¹ Tona tik o fuonu kalihitak kulo Yesu i tifi inyi o jo, ngai lo bolo i lany to okabue lo kai?

² Oto inyi i lolongu kito na sidi ko kiti woitahino kiji necieng ³ Ko jimitan ahi rihohi tenya lo dede many ka li belo ite i ri iya tee kuna sidiha, i da ite i tum rutoro okabue lo Kai. ⁴ Tona tungani na liti sidi kennenge iya ene kito, inyi lo bolo i lany to okabue lo kai. ⁵ Tona tungani na li fotu kito na sidi to karana nei lohi fotu nan ⁶ Oto ka li co lobo tungani lobo to kiji lo kuno sidiha lo ngön ko kiruk iyo nan i pal, o cam na tungani o torahini moru nahitok murut ko ki biroroti kiji lo nam.

⁷ O ngön kov ko kidak to sangite kuna li co cio o urorita iyo kipal. O tum kuna sangite o fuonu oto tungani na li yauno iceng o deu mute kidak. ⁸ Ko li co kana nino kode keju nino isi kipal, to ngute i bire. O yak isi loro warun i lany ngonun ko kac fad kode ko kejuha fad ki birohini kimatare na li da o dunye. ⁹ Kode ko lohi co konyek nino isi kipal, to wolohosu i bire. O yak isi loro warun to konyek lobito i lany loro iyo kima lo geena ko konyeha are fad. ¹⁰ I na ha keti kaj lobo to kiji lo kuno tee sidiha tonyo o deya malaikahin kunecieng Komom lo Apa nei idi kai. ¹¹ o lotu kito lo tungani tahita kuna lo ri. ¹² I buha ite nyo? Ko lo ngön tungani ko kera mia lobito oto hati lobito o gere, i da inyi o ngerihi kuna keek mietangon ko mietangon dongeco o lo taharu nu lo gere. ¹³ oto ojo o rumu ahi rihohi o kwama inyi to ene ker bito i lany kuna keek mietangon ko mietangon li da o gere oleng. ¹⁴ Tona i da Apa ningi o wak lobo o ri to kiji lo kuno sidiha.

¹⁵ Ka li pal rece nino diho isi i lo i totorohi inyi kipal nenge kiji ningi are ko lohi ning inyi isi, li luahu isi rece nino ¹⁶ Oto ka li da inyi ki ning isi, yaru lobito tungani lobito kode are o jir tenyitenyi pili iti goli to sadeni are kode uni. ¹⁷ Ka lo beru ningo icieng, to rihohi kanisa. Ko lo beru manyu ningo kanisa, iti rahata inyi iya pagan kode katisofoni lo mucoro. ¹⁸ Ahi rihohi tenya lo dede, tohi na li tor ite to kov, o tori manyu to Kai. Tohi na li lak ite to kov o lahi manyu to Kai. ¹⁹ Ari ahi rihohi ite a jo ka li ruk ite are to lobo tohi li tifia ite, i tii ca Apa nei na lo ngön Kai diho ite. ²⁰ Tonyo faji na lo tuba cio are kode uni to karana nei a ngön nan kiji necieng".

²¹ Oto Pita ko lotuno diho Yesu ko ki tifia inyi o jo, Lahitok, o jir nan a lau rece nei kakeny baya ka li pal diho nan? O tum kakeny mietare?

²² Inyahahi Yesu inyi o jo; A jo diho isi, i da a ra kakeny mietare oto a ra kakeny keek mietare kakeny mietare. ²³ Ori okabue lo kai iya kabu na lo ngön kingingija robia kunenge kuna li den katiyok kunenge. ²⁴ Ojo inyi i cak kingingija, ko ki yaunoti tungani na lo ngön ko mongio lo talanta alif lobito ketemoni nenge. ²⁵ Iya na li da inyi o tum duma na mongio, ojo Lahitok nenge o jir i tolotori inyi, ngoruo nenge ko tee kunenge fad o dumarehin mongio nenge. ²⁶ Lerok ko gungon ketemoni lo Lahitok, i lelia o jo, "i donyo tau diho nan, a dum mute nan fad." ²⁷ kisa ko ki niefa na Lahitok, i balihi na mongio o ngerihi inyi o lo. ²⁸ Ojo lo lö lerok oleng, o lö i ric ko katiyoni kaletoni na lo ngön ko mongio lo robia kunenge mia lobito. Lerok ko ki niefa kaletoni to murut ko ki caha goro inyi, o jo, to dum mongio nei.

²⁹ Na katiyoni kaletoni ko gungon ketemoni nenge i lelia o jo; i donyo tau diho nan a dum mute nan. ³⁰ Oto inyi o beru ningo ko loro ko kiti torahino kaletoni lotorare, o jo many o dum mongio nenge fad. ³¹ Ojo katiyok kulakude o deu tohi na li tii lerok iyo kaletoni icieng ko ki longojitati noo ko fuoroti rihohino Lahitok necieng.

³² Lahitok ko ki lolonguno na katiyoni ko jimitan diho inyi, "Isi katiyoni na i rohoi, a balihi nan na mongio dang dang to kilelia na li lieliare isi diho nan. ³³ Ngi da kisa o tum ki niefa isi to kaletoni nino iya lafa lohi niefare na to isi? ³⁴ To kilongo, lahitok nenge ko ki birohino inyi lotorare, o jo, o jir iti gimi many o dum mongio nenge fad. ³⁵ koditi na li tiyore mute Apa nei diho ite inyi na, ka li da ite i la recerra kuningi to taulo kuningi".