¹ Ojo icieng lo nyihuno Jerusalem langun lo goruni Betapeg kai lo donge lo Oliv, o cule Yesu kalihitak kunenge are ² ojo iyo icieng i fuo kang na lo ngön ketemoni ningi, ija, i rumu ca ite sigiria na lo tora ko kito nenge. Ito lak i yaunoti icieng diho nan ³ Ko lohi tifi lobo tungani ite o jo, nyio i laha ite sigiriahin, ito rihohiti iti jo o wak Lahitok icieng oto ca inyi o lahahi icieng deu".

⁴ tiihino ene lo kiti futa iya lafa loteny kamoconi Zakaria ⁶ Ofuo kalihitak i tii iya na lo wahare Yesu ⁷ I yauno icieng sigiria ko kito nenge o fetahini kielani kunecieng Koruonga, Yesu ko ki tongohinore. ⁸ Naha ilulung lo cio na hitok ko fetahinoti kielani kunecieng kikoi, kude manyu o gilu kanikanihin kulo cianitok o fetahini kikoi. ⁹ Ilulung kula li temita ketemoni nenge ko kula li jifita omot nenge i gorori o jo; Osana diho kito lo David Gum diho na lo lotuno to katani lo Lahitok Ongön osana kai noo.

¹⁰ Ojo Yesu o rute Jerusalem, i karutoro kov i tifiati, ngai ene?

¹¹ Yesu ene, kamoconi na lo lotu to Nazaret to kov lo Galile.

¹² Ojo Yesu o rute kaji lo Lobanga ko ki fuha katilotok ko kanyangak. I cucule mejahin kulo katobok kulo robia ko segeri kulo katilotok kulo kurihin. ¹³ ko jimitan iyo icieng, i gero ojo, I lolongoti mute kaji nei ojo kaji lo kilifa ite liti rak a ra kunom lo kakokok.

¹⁴ Ofuonu kangodok ko kangwalak diho inyi kaji lo Lobanga, iti furie inyi icieng to ija. ¹⁵ Ojo kaduarak kula hitoha ko katiyenak kulo cik o deu sangite kuna i goli kuna li tii inyi, tee manyu o wolo kaji lo Lobanga o jo Osana diho kito lo David, okaine ko ki niefa icieng.

¹⁶ icieng ko ki tifia Yesu o jo: I ningo isi tohi na lo wolo kulo tee? I nyahahi Yesu o jo, "Ibo, a ningo nan. I da ite li ken faji na lo jo; To kutuhe kulo tee ko idoleha Li co isi maja na i bir?

¹⁷ Inyi ko ngerihino icieng ko loro to Jerusalem iya Beteni, logetore nenge.

¹⁸ To kianyi nenge inyi o loro Jerusalem orumu kinga o daha inyi ¹⁹ Ojo inyi o deu ciani lo bule to kalele lo kikoi, o gere inyi deya oto o rumu o ru bule to ciani, bene keken. Inyi ko jimitan iyo na ciani, "ke rihe ingi ngak ari." To kuna, na ciani ko ki noor.

²⁰ Ojo jayona o deu ji, i panyiti noo ko ki tifiati o jo, "aja ciani i noor deudeu?"

²¹ Inyahahi Yesu icieng o jo, "ahi rihohi nan ite tenya lo dede, ka li ngön ite ko kiruk i da kukuya, i da ca ite i tii tohi na li tiihino iyo ene bule keken, i tum manyu ca ite rihohino donge i jo i lö to dohi katua lo nam, i tiyohino. ²² ka li ruk ite, ki cori ite tohi na li tifia ite to kilifa.

²³ Orute Yesu kaji lo Lobanga, to inya, o rihe inyi iti yena, kaduarak kula hitoha ko ngoroyok kula lobolorohi cio ko fuonuno diho inyi. Itifi icieng inyi ojo, "itiyo isi kuno sangite to ani tuman? Manyu ngai lohi co isi na tuman?

