¹ Ojo sabit lo ring. To tomorong lo far lo lobito lo sabit, Meri Magdalena ko Meri lobito ko fuoro deya kwecere. ² Oto otira na hitok iti nienieng kov, i culuno malaika lo Lobanga to kai ko kiti bobororo moru to kutuk lo kwecere ko ki tongohinore. ³ Ori orumu la malaika iya ki medek lo hila, okweriha hati kielani kulenge iya lofalanga. ⁴ obang kaririak inyi, i hihiritati o riiti iya kaweyak. ⁵ Na ha malaika ko jimitan diho ngoruo ke bangata. A yen jimitan i tahita ite Yesu lafa lo gurohini diho keteiriwa. ⁶ Oru inyi ten, li buhu inyi iya lafa lo tenyititare. I fuonu ito de langole faji lo getore inyi. ⁷ Ina iti ruharoti deudeu ito rihohiti jayona kulenge, ito jo, li buhu inyi to kiji lo kaweyak. O temoro manyu inyi Galile, i deu ca ite inyi to ija. La kerihi nan rihohino ite!

⁸ Na ha i muri ngoruo to kwecere to bangun na li lihita ko kwama, i fejaroti rihohino jayona kulenge ⁹ Yesu ko kiti rico icieng deudeu ko jimitan, "Ito fonyoti" O fuonu icieng diho inyi, i marühi kejuha kulenge ko kiwora inyi. ¹⁰ Yesu ko jimitan diho icieng, "ke bangata. I fuo ito rihohiti recerra kulei o jir o fuori Galile. O deu ca icieng nan to ija."

¹¹ Orihe ngoruo kikoi, o roc kude to kiji lo kaririak Jerusalem ko rihohinoti kaduarak kula hitoha sangite fad kuna li tiihino. ¹² Ojo kaduarak kula hitoha ko lohituaha i tongohinoti kov i titimi tenya, i co icieng robia kuna i borengi ¹³ ocihi icieng o jo, "Ito jo o fuonu jayona kulenge karue o rumuni ohoi lohi getoro ko kokolaroti inyi. ¹⁴ Ko lo goru ene tenya diho gavuna, kiti timahi ca ohoi inyi. O jir lobo tenya i da o lotu kenite kulingi. ¹⁵ Iyaru asegere robia, i tii iya na lo rihohinorehin icieng. Inyi na tenya na liti kwati kiji lo Judea ko ene far.

¹⁶ Na ha o fuo kuna jayona tomon ko lobito Galile donge na lo cihahi Yesu icieng. ¹⁷ Ojo o deuni inyi, o gungiti kov ki wora inyi kileng. Li kukuya kude kileng. ¹⁸ Yesu hati ko lotuno diho icieng ko jimitan, "Tuman fad to Kai ko kov, lohi cori nan. ¹⁹ tona i fuo i beloto cio kulo kovikovi pili a ra kajivitak kulei, i batisata icieng to karana lo Apa, ko lo kito, ko lo Okorif la Inyu. ²⁰ ko kiti yena icieng rica sangite pili kuna la cik nan ite. To de, a ngön ko ite faritin fad many lohicungi lo kov.