¹ Ojo faritin ile lo ring, Yesu ko ki liha ko Pita, Jemis, ko rece Jon o rihoro icieng kai lo donge na i karit ² To ija, i before ken nenge to ketemoni necieng; i farang komom iya kolong, kielani kunenge ko kwerun biny na li medek pikpik. ³ Gaa gaa, o tul Moses ko Elia o tenyati hati ko Yesu na lo boto iyo icieng manyu sek ⁴ Pita ko jimitan diho Yesu, "Lahitok o jir bebe iyo ohoi manya ene, ka li wak isi, nga fahahi nan tuguno uni; lobito nino, lobito iyo Moses ko lobito iyo Elia.

⁵ O rihe inyi o tenya, idis na i farang ko ki muhino icieng, t'inya, ogoro to katua lo na idis ko jimitan, "kito nei ene na la maru nan, ito ning inyi."

⁶ Ojo kalihitak o ning ji, ko rumuhiti kov to bangun ⁷ Yesu ko lotuno o tir icieng o jo, ke bang. ⁸ ojo icieng o tingi konyeha kai, i da o deuni lobo tungani, a ra Yesu ake.

⁹ Ojo icieng lo ngön ki culuno to donge, Yesu ko ciha icieng ojo, "ke rihohiti lobo tungani tohi na li deu ite many kolo waru kito lo tungani to kiji lo kaweyak.

¹⁰ Itifi kalihitak inyi ojo, "Aja hati katiyenak kulo cik ojo owak re Elia li tem lotuno?"

¹¹ I nyahahi Yesu o jo, "o cam re Elia i temu i kukumahi sangite pili ¹² Oto ahi rihohi nan ite a jo, li temu Elia many berien icieng hati i da o yen oto i tii ken nenge iya na lo wahitare icieng. Iyana manyu ca kito lo tungani o rumu kidak kac kunecieng. ¹³ Kalihitak ko yenun jimitan o tenya inyi Jon kabatisani iyo icieng

¹⁴ Ojo icieng lo fuonu iyo ilulung, o lotu lobo tungani iti ric Yesu ko gungon ketemoni nenge. ¹⁵ Oto ojo diho inyi; "Lahitok, i ngohi mehino ki nief isi iyo kito nei, o muai inyi lohidhide. Orumu kidak noo, owurorita; to lobo katua lo kivi, to lobo kimatare. ¹⁶ A yauno nan inyi iyo kalihitak kunino, i da kileng icieng otum kiti furioro inyi.

¹⁷ Ojo Yesu; ite cio kulo kuno karihin oru kiruk ningi i palaru manyu ikoditi kuningi, many anu mute a tongo nan ko ite? Many anu mute a wasihi nan diha ite? Yau inyi ene diho nan. ¹⁸ Yesu ko ki rienga na lodonyohiti, ko rutuno to ken nenge, na lokilahaji ko furioro inyi na tik to ken.

¹⁹ To kifuongi o fuonu kalihitak diho Yesu lo lit i tifi inyi o jo; nyo li tik ohoi ki fuharu?

²⁰ Inyahahi Yesu o jo; tonyo, i sidi kiruk ningi noo. Ahi rihohi tenya lo dede, ka li ngön isi ko kiruk, kileng ngi sidi iya kinyemoti lo karadali. I tum isi i jo iyo ene donge i suala ten iya idi, ko ki suala; o ru lobo tohi ngohi lanyu ite. ²¹ Oto i da ikodit lo ene o tum rutuno ke li da a ra to kilifa ko farangun kinga.

²² Ojo icieng lo tuba a ra lobito Galile, ojo diho icieng, "I cori ca kito lo tungani kac kulo cio ²³ ifade ca icieng inyi, ojo to faritin uni o waru. Kalihitak kunenge ko ki toyo bebe.

²⁴ La ngun lo goru Yesu ko kalihitak kunenge Kapanaum, ofuonu katisofok kulo mucoro iyo Pita ko ki tifia inyi o jo, i da Katiyenani ningi osofo mucoro lo kaji lo Lobanga?

²⁵ I fotu Pita ojo osofo. Ojo Pita o rutu kaji i tem Yesu tenya, i tifi inyi ojo, "I iiyo isi nyo, Saimon? Iyo ngai iti sofo kabuno kulo ene kov mucoro iyo, iyo tee kunecieng kode iyo misok?"

²⁶ Ifotu Pita o jo iyo misok. Ifotu Yesu o jo inyi jimitan iyoma tee. ²⁷ Oto hati, o jir ohoi i da kiti longojita icieng, i lo nam i birohi goli nino iyo kivi. Kayamiti na li tem isi ki niefuno, to nga kutuk nenge i rumu ca isi robiati katua, i corihi hati icieng a ra mucoro nitole ko nino".