²⁴ Inyahahi Yesu icieng ojo; ahi tifi re manyu nan ite kitifia lobito, ka li nyahahi ite nan, ahi rihohi manyu ca nan ite to ani tuman a tiyo nan kuno sangite. ²⁵ kibatisa lo Jon, olotu afa to aji? Olotu afa to kai kode iyo cio? Orij icieng ake ake ojo: ko lohi jo to kai, ojo ca inyi nyio hati afa ite i da i ning Jon? ²⁶ oto ko lohi jo iyo cio; ki bang ohoi cio, tonyo, iruk icieng fad ojo a ra afa Jon kamoconi ²⁷ icieng ko ki nyahahino ojimi, ida ki yen. Inyi ko jimitan, Ida manyu ca nan ahi tulohi ite tuman na la tiyore nan kuno sangite. ²⁸ I buha ite nyio? Ongön afa lobo tungani ko tee lokilahaji kunenge are. Oto o lo inyi iyo lahitok ojo kito i lö ele far mana

²⁹ ojo la kito iyo monye, "I da nan a loro" to kifuongi hati olotu i bel tau nenge olö.

³⁰ Monye ko loro diho la sidi o rihohi inyi na tenya bito; o jo inyi diho monye, "a lö ca nan lahitok, i da hati o lö. ³¹ Ani to kiji lo kuno tee li tii wahun lo monye? Ojo icieng la hitok. O jo Yesu diho icieng; ahi rihohi nan ite tenya lo dede, o fuoro katisofok kulo mucoro ko kasomok iyo okabue lo Lobanga ketemoni ningi ³² Tonyo, olotu afa Jon diho ite ki totorohino ite kikoi lo jiran i beru ite ki ruk tenya nenge oto iruk katisofok kulo mucoro ko kasomok. Kileng li deu ite kuna i da ite i rwo ko ki tenya nenge.

³³ Ito ning manyu lobo kisrani ene. Ongön afa lobo monye lo mana liti bul vinore. Oduk kiwata lohitir i ric, obok lohitararre lo vino ko duhohino lobele. Ico hati kapangak vinore nenge ko loro owele. ³⁴ ojo lo goru faritin kulo dengo, o cule katiyok kunenge iyo kapangak ki yamaru ngahi kunenge. ³⁵ I niefu kapangak kirwaak kunenge o lumi lobito, i fadari lobito ko cahati lobito to morutok. ³⁶ Olotu inyi o cule karwaak kulakude iyo icieng ilany ketemok oto kapangak i tii iyo icieng na kikoi bito ³⁷ To kifuongi ocule kito nenge iyo icieng iiyo ojo, "obangiti ca kito nei."

³⁸ Ojo kapalak odeu kito nenge ko tenyahinoti kiji necieng ojo, kalunyoni ene. I fuonu nga fadeti ojir ki luny sangite ku nenge ³⁹ icieng ko ki yaru inyi oleng ko ki fadaru inyi. ⁴⁰ Olotu ca monye lo mana i tii nyio iyo kuna kapangak?

⁴¹ Inyahahi icieng ojo, iti cungohi ca inyi kuna karohojak a ra la i rohoi, oto ca i co vinore nenge iyo kapangak kude kuna li corihita inyi ngahi kunenge ko lo goru ofa na lo diarehin.

⁴² Oto Yesu o jo iyo icieng i da ite li ken iyo igeriti; Moru na lo beru kaduhok lo lotu a ra moru lo ogule lo kaji la hitok li tii ene ko duarujon to konyeha kuniyang'? ⁴³ inyina, ahi rihohi nan ite jimitan, odumari ca okabue lo Lobanga iyo ite i cori cio kuna lo tum ongiju ngak kunenge. ⁴⁴ La lo urohino iyo ene moru ogila ca i sisinyaru manyu la lo urohino ene moru i monyaru ca ken nenge. ⁴⁵ Ojo kaduarak kula hitoha ko parisihin oning tenya lo Yesu lo kitisirani, ko koboroti ojimi otenya icieng. ⁴⁶ ko tahitati kikoi na ngi niefarorehin inyi oto obangiti ilulung. Tonyo, orumu cio iruk ojo a ra inyi kamoconi.