoi jimitan isi tungani la i bir, iti yena manyu kikoi lo Lobanga to dede. I da kileng cio kiti gere isi, tonyo, i da isi fik tau ningo icieng. ¹⁷ Ki rihohi ba ohoi, i buha isi aja? O tumohino re sofo lo mucoro diho Cesar kode i da?"

¹⁸ Oto iya na lo yenare Yesu tenya lo taulo kunecieng, ko jimitan iyo icieng; ite katalerok, nyio i gigilo ite loha nan! ¹⁹ Ki totorohiti nan robiati na lo soforehin mucoro? I yauni robiati diho inyi. ²⁰ Inyi ko ki tifia ojo, lo ngai ene karana ko rijori?

²¹ Inyahahi icieng ojo, lo Cesar. Inyi ko jimitan diho icieng, "Icuarata lo Cesar diho Cesar, lo Lobanga diho Lobanga. ²² Ojo icieng oning ji, oto i panyiti bebe. Ko fuoroti, o ngerihini inyi.

²³ Inyi na far bito, Sadusehin kula lo jo oru kibuhuno ko fuonuno diho Yesu ko ki tifiati inyi ojo, ²⁴ Katiyenani, ki rihohi Moses ohoi ojo ko lo wei tungani orihe ida lo tomonu tee, ojir rece ojung ngoruani nenge otomonu tee a ra kulo lokaferoni. ²⁵ Ongöni afa kude recera myetare ene. Oyema la hitok, owei. Tona lo ru tee kunenge olotu la li jivahi ojung ngoruani ²⁶ Na tohi bito i tiihino iyo lo are, lo uni, many i mumudaru icieng icieng fad myetare. ²⁷ To kifuongi o lotu manyu na ngoruani o wei. ²⁸ Na ha ba, far lo kibuhuno i tongo mute inyi a ra ngoruani lo ngai to kiji lo kulo myetare, lo yemaroti ha inyi ko icieng fad?

²⁹ I nyahahi Yesu o jo, I gere ite tona li da ite i yen i geriti kode golun lo Lobanga. ³⁰ Far lo kibuhuno lo ru yema kode kiti yema, i tongo mute icieng iya malaikahin. ³¹ Ojo to tenya lo kibuhuno lo kaweyak, i da ite li ken tohi na lo teny Lobanga; ³² Na Lobanga lo Abraham, Lobanga lo Aisak ko Lobanga lo Jakob, I da inyi a ra Lobanga lo kaweyak oto lo kawuarak. ³³ Ojo ilulung o ning ji, i panyi kiti yena nenge noo.

³⁴ Ojo Farisihin o ning o jo liti buk Yesu Sadusehin, ko ki tutufunoti. ³⁵ Na ha lobito to kiji necieng la la ra kagenyani iyo cik o lab inyi to ene kitifit o jo, ³⁶ Ani cik lo gal iyo cihicihi?

³⁷ I nyahahi Yesu o jo, I maru Lahitok Lobanga nino to tau nino fad, ko to okorif nino fad ko to kibuha nino fad. ³⁸ Cik ketemoni na, na i bolo i lany fad. ³⁹ Ori manyu na li jivita iya inyi; I maru loriehat nino iya kennino ⁴⁰ Cihicihi fad ko i mociti o iha iyo kuno cihicihi are.

⁴¹ Ojo Farisihin i furo a ra lobito, Yesu ko ki tifia icieng ojo, ⁴² nyio i buha ite to Kristo? Kito lo ngai inyi? I nyahahi icieng o jo, "kito lo David".

⁴³ Ojo inyi diho icieng, Aja hati David ko lo tenya to Okorif i lolong inyi ojo Lahitok? To nyo ojo ⁴⁵ Ka li lolong David inyi ojo Lahitok, aja manyu inyi a ra kito lo David? ⁴⁶ Oru ko tungani li fotohi inyi lobo tenya. Na ha, ki caha to na far iya ketemoni o ru tungani lo rihe i tifi inyi.